ബെത്ലഹേമിലെ മഞ്ഞുകാലം?? (മനൂസ്) 2561

നിത്യവൃത്തിക്കായി പരക്കം പായുന്ന മനുഷ്യർ.. പലരും പല വികാര വിചാരങ്ങളുമായി അവരുടെ ലക്ഷ്യങ്ങൾ തേടിയലയുന്നു…

ചിലർ തന്നെപ്പോലെ ലക്ഷ്യമില്ലാതെ ഒഴുക്കിന് അനുസരിച്ച് നീന്തുന്നുണ്ടാവും..

റോഡിന് ഇടത് വശത്തു തലയെടുപ്പോടെ നിൽക്കുന്ന പുല്ലിച്ചിറ പള്ളി അവളുടെ കണ്ണിൽ പെട്ടത്..

ഒരുപാട് ഓർമ്മകളുടെ അവശിഷ്ടങ്ങൾ പേറുന്ന സ്ഥലം..

ആദ്യ കുർബാന, ക്വയർ, ആൽവിൻ,

അവളുടെ ഹൃദയം വീണ്ടുമാ ഇരുപതുകാരിയായി പരിണമിച്ചു…

മിശിഹായുടെ വചനങ്ങളും തിരുസഭയുടെ നിയമങ്ങളും അനുസരിച്ചു ജേക്കബിന്റെയും മീന ജേക്കബിന്റെയും മകളായ ഹെലൻ ജേക്കബിനെ ഭാര്യയായി സ്വീകരിക്കാൻ നിനക്ക് സമ്മതമാണോ…

നാണത്താൽ വിടർന്ന ഹെലന്റെ കരം ആരും കാണാതെ കവർന്ന് കൊണ്ട് ആൽവിൻ ഉത്തരം നൽകി…

“സമ്മതം….”

മിശിഹായുടെ തിരുവചനങ്ങളും തിരുസഭയുടെ നിയമങ്ങളും അനുസരിച്ച് മാത്യുവിന്റെയും മീന കുര്യന്റെയും മകനായ ആൽവിൻ മാത്യുവിനെ ഭർത്താവായി സ്വീകരിക്കാൻ നിനക്ക് സമ്മതമാണോ…

അച്ഛന്റെ ചോദ്യത്തിന് മനസ്സിൽ നൂറുവട്ടം എന്ന് ചേർത്തു അവൾ പറഞ്ഞു

“സമ്മതം…”

അവളുടെ കൈവിരലുകൾ അവന്റെ കൈകളിൽ കോർത്തു പിടിച്ചു…

അപ്പോൾ അവർക്ക്  സംഗീതമായി പുറത്ത് മഴ പെയ്തിറങ്ങി…

നീട്ടിയുള്ള ഹോണിന്റെ ശബ്ദമാണ് അവളെ വീണ്ടും വര്ത്തമാന കാലത്തേക്ക് കൂട്ടിക്കൊണ്ട് വന്നത്..

ഓർമ്മകൾ അവളെ കുത്തി നോവിച്ചു…

ഞെട്ടലോടെ തല ഉയർത്തിയ ഹെലന്റെ മിഴികളിലെ നീർത്തുള്ളികൾ ജോയൽ കണ്ടു..

എത്രയൊക്കെ ശ്രമിച്ചിട്ടും താൻ വീണ്ടും തോറ്റ് പോകുകയാണെന്ന് അവന് തോന്നി.. ജയിച്ചു നേടിയ ജീവിതം കൈവിട്ട് പോകും പോലെ..

ഒരുപക്ഷേ അവളെക്കാൾ ഓരോ ദിവസവും മനസ്സ് കൈവിട്ട് പോകുന്നത് തനിക്കാണ്…

അവന്റെ കൈകൾ മെല്ലെയവളുടെ കൈകളെ ഗ്രഹിച്ചു.. ജോയി തന്റെ കൈകളെ കവരുന്നത് അറിഞ്ഞിട്ടും അവനെ നോക്കാതെ അവൾ അകലേക്ക് മിഴികൾ നട്ടു…

വണ്ടി വീടിന്റെ ഗേറ്റ് കടന്ന് അകത്തു കയറിയതും ആരും കാണാതെ അവൾ കണ്ണുനീർ തുടച്ചു മാറ്റി…