മിഴിരണ്ടിലും… [Jack Sparrow] 136

” ഏയ്.. അങ്ങനെ ഒന്നും.. ഇല്ല ടീച്ചറെ..” എന്ന് പറഞ്ഞു കൊണ്ട് ഒന്നിളിച്ചു കാണിക്കാനല്ലാതെ ആ ഒരവസ്ഥയിൽ എനിക്കൊന്നിനും കഴിയുമായിരുന്നില്ല..!

” മ്മം ശരി.. ശരി, ഇരിക്ക്” എന്ന് പറഞ്ഞു കൊണ്ട് ടീച്ചർ അടുത്തയാളുടെ പേര് വിളിച്ചു…

അപ്പോഴേക്കും പുറത്ത് നല്ലോണം മഴ പെയ്യാൻ തുടങ്ങി…

“പുറത്ത് നല്ല മഴയാണല്ലോട സിദ്ധൂ,ഇനി അവളെങ്ങാനും മഴയത്ത് പെട്ടിട്ടുണ്ടാവോ?”
നികേഷ് എന്നെ നോക്കാതെ പറഞ്ഞു…

“ഏയ് ഇല്ലട അവൾ വരുന്നുണ്ടാവും…!”

പറഞ്ഞ് കഴിഞ്ഞാണ് നാവിൽ ഗുളികൻ കയറിയ കാര്യം ഞാൻ ഓർത്തത്… കള്ളി വെളിച്ചത്തായതിന്റെ ചമ്മലിൽ തിരിഞ്ഞവനെ നോക്കിയ ഞാൻ കാണുന്നത് എന്നെ തന്നെ തുറിച്ച് നോക്കിയിരിക്കുന്ന അവനെയാണ്..! എന്നാലാ സമയത്തും അവന്റെ മുഖത്തൊരു കള്ളച്ചിരിയില്ലാതില്ല…!

“ആര് വരുന്ന കാര്യാടാ പറഞ്ഞേ?”

അവൻ ചോദിച്ചു,

അവൻ ചോദിച്ചത് കേട്ടൊന്ന് പതുങ്ങിയെങ്കിലും ഉടനെ വായിൽ വന്നൊരു നുണ തട്ടിവിടാൻ ഞാൻ മറന്നില്ല..!

“അത്…അത് ഞാൻ ജ്യോതി..,ജ്യോതി വന്നില്ലല്ലോ,അപ്പോ അവളുടെ കാര്യമാ ഉദ്ദേശിച്ചേ..”

അവൻ എന്നെ ഒന്ന് ഇരുത്തി നോക്കിയിട്ട് പറഞ്ഞു,
“അപ്പോ ആ ഇരിക്കുന്നത് ജ്യോതിയല്ലാതെ പിന്നെ നിൻ്റെ മറ്റവളാണോ?”

പെൺപിള്ളേരുടെ ഭാഗത്തേക്ക് ചൂണ്ടിക്കാണിച്ചു കൊണ്ട് അവൻ ചോദിച്ചതും ഞാൻ അങ്ങടില്ല്യാണ്ടായി…!
നോക്കുമ്പോൾ ജ്യോതി അവിടെ തന്നെ ഇരിപ്പുണ്ട്, ശ്ശെടാ ഇവളിതെപ്പോ വന്ന് കയറി? പിന്നെയും മൂഞ്ചിയല്ലോ എന്നാലോചിച്ച് അവന്റെ മുഖത്തേക്ക് നോക്കുമ്പോൾ ഇഷ്ടൻ ഗൗരവത്തിലാണ്..

“എടാ അത്.. അവൾ വന്ന് കയറിയത് ഞാൻ കണ്ടില്ലടാ അതാ പെട്ടന്ന്..”

ഞാൻ അത്രയും എങ്ങനെയൊക്കെയോ പറഞ്ഞൊപ്പിച്ച് അവനെ നോക്കുമ്പോൾ ഒന്നും മിണ്ടാതെ തന്നെ അവൻ എന്നെ തന്നെ ശ്രദ്ധിച്ചിരിക്കുന്നതാണ് ഞാൻ കണ്ടത്…!