യക്ഷി [Appu] 249

അവൻ മുറ്റത്തേക്ക് ചെന്നു… മുറ്റത്തെ പണിക്കാരെയും അവരുടെ പണികളും നോക്കിയെന്നപോലെ പിന്നിൽ കൈകെട്ടി നിൽക്കുകയായിരുന്നു ഇന്ദ്രജിത്….

“നീ എന്തേലും കഴിച്ചോ..??” അക്ഷയ് പിന്നിലെത്തിയതും തിരിഞ്ഞുപോലും നോക്കാതെ അയാൾ ചോദിച്ചു….

“ഇല്ല വിശക്കുന്നില്ല….!!” അവൻ മറുപടി പറഞ്ഞു…

അയാൾ പതിയെ തിരിഞ്ഞ് അവനെ നോക്കി അവന്റെ അടുത്ത് വന്നു തോളിൽ കയ്യിട്ട് മുറ്റത്തേക്ക് നടന്നു…..

“അപ്പൂ…..!! കഥകൾ അന്വേഷിച്ച് പോവുന്ന പ്രകൃതമാണ് നിന്റേതെന്ന് എനിക്കറിയാം പക്ഷെ യക്ഷികഥകളൊന്നും കെട്ടുകഥകളല്ല സത്യമാണ്.. പക്ഷെ ഒരിക്കലും അതിനെ അന്വേഷിച്ച് പോകരുത് പോയാൽ അതിൽ നിന്നൊരു തിരിച്ചുപോക്കില്ല…. ” അയാൾ ദൂരേക്ക് നോക്കി അവനോട് പറഞ്ഞു…

” എനിക്കും ജയനും പെണ്മക്കളാ ഈ കുടുംബം ഇനി വളരേണ്ടത് അവരിലൂടെയല്ല നിന്നിലൂടെയാണ്… നീയാണ് ഇവിടെ വേണ്ടത്… ആ നീ വീണ്ടും ഏട്ടന്റെ വഴിയേ പോവരുത്….!!” അയാൾ ഉള്ളിൽ വളരെ സങ്കടമുള്ളത് പോലെ പറഞ്ഞു…

“രാജീവ് അമ്മാവന് എന്താ സംഭവിച്ചത്….??” അവൻ ഇന്ദ്രജിത്തിനോട് ചോദിച്ചു

“യക്ഷി….. യക്ഷികഥകൾ… ഏട്ടനെ ചെറുപ്പം മുതലേ ഒരുപാട് ആകർഷിച്ചു അതെല്ലാം… അവളെ സ്നേഹിച്ചു, ആരാധിച്ചു,മനസ്സിൽ കൊണ്ടുനടന്നു… അവസാനം അവളുടെ കൈകൊണ്ട് തന്നെ മരണം സംഭവിച്ചു…!!”

അക്ഷയ് ഇന്ദ്രജിത്തിനെ തന്നെ നോക്കി കേട്ടുകൊണ്ടിരുന്നു

” ഇന്ന് നിന്റെ വഴിയും അതാണ്… പോവരുത് എന്ന് പറയാൻ മാത്രമേ പറ്റുള്ളൂ… നിന്റെ അച്ഛനും അമ്മയ്ക്കും ഞങ്ങൾക്കും നീ മാത്രമേ ഉള്ളു.. ഓർത്താൽ നിനക്ക് നന്ന്….!!”

അത്രയും പറഞ്ഞ് കൺനിറഞ്ഞ് ഒരു ചെറിയ പുഞ്ചിരി സമ്മാനിച്ച് ഇന്ദ്രജിത് മുന്നോട്ട് നടന്നു… അക്ഷയ് അവിടെ തന്നെ നിന്നു… അയാൾ അവസാനം പറഞ്ഞത് അവന്റെ നെഞ്ചിലാണ് കൊണ്ടത്… അമ്മ അച്ഛൻ ബാക്കിയുള്ളവർ.. രാജീവ്‌ അമ്മാവന്റെ പോലെ തന്റെ ജഡവും ഉമ്മറത്ത് കിടത്തുമ്പോൾ എന്താവും അവരുടെ അവസ്ഥ…. അവന്റെ ചിന്തകൾ കാടുകയറി….

“അപ്പൂ….!!” മുറിയിലെത്തി എന്തൊക്കെയോ ചിന്തിച്ചുകൊണ്ടിരിക്കുമ്പോഴാണ് നിരുപമ അങ്ങോട്ട് വന്നത്…

“കേറിവാ ചേച്ചി…!!” അവൻ ഒരു ചിരി സമ്മാനിച്ച് അവളെ അകത്തേക്ക് ക്ഷണിച്ചു…അവൾ അകത്തേക്ക് കയറി

“അനുചേച്ചി എവിടെ…??”

“അവൾ താഴെയിണ്ട് ഞാനിങ്ങ് പോന്നു…!!”

“ആഹ്…!!” വെറുതെ ഒരു മറുപടിയും കൊടുത്ത് അവൻ വീണ്ടും എന്തൊക്കെയോ ചിന്തയിലേക്ക് പോയി

“വല്യച്ചനെന്താ പറഞ്ഞത് നിന്നോട്….??” നിരുപമ ചോദിച്ചു..

“അത്.. ഇനീയെവിടെ പോവണ്ടാന്ന്…!!”

“വല്യച്ഛൻ പറയുന്നത് എന്തായാലും അത് അനുസരിക്കണം കേട്ടോ അപ്പൂ…. പ്രത്യകിച്ച് ഇക്കാര്യത്തിൽ…..!!”

“അതെന്താ ഇക്കാര്യത്തിൽ….??”

“വല്യച്ഛനെ എല്ലാവരും അനുസരിക്കുന്നതും ബഹുമാനിക്കുന്നതും വീട്ടിലെ കാരണാവരായതുകൊണ്ട് മാത്രമല്ല…!!”

“പിന്നെ..??”