നന്ദന 5 [ Rivana ] 88

“ ടി കാന്താരി എണീറ്റെ, നേരം എത്രയായെന്ന വിചാരം “

“ ഹ്മ്മ് “ അച്ഛൻ അങ്ങനെ പറഞ്ഞെങ്കിലും ഞാനാ നെഞ്ചിലേക്ക് ഒന്നും കൂടെ മുറുകെ കയറുകയാണ് ചെയ്തത്.

“ എടി കുരിപ്പെ ഇത്രയും നേരം ബോധമില്ലാണ്ട് വായിൽ ഒലിപ്പിച്ചു കിടന്ന് അതൊക്കെ കുളിച്ചു വന്ന എന്റെ മേത്ത് തേക്കുവാണോ “

“ ഞാൻ എന്റെ അച്ഛന്റെ മേത്തല്ലേ തേക്കുന്നെ അതിന് നിങ്ങക്കിപ്പ എന്താ, ഒന്നടങ്ങി ഇരിക്കി മൻഷ്യാ ഞാനൊന്ന് കെട്ടി പിടിച്ചൊന്ന് കിടന്നോട്ടെ “

“ നിനക്ക് ഈ ഇടയായി കുറച്ചു കുറുമ്പ് കൂടുന്നുണ്ട്, ആറ് മണിയാകാറായി വേഗം എണീറ്റ്‌ വാ, എനിക്ക് കുറച്ചു പണി കൂടെ ഉണ്ട്, എന്നെ വന്ന് സഹായിക്ക് നന്ദൂട്ടിയെ “ അച്ഛൻ എന്നെ എണീപ്പിച്ചു കൊണ്ട് റൂമിൽ നിന്നും പുറത്ത് പോയി.

ഞാൻ പിന്നെ അതികം അവിടെ കിടക്കാതെ റൂമിൽ നിന്നും ഇറങ്ങി മുഖം ഒന്ന് കഴുകി അടുക്കളയിലേക്ക് കയറി. അവിടെ അച്ഛൻ രാത്രിയിലേക്ക്‌ കഴിക്കാൻ ഉണ്ടാക്കുന്ന പണിയിൽ ആയിരുന്നു.

“ ഇനി പറയ്, എന്തൊക്കെയാണ് ഇന്നത്തെ വിശേഷങ്ങൾ “ അച്ഛൻ ഒരു കപ്പ് ചായ എനിക്ക് തന്നിട്ട് ഇന്നുണ്ടായ കാര്യങ്ങൾ പറയാൻ പറഞ്ഞു.

ഞാൻ അങ്ങനെ ഇന്ന് നടന്ന ഓരോ കാര്യങ്ങളും ഒരു വള്ളി പുള്ളി പോലും തെറ്റാതെ അച്ഛനെ കേൾപ്പിച്ചു.

അച്ഛൻ അതിനെല്ലാം ചിരിയോടെ എന്നെ പ്രോത്സാഹിപ്പിക്കുകയും ചെയ്തിരുന്നു. പിന്നീട് എന്നത്തേയും പോലെ തന്നെ ആ ദിവസവും കടന്നു പോയി.

_____

പിന്നീടുള്ള ദിവസങ്ങൾ കടന്ന് പോയി കൊണ്ടിരുന്നു എല്ലാ അലോട്മെന്റ് കഴിഞ്ഞതും സ്കൂളിൽ ഉള്ള എല്ലാ സീറ്റുകളും മുഴുവനായി കഴിഞ്ഞിരുന്നു.

ഇതിനിടയിൽ ഞങ്ങൾ മൂന്ന് പേരുടെയും ഫ്രണ്ട്ഷിപ്പിന്റെ ആഴം കൂടുകയായിരുന്നു. ഓരോ ദിവസം കഴിയും തോറും ഞങ്ങളിലെ സൗഹൃദത്തിന്റെ വലയം മുറുകുകയാണെന്ന് പറയാം. ക്ലാസിൽ ഉള്ള എല്ലാ കുട്ടികളുമായും പരിചയവും സാധാരണയിൽ ഉള്ള ഒരു സൗഹൃദവും ഉണ്ടെങ്കിലും, ഞങ്ങൽ മൂന്ന് പെരും തമ്മിൽ ഉണ്ടായിരുന്ന ഫ്രണ്ട്ഷിപ്പ് വളരെ ഡീപ്പ് ആയിരുന്നു.