രാവിലത്തെ ബ്രെയ്ക്ക് ഫാസ്റ്റായിട്ടു രണ്ടു ഇലയടയും പുഴുങ്ങിയ നേന്ത്രപ്പഴവും കുത്തിക്കേറ്റി പ്ളേറ്റ് കഴുകി  വെച്ചപ്പോഴാണ് ഫോൺ കിടന്നു കരയുന്നത് കേട്ടത്. കുറച്ചു ദിവസങ്ങളായി ഫോണിനോടൊക്കെ ഉള്ള താല്പര്യം പോയിട്ടുണ്ട്. അതുകൊണ്ട് തന്നെ മൈൻഡ് ചെയ്യാതെ ഇരുന്നപ്പോൾ ദോണ്ടേ, പിന്നേം കെടന്നടിക്കുന്നു. സാധാരണ ഇങ്ങനെ ആരും വിളിക്കാത്തെ ആണല്ലോ..എല്ലാർക്കും മെസേജാ പതിവ്…. ഇതാരപ്പ ഇങ്ങനെ കെടന്നു ചാവാൻ എന്നും പറഞ്ഞു ഫോണെടുത്തപ്പോഴാണ് ആത്മാർത്ഥ നൻപൻ വിളിക്കുന്നത്.. ആള് മാന്യനാ. ഒന്നുകിൽ അവൻ ഡെസ്പ് ആവുമ്പോൾ എന്നെ വിളിച്ചു എന്റെ കദനകഥ കേട്ട്, അവന്റെ ജീവിതം ഇതിനേക്കാൾ സുന്ദരമെന്നു പറഞ്ഞു സമാധാനം കണ്ടെത്താനോ അല്ലെങ്കിൽ എന്നെക്കൊണ്ട് എന്തെങ്കിലും കാര്യം നടത്തിക്കാനോ- ഈ രണ്ടു കാര്യത്തിനുമല്ലാതെ അവൻ ഫോൺ വിളിക്കാറില്ല.. സ്വന്തം പെങ്ങളുടെ കല്യാണം ഉറപ്പിക്കൽ ഉണ്ടായിട്ട് അതൊരു ചെറിയ ചടങ്ങല്ലേ, അധികം ആളൊന്നുമില്ലെന്നു പറഞ്ഞവനാ..അതും, അന്ന് അവന്റെ വീട്ടിലേക്ക്  രണ്ടു ജീപ്പും ഒരു കാറും കേറിപ്പോവുന്നത് കണ്ട  ഈ എന്നോട്.. 

ഏതായാലും ആ കാൾ അവസാനിക്കാറായപ്പോൾ ഫോണെടുത്തു.

 

” അളിയാ ഹാപ്പി ഓണം “, അങ്ങോട്ട് ഹലോ പറയുന്നതിന്റെ മുമ്പ് തന്നെ ഇങ്ങോട്ട് പറഞ്ഞു.

 

ഹോ.. ചൊറിഞ്ഞു കേറുന്നുണ്ട്. വാട്സാപ്പിൽ എല്ലാ കൊല്ലവും വരുന്ന ഓണാശംസക്ക്  റിപ്ലൈ പോലും കൊടുക്കേണ്ട എന്ന് വിചാരിച്ചു നെറ്റ് ഓഫ് ചെയ്തിരിക്കുന്ന എന്നോട്- ഹാപ്പി ഓണം… അല്ലെങ്കിലും ഈ വാട്‍സ് ആപ്പിൽ വരുന്ന വിഷിനൊന്നും ഒരു ആത്മാർത്ഥത ഇല്ല.. വെറുതെ ഒരു ലിസ്റ്റ് ഉണ്ടാക്കി അങ്ങോട്ട് അയക്കും, ആർക്കാണെന്നോ എന്താണെന്നോ എന്നൊന്നും ഒരു നോട്ടമില്ല. കഴിഞ്ഞ ന്യൂ ഇയറിനു ഇത് പോലെ വിഷ് അയച്ചപ്പോഴാണ് ആദ്യമായി ബ്രോഡ് കാസ്റ്റ് കൊണ്ട്  പണി കിട്ടിയത്.. അന്ന് പന്ത്രണ്ടു മണിക്ക് മെസേജ് അയച്ച കൂട്ടത്തിൽ പണ്ടെന്നെ തേച്ചിട്ടുപോയ പെണ്ണും ഉണ്ടായിരുന്നു. എല്ലാവര്ക്കും മെസേജ് പോവുന്നതിനു മുമ്പ് തന്നെ അവളുടെ റിപ്ലൈ വന്നു.. ” ഡോണ്ട് ഡിസ്റ്റർബ് മി എഗൈൻ.. ഇറ്റ് ഈസ് ഓൾ ഓവർ ബിറ്റ്വീൻ   അസ്”  എന്ന്.. ശരിയാണ്.. അവളെന്നെ തേച്ചു പോയി, ഞങ്ങൾ തമ്മിൽ ഒരു ബന്ധവുമില്ല. എന്നാലും ന്യൂ ഇയറിന്റെ അന്ന് രാത്രി ഒരു മെസേജ് അയക്കുമ്പോൾ ഒരു ” സെയിം റ്റു യൂ” എങ്കിലും അവൾ അയക്കേണ്ടത് അല്ലായിരുന്നോ?? അതും ഈ വർഷത്തെ ആദ്യത്തെ മെസേജ്.. അന്നേ വിചാരിച്ചതാ ഈ കൊല്ലം പോക്കാണെന്നു.. തെറ്റിയില്ല, മാർച്ചിൽ കൊറോണ വന്നു.. ഈ വർഷം ശരിക്കും ഉണ്ടോ എന്ന് പോലും ഓർമ ഇല്ല ഇപ്പോൾ.. എല്ലാം ഇന്നലെ കഴിഞ്ഞത് പോലെ തോന്നുന്നു..

 

” ഡാ.. അളിയാ.. നീയെന്താ മിണ്ടാത്തെ.?? ഹാപ്പി ഓണം ന്ന്.. ”