ഒരു ബാംഗ്ലൂർ വാരാന്ത്യം 11

Author :Santhosh Nair

[ Previous Part ]

 

അവസാന ഭാഗത്തിലേക്ക് (പതിനൊന്ന് – 11) സ്വാഗതം. വായിച്ചുപോയവർക്കും, പ്രത്യേകിച്ചും – like തന്നവർക്കും, കമൻറ്സ് ഇട്ടവർക്കും എല്ലാം നന്ദി.  കഥ വിചാരിച്ചതിലും കൂടുതൽ വലിച്ചു നീട്ടപ്പെട്ടു, പല സംഭവങ്ങളും ഓരോന്നോരാന്നായി ഒഴുകി വന്നുകൊണ്ടിരുന്നു, ഒഴിവാക്കാനും പറ്റിയില്ല.

————

മനസ്സ് വീണ്ടും അസ്വസ്ഥം ആകുന്നു. രണ്ടു പ്രശ്നങ്ങൾ മുമ്പിലുണ്ട്. എങ്ങനെ അവ പരിഹരിക്കും എന്ന ചിന്ത വേറെ. കുറെ വൈകിയാണെങ്കിലും നിദ്രാദേവി എന്നെ അനുഗ്രഹിച്ചു.  പക്ഷെ ഞാനറിഞ്ഞില്ല – അറിയാൻ പോകുന്ന ചില സത്യങ്ങളും വരാൻ പോകുന്ന സംഭവങ്ങളും എന്റെ പല വിശ്വാസങ്ങളെയും ആട്ടിയുലയ്ക്കാൻ പര്യാപ്തമാണെന്ന്.

തുടർന്ന് വായിക്കൂ ——-

കുറച്ചു നേരത്തിനുള്ളിൽ തന്നെ അടുത്ത മുറിയിൽ നിന്നും കൂർക്കം വലികൾ ഉയർന്നു, ക്ഷീണം കാരണം മൂന്നു പേരും ഉറങ്ങിപ്പോയിയെന്നു തോന്നുന്നു.

എന്റെ ഫോൺ ബെല്ലടിച്ചു. നോക്കുമ്പോൾ ശ്രീയാണ്. “എന്താണേട്ടാ, തിരക്കൊഴിഞ്ഞില്ലേ? എന്നോടെന്തെങ്കിലും പിണക്കമാണോ? വിളിക്കുന്നതേയില്ല. എന്തോ എനിക്ക് മനസ്സിൽ ഭയങ്കര സങ്കടം  തോന്നുന്നു.എന്തോ പ്രശ്നങ്ങൾ ഉണ്ടാകാൻ പോകുന്നുവെന്ന് തോന്നുന്നു. ക്ഷമിക്കണേ, ഉറക്കം വരുന്നില്ല, അതുകൊണ്ടാണ് വിളിച്ചത്. ആ പാട്ട് ഒന്ന് പാടുമോ, Please ഏട്ടാ”

“എന്താണ് ശ്രീ രാത്രിയിൽ വിളിച്ചു പാട്ടുപാടാൻ പറയുന്നത്? എന്താ ഉറക്കം വരാത്തെ?  പകൽ മുഴുവൻ കിടന്ന് ഉറങ്ങിയിട്ട് ഇപ്പോൾ ഉറക്കം വരുന്നില്ലേ?” എനിക്കു ചിരിയാണ് വന്നത്.  ഞാൻ കതകു തുറന്നു വെളിയിലേക്ക് ഇറങ്ങി.

“പോ ഏട്ടാ, ഐ ലവ് യു, അതുകൊണ്ടല്ലേ?” അവൾ ചിണുങ്ങി. പെണ്ണിനീയിടെ അല്പം കൊഞ്ചലും ഉണ്ട്.

“എന്നു പറഞ്ഞു പത്തുമണിക്കാണോടീ വിളിച്ചു പാട്ടു പാടാൻ പറയുന്നേ? ശരി. കളിപ്പാട്ടത്തിലെ പാട്ടു പാടട്ടെ?” എന്നു കപട ദേഷ്യത്തിൽ പറഞ്ഞിട്ടു പാടാൻ തുടങ്ങി

“കളിപ്പാട്ടമായ് കണ്മണീ നിന്റെ മുന്നിൽ, മനോവീണ മീട്ടുന്നു ഞാൻ”. ആ പാട്ടു എനിക്ക് വളരെ ഇഷ്ടമാണ്. ലാലേട്ടന്റെ വേണു എന്ന കഥാപാത്രം ഒരു നൊമ്പരമാണ്.

“എന്റെ മുന്നിൽ എന്റെ ഏട്ടൻ കളിപ്പാട്ടമൊന്നും ആകേണ്ട, കേട്ടോ. ഇനി ഉറങ്ങിക്കോളൂ” അവൾ ചിരിച്ചുകൊണ്ട് പറഞ്ഞു.

“ശരി എന്റെ പെണ്ണെ, നിന്റെ അതിവിശാലമായ മനസ്സിന് വളരെ നന്ദി. ശുഭ രാത്രി നേരുന്നു.” സംഭാഷണം അവസാനിപ്പിച്ചപ്പോൾ എനിക്ക് ഉറക്കം വരാൻ തുടങ്ങി. (ശ്രീയുടെ ഒരു പവറേ).

നന്നായി ഉറങ്ങി. ഉണര്ന്നപ്പോൾ രാവിലെ ആറുമണിയായി.  ഇടക്കൊന്നും ഉണര്ന്നതേയില്ല (sound sleep എന്ന് പേര് വേറെ. സായിപ്പ് തെറ്റായിട്ടാണ് പേരിടുന്നത്. Soundless sleep എന്ന് പേര് മാറ്റാൻ ഓക്സ്‌ഫോർഡ് ഡിക്ഷണറിക്കാർക്ക് ഒരു കത്തയയ്ക്കുന്നുണ്ട്).