ഡെറിക് എബ്രഹാം 7 [അഹമ്മദ് ശഫീഖ് ചെറുകുന്ന്] 247

“അതല്ല ആദീ… നീ CM പറയുന്നത് മുഴുവനായും കേൾക്കൂ ”

“എത്ര കേട്ടാലും എന്റെ തീരുമാനത്തിന് മാറ്റമില്ലെങ്കിൽ പിന്നെന്തിന് അദ്ദേഹത്തെ ബുദ്ധിമുട്ടിക്കണം അങ്കിൾ…
എനിക്ക് ഇനിയുള്ള ഒരേയൊരു ലക്ഷ്യം എന്റെ കുടുംബം നശിപ്പിച്ചവനെ കണ്ടെത്തുക എന്നുള്ളതാണെന്ന് ഞാൻ പലവട്ടം പറഞ്ഞു…അതിനിടയിൽ ഒരു മാഫിയയും സ്റ്റീഫനും എന്റെ വിഷയമല്ല…കണ്ണിൽ ചോരയില്ലാത്ത, മനസ്സിൽ കരുണയില്ലാത്ത ഒരു ദുഷ്ടനായി തോന്നിയേക്കാം നിങ്ങൾക്ക്… പക്ഷേ, ഇന്നെന്റെ വിഷയം ഇതാണ്…
പ്രതികാരം… അത് ഞാൻ ചെയ്യുക തന്നെ ചെയ്യും ”

ആദി അവിടെ നിന്നെഴുന്നേറ്റ് പുറത്തേക്കിറങ്ങാനായി വാതിലിനരികിലേക്ക് നീങ്ങി…അത് കണ്ട് CM ഉം അവിടെ നിന്നെഴുന്നേറ്റു….

“ആദീ… ഒരു നിമിഷം….”

“സാർ.. ദയവു ചെയ്ത് ഇനിയുമെന്നെ നിർബന്ധിക്കരുത്…ഈ നാട്ടിലെ രാഷ്ട്രീയ ഹിജഡകളിൽ നിന്നും സ്വന്തമായി ഒരു വ്യക്തിത്വമുള്ള സാറിനെ എനിക്കത്രയും സ്നേഹമാണ്,ബഹുമാനമാണ്… ആ സാറിനെ ധിക്കരിച്ചുവെന്നുള്ള അവസ്ഥ എനിക്ക് വരരുതെന്നൊരു ആഗ്രഹം കൊണ്ടാണ് ഞാൻ പറയുന്നത്.. എന്നെ ഒഴിവാക്കണം സാർ.. പ്ലീസ്…”

അതും പറഞ്ഞു അവൻ വാതിൽ തുറന്നു….

“നിന്റെ ജീവിതം ഇല്ലാതാക്കിയവനെ കണ്ടു പിടിക്കാനാണ് ഞാൻ നിന്നോട് ഇത്രനേരവും പറഞ്ഞു കൊണ്ടേയിരിക്കുന്നതെന്നെങ്കിലും മനസ്സിലാക്കാനുള്ള ക്ഷമ കാണിച്ചിട്ട് പോ”

അത് കേട്ടതും ആദിയൊന്ന് ഞെട്ടി…തലയിലെന്തോ തുളച്ചു കയറിയത് പോലെ തോന്നിയവന്…
താനെന്താണിപ്പോൾ കേട്ടത്….
കേട്ടത് തന്നെയാണോ CM പറഞ്ഞത്… അല്ല, തന്റെ വെറുമൊരു തോന്നലാണോ..
പലവിധ ചിന്തകളും അവനിൽ മിന്നിമാഞ്ഞു….
അവൻ യാന്ത്രികമായി CM ന്റെ അടുക്കലേക്ക് തിരിഞ്ഞു….

“സാർ എന്താണിപ്പോൾ പറഞ്ഞത്… എനിക്ക് ശരിക്കും മനസ്സിലായില്ല…”