യക്ഷി 2 [അപ്പു] 304

“ടാ ചെക്കാ എഴുന്നേൽക്ക്… എത്ര നേരായി വിളിക്കുന്നു… മണി 11 ആയി… നിനക്ക് കഴിക്കാനൊന്നും വേണ്ടേ..??” നല്ല ഉറക്കത്തിലായിരുന്ന അവനെ ഇന്ദു കുലുക്കിവിളിച്ചു

‘തറവാട്ടിലായാലും വീട്ടിലായാലും അമ്മ അമ്മതന്നെ ഉറങ്ങാൻ സമ്മതിക്കില്ലല്ലോ’ എന്ന് മനസ്സിൽ പറഞ്ഞ് അക്ഷയ് പതിയെ കഷ്ടപ്പെട്ട് എഴുന്നേറ്റു…

“ദാ പോയി പല്ലുതേക്ക്… എല്ലാവരും കഴിച്ചുകഴിഞ്ഞു ആരും കാണണ്ട ഈ സമയത്ത് പല്ലുതേക്കുന്നത്….പോത്തുപോലെ വളർന്നു എന്നിട്ടെന്താ കാര്യം..!!

എന്തൊക്കെയോ പിറുപിറുത്ത് അവന്റെ കയ്യിൽ ബ്രഷും എടുത്ത് കൊടുത്ത് അവൾ പുറത്തേക്ക് പോയി… അവൻ ഉറക്കച്ചടവിൽ തന്നെ എഴുന്നേറ്റ് പ്രാഥമികകൃത്യങ്ങളെല്ലാം കഴിച്ചു…

വൈകി എഴുന്നേറ്റതുകൊണ്ട് നല്ല വിശപ്പുണ്ടായിരുന്നു അവന്… താഴെ ഭക്ഷണം കഴിക്കാൻ ചെന്നപ്പോൾ അവൻ മാത്രമേയുളളു… ബാക്കി എല്ലാവരും കഴിച്ചു പോയി… എന്തെങ്കിലും ആവട്ടെയെന്ന് കരുതി അവൻ കഴിക്കാനിരുന്നു…. അധികം അംഗങ്ങൾ ഉള്ളതുകൊണ്ട് വിശാലമാണ് അവിടത്തെ ഊണ് മേശ …. എപ്പോഴും അതിനുമുകളിൽ എന്തെങ്കിലും കഴിക്കാനുണ്ടാവും…. അവൻ ഇന്ദു വിളമ്പിയ ദോശ കഴിച്ചു തുടങ്ങി

“എന്താടാ ഇന്നലെയും പോയോ യക്ഷിക്കാവിൽ….??” കഴിച്ചുതുടങ്ങിയതും അനുപമയും നിരുപമയും അവനടുത്ത് വന്നു…

“നിങ്ങളെ ഒന്നിച്ച് പെറ്റതാണോ സയാമീസ് ഇരട്ടകളെപ്പോലെ എപ്പോഴും ഒന്നിച്ചാണല്ലോ…??” അവരെയൊന്ന് നോക്കി കളിയാക്കിക്കൊണ്ട് അവൻ തിരിച്ച് പറഞ്ഞു…

“പോടാ ചെക്കാ…!!” നിരുപമ അവന്റെ തലക്ക് ഒരു കിഴുക്ക് കൊടുത്ത് പറഞ്ഞു… അപ്പു അത് ശ്രദ്ധിക്കാതെ വീണ്ടും കഴിച്ചുതുടങ്ങി…

“ഇന്നലെ ഇവൾ എന്റടുത്തുവന്നു പറഞ്ഞത് നീ വല്യ ധൈര്യശാലി ആണെന്നൊക്കെയാ… ഞാൻ വിചാരിച്ചു ഇന്നലെയും യക്ഷിക്കാവിലേക്ക് പോയിക്കാണുംന്ന്.. പക്ഷെ ഇത് ഇന്നലെ അച്ഛൻ പറഞ്ഞത് കേട്ടിട്ട് ഒരു പേടിച്ച് കിടന്നുറങ്ങിയ ഒരു പേടിത്തൊണ്ടൻ ചെക്കനാണല്ലോടി…!” പകുതി അപ്പുവിനോടും പകുതി നിരുപമയോടുമായി അനുപമ പറഞ്ഞു….. അനുപമക്ക് ഇടക്ക് ഇങ്ങനെ ചൊറിയുന്ന സ്വഭാവുള്ളതുകൊണ്ട് അവനത് കാര്യമാക്കിയില്ല…