വീട്ടിൽ നിന്ന് ഇറങ്ങുമ്പോൾ മുതൽ നല്ല മഴയായിരുന്നു, ശങ്കരേട്ടൻ വളരെ സൂക്ഷിച്ചാണ് കാർ മുന്നോട്ട് എടുത്തത്, റോഡിലെ കുണ്ടിലും കുഴിയിലും ചാടിക്കാതെ മുന്നോട്ട് പോകുകയാണ്, ശങ്കരേട്ടാ ആ പാട്ട് ഒന്ന് വെക്ക്” മഴ ചാറും ഇടവഴിയിൽ” റാസ ബീഗ ത്തിന്റെ ഗസൽ ചെറിയ ശബ്ദത്തിൽ കാറിനുള്ളിൽ മുഴങ്ങി മഴയും മഴയുടെ താളത്തിനൊത്ത് ഗാനവും കേൾക്കാൻ നല്ല രസമുണ്ടായിരുന്നു.
മോനേ എന്നാ ഇനി തിരികെ?
ശങ്കരേട്ടൻ ചോദ്യം എന്നെ യഥാർത്ഥ ബോധത്തിലേക്ക് എത്തിച്ചു,
“അടുത്ത ബുധൻ “മോനേ ഈ ഓട്ടത്തിന്റെ വേഗത ഒന്ന് കുറയ്ക്കണം ഇനിയെങ്കിലും നാട്ടിൽ സ്ഥിരമായി നിൽക്കണം ഞാനൊരു ഡ്രൈവറായി അല്ല പറയുന്നത് മോന്റെ ബാപ്പായുടെ കാലം മുതൽ ഞാൻ ഉണ്ടായിരുന്നു.
ആ ബഹുമാനം മോനും എനിക്ക് തരുന്നുണ്ട്
അതിന്റെ പുറത്ത് പറഞ്ഞതാണ്, തെറ്റുണ്ടെങ്കിൽ ക്ഷമിക്കണം
ശങ്കരേട്ടനെ ഞാനും അങ്ങനെ തന്നെയാണ് കണ്ടിട്ടുള്ളത് എന്തും എന്നോട് പറയാം അല്ല ആജ്ഞാപിക്കാം ഞാനും കുറച്ചു നാളായി ചിന്തിക്കുകയാണ് ഈ ഓട്ടം ഒക്കെ നിർത്തി നമ്മുടെ നാട്ടിൽ കൂടിയാലോ എന്ന് എന്തായാലും ഞാൻ ഈ യാത്ര പോയി വരട്ടെ ഒരു അന്തിമ തീരുമാനത്തിൽ എത്താൻ ശ്രമിക്കാം… ശങ്കരേട്ടന് മുഖത്ത് ഒരു നനുത്ത പുഞ്ചിരി കടന്നുപോയി.കാർ ഇപ്പോൾ നെടുമ്പാശ്ശേരി എയർപോർട്ടിലേക്ക് കടന്നു, മഴയ്ക്ക് ഇപ്പോഴും ശമനം ഉണ്ടായിരുന്നില്ല
ഒരു ചെറിയ മുരൾച്ചയോടെ വണ്ടി എയർപോർട്ടിന് മുന്നിൽ നിന്നു.
ഞാൻ ഹാൻഡ് ബാഗും എടുത്തു പുറത്തേക്കിറങ്ങി ശങ്കരേട്ടാ അപ്പോൾ ബുധനാഴ്ച മറക്കണ്ട ഞാൻ വിളിക്കാം,
ശരി മോനെ യാത്രപറഞ്ഞു ശങ്കരേട്ടൻ മുന്നോട്ടുപോയി
എയർപോർട്ടിന് മുൻവശം നിറയെ ജനങ്ങളാണ് മഴ ഇപ്പോൾ കൂടുതൽ കനത്തു, ഇനി അടുത്ത പ്രളയം വല്ലതും വരാൻ ആണോ ഭഗവാനെ !!!
മുന്നിൽ നിന്ന് ഒരു വൃദ്ധ ആരോടോ പറയുന്നു, ഞാൻ ബാഗും തൂക്കി മുന്നോട്ടു നടന്നു.
പെട്ടന്ന് ആരോ വിളിക്കുന്നതായി തോന്നി, ശബ്ദം കേട്ട ഭാഗത്ത് ഒരു വൃദ്ധനായിരുന്നു ചോദ്യഭാവത്തിൽ ഞാൻ അദ്ദേഹത്തെ നോക്കി സാർ ഈ ഡെഡ്ബോഡി കൊണ്ടുവന്നത് ഏതിലൂടെയാണ്?
ഞാൻ പലപ്പോഴും ഇതിലൂടെ യാത്ര ചെയ്തിട്ടുണ്ടെങ്കിലും ഏതിലൂടെയാണ് ഡെഡ്ബോഡി കൊണ്ടുവരുന്നത് എന്നത് എനിക്കും അറിവുള്ള കാര്യമായിരുന്നില്ല.
ഒരു നിമിഷത്തെ ശങ്കയ്ക്ക് ശേഷം പറഞ്ഞു ആ ഇൻഫർമേഷൻ കൗണ്ടർ ചോദിക്കു എനിക്ക് അത്ര അറിവില്ല ഞാൻ മുന്നോട്ടു നടന്നു.
എന്റെ ഒപ്പം ആ വൃദ്ധനും അനുഗമിക്കുന്നുണ്ടായിരുന്നു , ഇൻഫർമേഷൻ കൗണ്ടർ വൃദ്ധനെ ചൂണ്ടി കാണിച്ചു ഞാൻ മുന്നോട്ടു നടന്നു എനിക്ക് പോകാനുള്ള വിമാനത്തിന്റെ ബോർഡിംഗിനു സമയമായി തുടങ്ങിയെന്ന് വലിയ ടിവി സ്‌ക്രീനിൽ കാണിക്കുന്നുണ്ടായിരുന്നു.