അപരാജിതൻ -48 5665

അതിൽ മേൽഭാഗം തുറന്ന ജീപ്പിൽ  വെള്ളജുബ്ബയും ദോത്തിയും ധരിച്ച് ഇടതു വശത്ത് ഇരുന്നു തിമ്മയ്യൻ വരികയുണ്ടായി.

തിമ്മയ്യന്റെ ജീപ്പിനു മുന്നിലായി പോലീസ് ജീപ്പിൽ വെക്കുന്ന സൈറൺ വെച്ചിരുന്നു.

അയാൾ വരുമ്പോൾ സൈറൺ മുഴങ്ങികൊണ്ടിരുന്നു.

ജീപ്പിനു ഉള്ളിലും പിറകെ വരുന്ന രണ്ടു ജീപ്പുകൾക്കുള്ളിലും വാക്കത്തിയും അരിവാളും നാടൻതോക്കും പിടിച്ചു അയാളുടെ അംഗരക്ഷകന്മാരു മുണ്ടായിരുന്നു. കച്ചവടക്കാർ എഴുന്നേറ്റ് അയാളെ നോക്കി കൈകൂപ്പുന്നുണ്ടായിരുന്നു.

തിമ്മയ്യൻ ജീപ്പിൽ നിന്നും ഇറങ്ങിയ പാടെ, ഓഫീസിലേക്ക് കയറും മുൻപ് ചന്തയുടെ കിഴക്കേ കോണിൽ ഉയർത്തിയ തിമ്മയ്യന്റെ പിതാവ് ദൊപ്പയ്യയുടെ പൂർണ്ണകായ പ്രതിമയ്ക്ക് മുന്നിൽ വന്നു നിന്നു,

പ്രതിമയ്ക്ക് മുന്നിൽ നമസ്‌ക്കരിച്ച്, ഒരു കങ്കാണി കൊണ്ട് നൽകിയ ജമന്തി മാല പിതാവിന്റെ പൂർണ്ണകായ പ്രതിമയിൽ അണിയിച്ചു വീണ്ടും നമസ്കരിച്ചു, ആ പ്രതിമയ്ക്ക് മുന്നിലെ കല്ലിൽ ഒത്തയൊരു നാളികേരം അടിച്ചുടച്ചു ഓഫീസിലേക്ക് നടന്നു.

ഓഫിസിൽ എത്തിയ അയാൾ, ചാരുകസേരയിൽ ഇരുന്നു കാൽഉയർത്തി വെച്ചു.

എല്ലാം കണ്ടു ആവേശം കയറിയ ആദി ശിരസ് ഇടം വലമാട്ടി മുടിചിതറിപ്പിച്ചു കൈ കൊണ്ട് മാടി,  പോക്കറ്റിൽ നിന്നും ഒരു റബർ ബാൻഡ്  എടുത്ത് പിന്നിൽ മുടി ചേർത്ത് കെട്ടി, നന്നായി വലിച്ചു പുകയൂതി ചുരുട്ട് എറിഞ്ഞു കളഞ്ഞു, കൈവിരലുകൾ പിണച്ചു വലിച്ചു നിവർത്തി കൈകൾ രണ്ടും കറക്കി അവിടെ നിന്നും ഇറങ്ങി നടന്നു.

നടക്കും വഴി ,

ഒരു മരകടക്കരികിൽ ഇട്ടിരുന്ന തടികസേരയും കൈയ്യിൽ പിടിച്ചവൻ കൊക്കത്തറയിലേക്ക് നടന്നു.

കൊക്കത്തറയിൽ എത്തിയ അവൻ ആ തടികസേര അവിടെയങ്ങിട്ടു.

അതിൽ കാലിൽ കാൽ കയറ്റി വെച്ചിരുന്നു,

എല്ലാവരും അവനെന്താണ് ഉദ്ദേശിക്കുന്നത് എന്ന് വ്യക്തമാകാതെ അവനെ സംശയത്തോടെ നോക്കിയിരുന്നു.

@@@@@

ചന്തയുടെ ഉയർന്ന ഗോപുരത്തിലുള്ള വലിയ ഘടികാരത്തിൽ സൂചി പതിനൊന്നിൽ എത്തി.

അന്നേരം പതിനൊന്നു മണിനാദം മുഴങ്ങി.

മുപ്പതു നാൽപ്പതു ഡിഗ്രി ചരിവിൽ നിൽക്കുന്ന  സൂര്യനെ നോക്കി ആദി ചിരിച്ചു.

സൂര്യൻ ശിരസ്സിനു മുകളിൽ തീക്ഷണതയോടെ നിൽക്കുമ്പോൾ താൻ തീരുമാനിച്ചത് നടന്നിരിക്കണമെന്നു അവനു നിർബന്ധമുണ്ടായിരുന്നു.