എന്റെ ബാല്യകാല സ്മരണകൾ… [മേനോൻ കുട്ടി] 52

ഒരുപാട് ബന്ധുക്കളും കുടുബക്കാരും വിരുന്നുകാരായി ഉണ്ടാകും, കഴിക്കാൻ ഉത്സവ വാണിഭത്തിൽ നിന്നും വാങ്ങി കൊണ്ടുവരുന്ന പലഹങ്ങളായ ഹലുവ, ജിലേബി, പൊരി, മുറുക്ക് എന്നിവ യഥേഷ്ടം ഉണ്ടാകും, ഉച്ചക്ക് ഇറച്ചിയും മീനുമൊക്കെ ആയിരിക്കും ചോറിന്, വൈകീട്ട് ഉത്സവ പറമ്പുകളിൽ പോകുമ്പോൾ അച്ഛനോട് മത്തങ്ങാ ബലൂണുകൾക്കും കളർ മിട്ടായികൾക്കും വേണ്ടി വാശിപിടിച്ചതും, അച്ഛന്റെ കൈപിടിച്ചു നടന്നുകൊണ്ട് ഉത്സവ വരവുകളും വെടിക്കെട്ടുകളും കണ്ടതും, തിരിച്ചു വീട്ടിലെത്തും മുമ്പ് വഴിവക്കിലെ മുള്ള് വേലിയിൽ കുരുങ്ങി ബലൂണുകൾ പൊട്ടിയപ്പോൾ വാവിട്ട് കരഞ്ഞതും, കളർ മിട്ടായികൾ കഴിച്ച് ചുണ്ടും നാവും ചുവപ്പിച്ച് കൂട്ടുകാരെ കാണിച്ചുകൊണ്ട് അത്ഭുപെടുത്തിയതും, തെര പടക്കം വാങ്ങി കല്ലിൽ മുട്ടി പൊട്ടിച്ചതുമെല്ലാം അന്നത്തെ ഉത്സവകാല ഓർമകളാണ്.അന്ന് പിള്ളേര് എല്ലാരും കൂടുമ്പോൾ പഴകിയ റബ്ബർ ചെരുപ്പ് വെട്ടിയും ഉജാലകുപ്പി മുറിച്ചും ഉന്തു വണ്ടികൾ ഉണ്ടാക്കി ഉരുട്ടികളിച്ചു നടന്നതും, പാസ്റ്റിക് കവറ് ചുരുട്ടി റബ്ബർബാന്റ് ഇട്ട് ഏറു പന്ത്‌ ഉണ്ടാക്കി പരസ്പരം എറിഞ്ഞുകളിച്ചതും, പച്ച മടൽ വെട്ടി ഉണ്ടാക്കിയ ക്രിക്കറ്റ്‌ ബാറ്റ് കൊണ്ട് പാടത്തു ക്രിക്കറ്റ് കളിച്ചു രസിച്ചതുമെല്ലാം ഇന്നലെ കഴിഞ്ഞതുപോലെ മനസ്സിൽ തെളിഞ്ഞു കിടപ്പുണ്ട്…ഓർക്കാൻ സുഖമുള്ള കാഴ്ച്ചക്ക് നനവുള്ള ഓർമകളായി…

പിന്നെ ഓർമ്മയിലെത്തുന്നത് അന്നത്തെ മഴ കാലമാണ്. മഴ വളരെ ഇഷ്ടമായിരുന്നു അന്നെനിക്ക്. ഇന്നും അങ്ങിനെ തന്നെ…എന്നും മഴ പെയ്യണെ എന്നാണ് ദിവസവും പ്രാര്‍ത്ഥന. എന്തിനാണ് എന്നറിയണ്ടേ…?
മഴ വെള്ളത്തില്‍ കൂട്ടുകാരുമൊത്ത് കളിയ്ക്കാന്‍. കളി എന്ന് പറഞ്ഞാൽ അസ്സൽ പന്ത് കളി, അതും മഴവെള്ളം നിറഞ്ഞു നടക്കാൻ പോലും ബുദ്ധിമുട്ടുന്ന പാടത്തിനു ( വയൽ )നടുവിൽ. സ്കൂൾ വിട്ട് വന്നാൽ ഡ്രസ്സ്‌ പോലും മാറാൻ നിൽക്കാതെ നേരെ ഓടും പാടത്തേക്ക്. അപ്പോൾ കാണാം മഴവെള്ളം ഉയർന്ന് പാടവരമ്പ് കവിഞ്ഞ് ഏകദേശം പുഴപോലെ ആയിട്ടുണ്ടാകും അവിടം. പിന്നെ ഒന്നും നോക്കില്ല ഉടനെ എല്ലാരും കൂടി ചാടി ഇറങ്ങും കണ്ണിൽ കുത്തുന്ന ചാറ്റൽ മഴയെ പോലും അവഗണിച്ചുകൊണ്ട്.
അന്ന് ഞങ്ങള്‍ 5,8 പേർ ഉണ്ടായിരുന്നു. പലപ്പോഴും പന്തിനു പകരം വെള്ളത്തുള്ളികൾ ആയിരിക്കും ഗോൾപോസ്റ്റ് നിറക്കുക. അതിനൊപ്പം ചളിയിൽ കൂടെ പന്തിനായുള്ള ഓട്ടം പലപ്പോഴും ചന്തി കുത്തിയുള്ള വീഴ്ചയിൽ ആയിരിക്കും പരിണമിക്കുക. ഏങ്കിലും കൂടുതൽ ആവേശത്തോടെ മൂടും തടിവി, “ദിലീപേട്ടൻ പറഞ്ഞതുപോലെ വിടില്ല ഞാൻ…വിടില്ല” എന്നുള്ള ഡയലോഗും അടിച്ച് വീണ്ടും പാച്ചിൽ തുടങ്ങും അങ്ങിനെ വെള്ളത്തിലെ കളിയും കുളിയും കഴിഞ്ഞു ആകെ നനഞ്ഞു ചെളിയും പുരണ്ടു നടുവും പൊക്കിപിടിച്ചുകൊണ്ട് വീട്ടില്ലെത്തിയാൽ പിന്നെ വീടിന്റെ ഉള്ളെലേക്ക് എത്തിപ്പെടൽ ആണ് കഷ്ടം. റിസർവ് ബാങ്ക് കൊള്ളയടിക്കാൻ പോലും ഇത്രയും റിസ്ക് ഉണ്ടായിരിക്കില്ല. കാര്യം പറയണ്ടല്ലോ…,
മകൻ അദ്ധ്വാനിച്ച് ക്ഷീണിച്ച് വരുവല്ലേ…അവന് കാര്യമായി വല്ലോം കൊടുക്കണ്ടേ…???

”എന്തൊരു സ്നേഹമുള്ള അമ്മച്ചി…!!!”