ജോക്കർ [ആൽബി] 1094

…………
ന്യൂ ഇയർ രാത്രി കുളമായ വിഷമത്തിൽ അന്നുച്ചക്ക് അവർ ഒത്തുകൂടി. ആന്റണിയുടെ അടിയായിരുന്നു ചർച്ചാവിഷയം. അതിലേക്ക് ആന്റണി വന്നതും ബിയ വീർത്തുകെട്ടി അല്പം വീങ്ങിയ മുഖവുമായി അവിടെനിന്നും മാറി.

ആന്റണി,നിനക്കെന്താ പറയാനുള്ളത് നമിത് തുടങ്ങിവച്ചു.

അത്‌ പിന്നെ ബോസ്സ്, അവൾ എന്ത് ഭാവിച്ചാ ഇന്നലെ.

അവൾ നിന്നോടുള്ള ഇഷ്ടം തുറന്നു പറഞ്ഞു. അതിനെന്താ. ഇങ്ങനാണോ റിയാക്ട് ചെയ്യുന്നേ?

പിന്നെ പരസ്യമായി ഉമ്മവച്ചോണ്ടാണോ പറയുന്നേ.

എടാ അത്‌ ആ ഒരു മൂഡിൽ ചെയ്തതാവും. അതിനു പബ്ലിക് ആയി അടിക്കണമായിരുന്നോ.നിനക്ക് അത്‌ സ്മൂത്ത്‌ ആയി ഹാൻഡിൽ ചെയ്യാമായിരുന്നു.ഒന്നുല്ലേലും പെൺകുട്ടി അല്ലെ.

പെൺകുട്ടി, ഇത്തിരി ഒലിപ്പീരു കൂടുതലാ അവൾക്ക്.

അത്‌ നിന്റെ അടുത്തെ ഉള്ളു.ഏതായാലും മോശായിപ്പോയി.

സഹിച്ചു. ആന്റണി അവിടുന്ന് ഒഴിയാൻ നോക്കി.

ഡാ, നീ ഇവിടിരുന്നേ. പറയട്ടെ. അവൾക്ക് എന്താടാ ഒരു കുറവ്. നിങ്ങൾക്ക് പരസ്പരം അറിയുന്നതല്ലേ. ശരിയാണ്, അവൾക്ക് കുറച്ചു ഫിനാൻഷ്യൽ ക്രൈസിസ് ഉണ്ട്. നിനക്ക് ഇപ്പോൾ തന്നെ ആ ഓസ്ട്രേലിയൻ ഫിർമിലേക്ക് ഷോർട്ട് ലിസ്റ്റിൽ കിട്ടി. നിന്റെ കാലിബർ വച്ചു നിനക്കത് ഉറപ്പാ. പിന്നെ അവൾക്കും ഏതോ ഒരു ജോബ് ശരിയായിട്ടില്ലെ അവിടെ.

ചേട്ടായി എന്താ പറഞ്ഞു വരുന്നേ.

അതുതന്നെ. നിങ്ങൾക്ക് ഒന്നിച്ചുകൂടെ. അങ്ങനായാൽ ഏറ്റവും സന്തോഷിക്കുന്നത് ഞങ്ങളൊക്കെ ആവും.എല്ലാം മനസ്സിലാവുന്ന, അറിയുന്ന ഒരാളുടെ സപ്പോർട്ട് അല്ലെ അവളും ആഗ്രഹിക്കുക.അതിലെന്താടാ തെറ്റ്. ഈ പ്രശ്നങ്ങൾ ഒക്കെ തീരാവുന്നതേ ഉള്ളു. പരസ്പരം മനസ്സിലാക്കുന്ന, അറിയുന്ന രണ്ടുപേർ. അപ്പോഴല്ലേ ലൈഫിന് ഒരു നിറം ഒക്കെ ഉണ്ടാവൂ.ചെല്ല് അവളോടൊന്ന് സംസാരിക്ക്. എന്നിട്ട് നല്ലൊരു തീരുമാനത്തിൽ എത്തു രണ്ടാളും.
………
ദിനങ്ങൾ കൊഴിഞ്ഞുകൊണ്ടിരുന്നു ബിയയും ആന്റണിയും പ്രണയത്തിന്റെ മേച്ചിൽപുറങ്ങളിൽ ഒരുമനസോടെ നടന്നുകയറി. ഇടയ്ക്കിടെ അവളുടെ വീട്ടിലുള്ള സന്ദർശനങ്ങൾ അവരുടെ ബന്ധത്തിന് പുതിയ മാനങ്ങൾ നൽകി.അവരുടെ സായാഹ്നങ്ങൾ പ്രഗതിമൈദാനിലെ പുൽതകിടികളിൽ ആയി. അങ്ങനെ ഒരു സായംകാലം.

ആന്റണി,നിനക്കറിയുവോ.ചാച്ചൻ പോയേപ്പിന്നെ അമ്മ കുറെ ബുദ്ധിമുട്ടുന്നുണ്ട്.ബന്ധുക്കൾ നോക്കുമ്പോൾ എന്താ.ഡൽഹിയിൽ താമസം. അമ്മയും മോളും ജോലിക്ക് പോണു. അനിയൻ എൻജിനിയറിങ്ങിന് പഠിക്കുന്നു.രണ്ടറ്റവും കൂട്ടിമുട്ടിക്കാൻ ഉള്ള വിഷമം അവർക്ക് അറിയണ്ടല്ലോ.