അമ്മു [ നൗഫു കിസ്മത് ] 4905

അമ്മയുടെ ആങ്ങളയുടെ ഒരേ ഒരു കണ്മണി ആയിരുന്നവൾ… ഒരു നാട്ടിൻപുറത്തുകാരി… ഒരു കിലുക്കാംപെട്ടി…

കലപില കൂടിയുള്ള അവളുടെ ആ സംസാരം തന്നെയായിരുന്നു എന്നെ അവളിൽ അടുപ്പിച്ചത്….

കുട്ടികാലം തൊട്ടു ഒന്നിച്ചു കളിച്ചു വളര്‍ന്നതാണേലും ഒരിക്കലും അവളോട് എനിക്ക് പ്രണയം എന്ന വികാരം തോന്നിയിട്ടില്ല…

കാരണം എന്റെ സങ്കല്പം അവളിൽ ഒരു തരിമ്പിലും ഇല്ലെന്നതാണ്….

കാലത്തിനൊപ്പം സഞ്ചരിക്കുന്ന ഒരു പക്വതയാർണ അത്യാവശ്യം ഒരു പരിഷ്കാരി പെണ്കുട്ടിയായിരുന്നു എന്റെ മനസിലെ എന്റെ ഭാര്യ…

അതിനു വിപരീതം തന്നെയായിരുന്നു അവൾ.

ഉപരിപഠനത്തിനായി ഞാൻ ബാംഗ്ലൂര് നഗരത്തിലേക്ക് ചേക്കേറിയ അന്നുതോട്ടായിരുന്നു എന്റെ ജീവിതത്തിലെ താളപിഴകൾക്കു തുടക്കം കുറിക്കുന്നത്…

ചെറുപ്പത്തിലേ അച്ഛൻ മരിച്ച എനിക്കും അമ്മയ്ക്കും എന്നും താങ്ങും തണലും ആയിരുന്നത് അമ്മാവനായിരുന്നു… എന്റെ പഠിപ്പും ചിലവും എല്ലാം വഹിച്ചിരുന്നതും അദ്ദേഹം തന്നെയായിരുന്നു….

നന്നായി പഠിച്ചിരുന്ന എന്നെ മെഡിസിൻ എടുക്കാൻ നിര്ബന്ധിച്ചതും അതിനായി കാശുമുടക്കിയതും അദ്ദേഹത്തിലെ നന്മയായി ഞാൻ കണ്ടെങ്കിലും അതിനു പിന്നിൽ ചേതോവികാരം പിന്നീടാണെനിക് മനസിലായത്….