ചെകുത്താന്‍ വനം 7 [Cyril] 2323

പിന്നെ മറ്റുള്ള ഏതു ജീവി ആയാലും, അവരില്‍ പ്രപഞ്ച ശക്തികളായ നത്തോറ, അറോറ, ഗിയ എന്ന മൂന്ന് ശക്തികളുടെയും സ്പര്‍ശം ഉള്ളവര്‍ക്ക് മാത്രമേ— അതായത് അവർ മൂന്ന് പേരുടെയും ശക്തി ഉള്ളവര്‍ക്ക് മാത്രമേ എന്നോട് സംസാരിക്കാനുള്ള ശക്തി ലഭിക്കുകയുള്ളൂ…….. എന്നിരുന്നാലും എന്റെ ശബ്ദ ശക്തിയെ താങ്ങാനുള്ള ശക്തി അവര്‍ക്കില്ല…. അതുകൊണ്ട്‌ അവരില്‍ ആരെങ്കിലും എന്നോട് സംസാരിക്കാൻ ശ്രമിച്ചാൽ അവരോട് ഞാന്‍ ദൃശ്യ കാഴ്ചകള്‍ മുഖേനെ മാത്രമേ സംസാരിക്കുകയുള്ളു.
ഒരുപക്ഷേ ലോകവേന്തന് നിന്നെ പോലെ ചിന്തിക്കാൻ കഴിഞ്ഞാൽ — അവനും നിന്നെപ്പോലെ മന്ത്ര കവചം സൃഷ്ടിക്കാന്‍ കഴിയുമെങ്കില്‍— അവനും നിന്നെപ്പോലെ എന്റെ ശബ്ദ ശക്തിയെ താങ്ങാന്‍ കഴിഞ്ഞേക്കും.”

എല്ലാം കേട്ടുകൊണ്ട് ഞാൻ ആ മഞ്ഞ് രൂപത്തെ വെറുതെ നോക്കി നിന്നു.

ഉന്നത ശക്തി പിന്നെയും തുടർന്നു, “എന്റെ മുന്നില്‍ നന്മ തിന്മ എന്ന്  വേര്‍തിരിവില്ല. എല്ലാ ശക്തികളും എന്നില്‍ നിന്നും ഉത്ഭവിച്ച ശക്തികള്‍ ആണ്. പക്ഷെ തിരിച്ചറിവ് എന്ന ശക്തി എല്ലാ ജീവികളിലും വ്യത്യസ്തമാണ്. ഞാൻ ഏതൊരു സൃഷ്ടിയെ സൃഷ്ടിച്ച് പൂര്‍ത്തിയാക്കിയാലും ആ സൃഷ്ടികള്‍ എന്നില്‍ നിന്നും പിരിയും. അങ്ങനെ പിരിഞ്ഞ ശേഷം, ആ ജീവിയുടെ തിരിച്ചറിവിന്റെ സ്വഭാവം ആസ്പദമാക്കി മാത്രമാണ് അതിന്റെ ശക്തി പരിണാമം പ്രാപിക്കുകയുള്ളു. അതാണ് ഉന്നത നിയതി…..
ഞാൻ ആദിയും അന്ത്യവും ആണ്. എന്റെ ഇച്ഛാശക്തി എല്ലാ ഇടത്തും വ്യാപിച്ചു കിടക്കുന്നു. എന്റെ സ്പര്‍ശനം തിരിച്ചറിയാൻ കഴിയുന്നവര്‍ക്ക് മാത്രമേ എന്റെ ഇഛാശക്തിയിൽ നിന്നും സൃഷ്ടിക്കപ്പെടുന്ന ശുദ്ധമായ ശക്തിയെ എനിക്ക് പകര്‍ന്നു കൊടുക്കാന്‍ കഴിയുകയുള്ളു. ഞാൻ നേരത്തെ പറഞ്ഞത് പോലെ പ്രപഞ്ച ശക്തികളുടെ സ്പര്‍ശനം ഉള്ളവര്‍ക്ക് മാത്രമേ എന്റെ സ്പര്‍ശനം തിരിച്ചറിയാൻ കഴിയുകയുള്ളു. അതുകൊണ്ടാണ് പ്രപഞ്ച ശക്തികളുടെ ശക്തി ഇല്ലാത്ത മെറോഹ്റിയസ് എന്റെ സ്പര്‍ശനതെ തിരിച്ചറിയാതെ പോയതും. പക്ഷേ എന്റെ സ്പര്‍ശനം തിരിച്ചറിയുന്ന ശക്തികള്‍ ആഗ്രഹിക്കുന്ന വരദാനങ്ങൾ പ്രദാനം ചെയ്യാതിരിക്കാനും എനിക്ക് കഴിയില്ല.
കൂടാതെ പ്രധാനമായി, ഏതൊരു ശക്തിയുടെയും നാശത്തിന്റെ കാരണമായി എനിക്ക് മാറാനും കഴിയില്ല.

പിന്നേ ഏതൊരു ജീവി സ്വയം നശിച്ചാലും, ഒരു ശക്തി വേറൊരു ശക്തിയെ നശിപ്പിച്ചാലും — എല്ലാ ശക്തികളും എന്നിലേക്ക് തന്നെ മടങ്ങും. ഏതൊരു ശക്തിയെയും നശിപ്പിക്കാനുള്ള ഭാവനയും ഉപദേശങ്ങളും ഞാൻ ആര്‍ക്കും നല്‍കില്ല….. ഞാനായിട്ട് ഒരു ശക്തിയെയും നശിപ്പിക്കുകയുമില്ല.
അവരവർ ചെയ്യുന്നതിന്റെ ഫലം അവരവര്‍ തന്നെ അനുഭവിക്കണം. അവരവര്‍ ചെയ്യുന്ന ക്രിയകള്‍ക്ക് അവരവര്‍ തന്നെ പരിഹാരം കാണുകയും വേണം. അവരവര്‍ തുടങ്ങുന്ന എന്തും അവരവര്‍ തന്നെ അവസാനിപ്പിക്കുകയും വേണം — അതാണ് ഉന്നത നിയതി.” അത്രയും പറഞ്ഞിട്ട് ആ മഞ്ഞു രൂപം മൗനമായി നിന്നു.

“ലോകങ്ങള്‍ നശിച്ചാലും, പ്രപഞ്ചം നശിച്ചാലും നിങ്ങള്‍ക്ക് ഒന്നുമില്ല എന്ന് എന്നെ ബോധ്യമാക്കിയ സ്ഥിതിക്ക് —മറ്റുള്ള ശക്തികളുടെ കാര്യത്തിൽ നിങ്ങൾ ഇടപെട്ടില്ല എന്ന് എന്നോട് പറഞ്ഞ സ്ഥിതിക്ക് — അപ്പോ പിന്നെ ഒന്‍പതാം ദിവസം ലോകവേന്തൻ ഉണരുമെന്ന് എന്നെ കാണിക്കേണ്ട എന്ത് ആവശ്യമാണ് നിങ്ങള്‍ക്ക് ഉണ്ടായിരുന്നത്?” ഞാൻ നിരസത്തോടെ ചോദിച്ചു.

“ഒന്നും തന്നെ ചോദിക്കാതെ ലഭിക്കുകയില്ല….” ഉന്നത ശക്തി പറഞ്ഞു “നി പോലും അറിയാതെ നിന്റെ ആന്തരിക മനസ്സ് ലോകവേന്തൻ ഉണരുന്നതിനെ കുറിച്ച് എന്നോട് ചോദിച്ചത്‌ കൊണ്ട് മാത്രമാണ് അതിന്റെ ഉത്തരം നിനക്ക് ഞാൻ കാണിച്ചു തന്നത്.
എനിക്ക് സംസാരിക്കാന്‍ കഴിയില്ലേ എന്ന് എന്നോട് ചോദിച്ച നീയാണ് നമ്മൾ തമ്മിലുള്ള ഈ സംഭാഷണത്തിന് തുടക്കം കുറിച്ചതെന്നും മനസ്സിലാക്കുക.” ഉന്നത ശക്തി വിശദമാക്കി.

ഉന്നത ശക്തിയോട് കുറച്ച് നേരം കൂടി സംഭാഷണം തുടര്‍ന്നാല്‍ എനിക്ക് ഭ്രാന്ത് പിടിക്കുമെന്ന് തോന്നി.
അതോ… ഇപ്പഴേ ഞാൻ ഭ്രാന്തനായി മാറി കഴിഞ്ഞോ എന്നും ഞാൻ സംശയിച്ചു.

“അപ്പോ നിങ്ങളുടെ ഇച്ഛാശക്തിയില്‍ നിന്നും സൃഷ്ടിക്കപ്പെടുന്ന ശക്തിയും, നിങ്ങളുടെ ശബ്ദത്തില്‍ നിന്നും സൃഷ്ടിക്കപ്പെടുന്ന ശക്തിയും — രണ്ടും രണ്ട് ശക്തികള്‍ ആണോ?” ഞാൻ ചോദിച്ചു.

“അതേ, അത് രണ്ടും രണ്ട് തരം ശക്തികളാണ്.”

“എന്തുകൊണ്ട്‌ അങ്ങനെ രണ്ട് തരം ശക്തികള്‍……?”