എന്റെ ബാല്യകാല സ്മരണകൾ… [മേനോൻ കുട്ടി] 52

അങ്ങിനെ ഒരുവിധം പാത്തും പതുങ്ങിയും ബാത്‌റൂമിന്റെ വാതിൽക്കൽ എത്തിയലാവും ചെവിൽ പിടിവീഴുന്നത്… പിന്നെ കാര്യങ്ങൾക്ക് ഒക്കെ ഒരു തീരുമാനം ആകും… സാരോപദേശവും കൈ സഹായവും ഒക്കെ മുറയ്ക്ക് നടക്കും…ഒടുവിൽ ഇനി കളിക്കാൻ പോയിട്ട് കുളിക്കാൻ പോലും പുറത്തേക്ക് ഇറങ്ങൂല എന്നുള്ള ഉഗ്ര ശപതം എടുത്തിട്ടാവും അമ്മച്ചി ഒന്ന് കൂൾ ആകുന്നത്. സംഗതി അങ്ങിനെയൊക്കെ സത്യം ചെയ്ത് കൊടുത്താലും പിറ്റേന്ന് പിള്ളേര് വന്നു വിളിച്ചാൽ കൂടെ ഇറങ്ങി പോകും എന്നത് വേറെ കാര്യം അത് പുള്ളിക്കാരിക്കും അറിയാം…എന്നാലും ചുമ്മാ അങ്ങിനെ ബിൽഡപ്പ് കളയാൻ പറ്റൂലല്ലോ…അമ്മച്ചി ആരാ മോൾ…
പക്ഷെ അന്ന് അതൊക്ക വെറും സമയംകൊല്ലി കളികളും തമാശകളും ആയിരുന്നെങ്കിൽ…ഇന്നത് പലപ്പോഴും ഇനിയൊരിക്കലും ജീവിതത്തിൽ തിരിച്ചു കിട്ടാത്ത മധുരമുള്ള ഓർമ്മകൾ മാത്രമായി അവശേഷിക്കുന്നു.

മാവ് പൂക്കുന്ന കാലമായാൽ പിന്നെ മാവിൻ ചുവട്ടിൽ ആയിരിക്കും കളിയും മറ്റു കലാ പരുപാടികളും.
സ്വന്തം പറമ്പിൽ അല്ലാട്ടോ…അല്ലേലും ആരാന്റെ പറമ്പിൽ കയറി കട്ട് തിന്നുന്നതിന്റെ ആ സുഖം അതൊന്ന് വേറെ തന്നെ അല്ലെ…??? ഞാനീ പറഞ്ഞത് പണ്ട് കൂട്ടുകാരനെ ക്ഷണിച്ചിട്ടുണ്ടെന്ന പേരും പറഞ്ഞു ബിരിയാണി കല്യാണം കൂടാൻ പോയവർക്ക് മനസിലായിക്കാണും…തതെ സംഭവം അതെന്നെ!
നമ്മുടെ മാങ്ങാ കുട്ടന്റെ ഓരോ വളർച്ചക്കും കാവൽ ആയി ഞങ്ങൾ കുട്ടിപ്പട്ടാളം എന്നും കൂടെ ഉണ്ടാകും. അതൊന്ന് വലുതായിക്കിട്ടാൻ വഴിവാട് വരെ നടത്തും…
പക്ഷെ അയിന്റെ സൗകര്യത്തിനല്ലേ അത് വലുതാകു…ഒടുക്കം ക്ഷമക്കെട്ട് കണ്ണിമാങ്ങ പൊട്ടിച്ചു തിന്ന് കൊതിയടക്കും, പാവം ഞങ്ങൾ!
ഒടുക്കം വലുതായി കിട്ടിയാലോ പിന്നെ എറിഞ്ഞു വീഴ്ത്താൻ കൂട്ടത്തിൽ ആർക്കാണ് കൂടുതൽ ഉന്നം എന്നുനോക്കുന്നതിനുള്ള പരീക്ഷണമത്സരം തുടങ്ങുകയായി….നമ്മുക്ക് പിന്നെ അന്നും ഇന്നും കൂടുതൽ ഉന്നം ഇല്ലാത്തോണ്ട് ആരുടെയെങ്കിലും ഏറു കോണ്ട് വീണ് കിട്ടിയാൽ അത് ലാഭം എന്ന മൈൻഡ് ആണ്…ഏങ്കിലും സമ്മതിച്ചുകൊടുക്കാൻ മേലാത്തോണ്ട് കുറെ ജനലിന്റെ ഗ്ലാസും ഓടും പൊട്ടിച്ചു നാട്ടുകാരുടെ വീട്ടുകാരുടെയും തെറിയും കേട്ട് തല്ലും കൊണ്ട് ആശ്വാസം കണ്ടെത്തും…നമ്മളെകൊണ്ട് അത്രയൊക്കെ പറ്റു…അല്ലപിന്നെ!
എറിഞ്ഞുവീഴ്ത്താൻ പറ്റാത്തോണ്ടും വീട് അടുത്തായിരുന്നത് കൊണ്ടും ടൗച്ചിങ്‌സ് ഞാനായിരുന്നു മിക്കവാറും സ്പോസർ ചെയ്തിരുന്നത്…ടച്ചിങ്‌സ് എന്ന് വച്ചാൽ…അതെന്നെ ഉപ്പും മുളകുപൊടിയും മിക്സ് ചെയ്ത സാധനം, പച്ചമാങ്ങാ ടച്ചിങ്‌സ്…
ഞെട്ടി ചുണ മതിലിൽ ഉറച്ചുകളഞ്ഞു ഇടിച്ചുപൊട്ടിച്ച പച്ചമാങ്ങയുടെ കഷ്ണം ആ മിക്സിൽ മുക്കി
തിന്നുമ്പോൾ കിട്ടുന്ന ആ രുചി…ഹോ…

“എന്റെ സാറെ ചുറ്റുള്ളതൊന്നും കാണാൻ പറ്റൂല”

എന്ന് ആരോ ഏതോ സിനിമയിൽ പറഞ്ഞതുപോലെ ആണ്…
ഇപ്പോഴും അതൊക്കെ ഓർത്താൽ വായിൽ വെറും കപ്പൽ അല്ല ടൈറ്റാനിക് വരെ ഓടും!
ഒടുക്കം പച്ചമാങ്ങയും ഉപ്പും തിന്നു പച്ചവെള്ളവും കുടിച്ച് അന്നുമുഴുവൻ ബാത്ത് റൂം അടക്കി ഭരിച്ചിരുന്ന ആ കാലം ഓർക്കുമ്പോ തന്നെ എന്തൊരു കുളിരാ…
അനുഭവമുള്ളോർക്ക് അറിയാം.