നിഴലായ് അരികെ15

           author :   ചെമ്പരത്തി 

Nizhalaay arike, chembaratthy

മരുന്നുകളുടെ രൂക്ഷമായ ഗന്ധം മൂക്കിലേക്കടിച്ച നന്ദൻ പതിയെ കണ്ണ് തുറന്നു  ഇടതുവശത്തേക്കു ഒന്ന്  നോക്കി പതിയെ എഴുന്നേൽക്കാൻ ശ്രമിച്ചു… എന്നാൽ വേദന കൊണ്ട് പുളഞ്ഞു ആ ശ്രമം വേണ്ടാ എന്ന് വച്ചവൻ പതിയെ തന്റെ ശരീരത്തിലേക്കു നോക്കി….
ഇടതുകയ്യിൽ ഡ്രിപ് ഇട്ടിട്ടുണ്ട്…. വലതുകൈ,മുട്ട് മുതൽ താഴെ വരെ പൊതിഞ്ഞു കെട്ടിയിരിക്കുന്നു…. ഇട്ടിരുന്ന പാന്റിന്റെ വലതു കാൽ കീറിമാറ്റി  കുറെയേറെ ബാന്റെജുകൾ പകരം സ്ഥാനം പിടിച്ചിട്ടുണ്ട്….. എവിടൊക്കെയോ നീറ്റലും വേദനയും അവനറിയുന്നുണ്ടായിരുന്നു….തലയ്ക്കു ചെറിയൊരു ഭാരം അനുഭവപ്പെട്ട നന്ദൻ ഇടതുകൈകൊണ്ട് പതിയെ ഒന്ന് തൊട്ടു നോക്കിയത് ചുറ്റിക്കെട്ടിയ കോട്ടൺതുണിയിൽ ആണ്….

ഏതാനും നിമിഷം ഒന്നും മനസിലാകാതെ ഇരുന്ന നന്ദന്റെ മനസ്സിൽ ഒരു വെള്ളിടി വെട്ടിയപോൽ ആര്യയുടെ മുഖം തെളിഞ്ഞു….ഒപ്പം തന്നെ ശരീരമാസകലം ഒരു വിറയൽ കടന്നു പോയി…. കഠിനമായ തണുപ്പിലെന്നോണം ദേഹം കിടുകിടുത്തു…..നിരങ്ങി നീങ്ങുന്ന ബൈക്കും, വളവു വീശി കയറി വരുന്ന KSRTC യും, തെറിച്ചു ബസിനടിയിലേക്ക് വീണ ആര്യയുടെ ചിത്രവും വിറയലിന് കൂട്ടായെത്തി….

“അമ്മൂ….”
ഒരു ചെറു ശബ്ദം തൊണ്ടയിൽ നിന്നും നിലവിളി പോലെ പുറത്തു ചാടി…

എന്തോ ശബ്ദം കേട്ട ഡ്യൂട്ടിനഴ്സ് വന്നു നോക്കുമ്പോൾ കാണുന്നത്, ഇടതുകൈയിൽ കുത്തിയ ഡ്രിപ്പിന്റെ നീഡിൽ, പൊതിഞ്ഞു കെട്ടിയ വലതു കൈകൊണ്ട് ഊരിയെടുക്കാൻ ശ്രമിക്കുന്ന നന്ദനെ ആണ്….

“ഹേയ്….. സർ എന്താ ഈ കാണിക്കുന്നത്….????
അവിടെ കിടക്കൂ……”

“അവൾ…. അമ്മു…… അല്ല ആര്യ…..എവിടെ….?”

“സർന്റെ കൂടെ ഉണ്ടായിരുന്ന ആ പെൺകുട്ടി അല്ലെ…? അവർ അപ്പുറത്തുണ്ട്…. അവർക്കു കുഴപ്പം ഒന്നുമില്ല…. കുറച്ചു മുറിവുകളെ ഉള്ളൂ….”