നിഴലായ് അരികെ – 19 | Nizhalay Arike – 18 | Author : ചെമ്പരത്തി

[ Previous Part ]

• നിഴലായ് അരികെ – 19

   

   

  ദിവസങ്ങൾക്കു ശേഷം മനസ്സിലെ പിരിമുറുക്കങ്ങൾക്ക് ഒരു ശാന്തത വന്നതിനാൽ ആകണം വണ്ടിയിൽ കയറി കുറച്ചു കഴിഞ്ഞപ്പോഴേക്കും നന്ദൻ വീണ്ടും ഉറക്കത്തിലേക്കു വീണു……

   

  വണ്ടിക്കുള്ളിൽ നേർത്ത ശബ്ദത്തിൽ അലയടിച്ചു കൊണ്ടിരുന്ന ഗസലിന്റെ താളത്തിനൊത്ത്‌ ആര്യയുടെ വിരലുകളും സ്റ്റീറിങ് വീലിൽ താളം പിടിച്ചുകൊണ്ടിരുന്നു……

  ചരൽ വാരിയെറിയുന്ന പോൽ ഉള്ള കനത്ത മഴയെ വകവെയ്ക്കാതെ,കരുത്തനായ ആ കറുത്ത കുതിരയെ അനായസം തന്റെ വലതു കയ്യാൽ മെരുക്കിയെടുക്കുന്നതിനിടയിലും അവളുടെ കണ്ണുകൾ കൂടെക്കൂടെ ശാന്തമായുറങ്ങുന്ന നന്ദന്റെ മുഖത്ത് പാളി വീഴുന്നുണ്ടായിരുന്നു…..

  ഗിയർ ചേയ്ഞ്ജ് ചെയ്യുന്ന സമയത്തും അല്ലാതെ ചുരുക്കം സമയങ്ങളിലും ഒഴികെ ബാക്കിസമയങ്ങളിൽ ആര്യയുടെ ഇടതു കൈ, കോ-ഡ്രൈവർ സീറ്റിന്റെ ഹാൻഡ്റെസ്റ്റിൽ ഇരുന്ന നന്ദന്റെ കൈമേൽ ആയിരുന്നു…….

   

  ബ്രേക്കിന്റെ അലർച്ചയോടൊപ്പം താൻ മുന്നോട്ടാഞ്ഞതും അറിഞ്ഞാണ് നന്ദൻ ഞെട്ടി കണ്ണ് തുറന്നത്…..

   

  വണ്ടിയുടെ, മുന്നോട്ടും പിന്നോട്ടും ഉള്ള ചാഞ്ചാട്ടം നിന്നിരുന്നില്ല……

   

  “ന്താമ്മൂ….. ന്താടീ പറ്റിയെ…??”

  ഡ്രൈവർ സൈഡിലെ ഡോറിൽ കൂടി പുറത്തേക്കു നോക്കിക്കൊണ്ടിരുന്ന ആര്യയോടവൻ അമ്പരപ്പോടെ ചോദിച്ചു…..

   

  “ഏയ്….. ഒന്നൂല്ല്യ….. ഒരു പട്ടിക്കുഞ് വട്ടം ചാടിയപ്പോൾ ചവിട്ടിയതാ…….”

  ഒന്ന് പരുങ്ങിയിട്ടവൾ മറുപടി പറഞ്ഞു…..

   

  അവൻ ചുറ്റും നോക്കി….അവിടെ മഴ പെയ്തിട്ടില്ലാ എന്ന് തോന്നും വിധം റോടൊക്കെ ഉണങ്ങിയിരുന്നു….ഇടതു വശത്ത് കണ്ട കടയുടെ ബോർഡിൽ പുതുപ്പാടി എന്ന് കണ്ട നന്ദൻ കയ്യിൽ കെട്ടിയിരുന്ന വാച്ചിലേക്കും ആര്യയുടെ മുഖത്തെക്കും മാറിമാറി നോക്കി……