പ്രാണേശ്വരി 13 [പ്രൊഫസർ ബ്രോ] 431

ഞാൻ ചെല്ലുന്നത് കണ്ടപ്പോൾ അത്രയും സമയം ആരോടോ സംസാരിച്ചുകൊണ്ടിരുന്ന അരുൺ ചേട്ടൻ അവരോടുള്ള സംസാരം അവസാനിപ്പിച്ചു എന്റെ അടുത്തേക്ക് വന്നു
“ഡാ… നിന്നോട് പറയണ്ട കാര്യമില്ലല്ലോ ആർക്കാണ് വോട്ട് ചെയ്യേണ്ടത് എന്ന്… ”
പുള്ളിയുടെ ചിരിയോടെ ഉള്ള ആ ചോദ്യത്തിന്റെ ഉത്തരം എനിക്ക് എപ്പോഴേ മനസ്സിലായതാണ്
“അറിയാം ചേട്ടാ… ”
“നീ മാത്രമല്ല… നിന്റെ ക്ലാസ്സിൽ ഉള്ള എല്ലാത്തിനോടും പറയണം പാർട്ടി നോക്കരുത് മെക്കാനിക്കൽ ക്ലാസ്സിലെ സ്ഥാനാർഥികൾക്ക് മാത്രമേ വോട്ട് ചെയ്യാവൂ എന്ന് ”
“അതൊക്കെ എപ്പോഴേ പറഞ്ഞതാണ് ബ്രോ… ”
“എന്നാ ശരി നീ പൊയ്ക്കോ ”
ഞാൻ അരുൺചേട്ടനെ വിട്ട് വോട്ട് ചെയ്യാനായി നടന്നു, അന്ന് മെക്കാനിക്കൽ ക്ലാസ്സിൽ നിന്നും മത്സരിച്ച ആളുകൾക്കാണ് പാർട്ടി നോക്കാതെ വോട്ട് ചെയ്തത്, അരുൺ ചേട്ടൻ പറഞ്ഞത് അതുപോലെ ചെയ്തു എന്നല്ലാതെ അതിന്റെ ഗുണം ഒന്നും അന്ന് മനസ്സിലായിരുന്നില്ല, അതിന്റ ഗുണം മനസ്സിലാക്കാൻ ആർട്സ് ഡേ വരേണ്ടി വന്നു
വോട്ട് ചെയ്യാനായി നടന്ന ഞാൻ കാണുന്നത് ഞാൻ വരുന്നതും നോക്കി നിൽക്കുന്ന ലച്ചുവിനെ ആണ്… എന്നെ നോക്കി ചിരിച്ചോണ്ട് നിന്നവൾ ഞാൻ കാണുന്നുണ്ട് എന്നറിഞ്ഞതും മുഖത്തൊരു ഗൗരവം വരുത്തി, അത് കണ്ടപ്പോൾ എനിക്ക് ചിരിയാണ് വന്നത്. എന്നാലും ചിരിക്കാനൊന്നും പോയില്ല, അവളെ ശ്രദ്ധിക്കാതെ എന്നപോലെ നേരെ വോട്ട് ചെയ്യാൻ പോയി
വോട്ട് ചെയ്തിട്ട് തിരിച്ചു വന്നപ്പോളും അവൾ ആ നിൽപ്പു തന്നെയാണ്, അവളെ വിട്ട് നേരെ കൂട്ടുകാരുടെ അടുത്തേക്ക് നടക്കാൻ തുടങ്ങിയ എന്നെ അവൾ കയ്യിൽ പിടിച്ചു നിർത്തി
“എങ്ങോട്ടാ… ”
മുഖത്തുള്ള ഗൗരവം വിടാതെ തന്നെയായിരുന്നു ആ ചോദ്യം
“കൂട്ടുകാരുടെ അടുത്തേക്ക് ”
“വോട്ട് ചെയ്തില്ലേ… റൂമിൽ പോകാൻ നോക്ക് ”
ലച്ചുവിന്റെ ആജ്ഞ പോലെയുള്ള സംസാരം കേട്ടപ്പോൾ എനിക്ക് ദേഷ്യം വന്നു
“ലച്ചൂ…  നീ കളിക്കല്ലേ…വിട്ടേ ഞാൻ പോട്ടെ… ”
“ഡാ… പറഞ്ഞാൽ കേൾക്ക് റൂമിൽ പോ… ”
“ലക്ഷ്മീ… ഞാൻ നിന്റെ പാവ ഒന്നുമല്ല… അവൾ പറയുമ്പോൾ വരണം അവൾ പറയുമ്പോൾ പോകണം… ”
പെട്ടന്നുള്ള ദേഷ്യത്തിൽ പറഞ്ഞതാണെങ്കിലും പറഞ്ഞുകഴിഞ്ഞാണ് എന്റെ സംസാരം കുറച്ചു ഉച്ചത്തിൽ ആയിരുന്നു എന്ന് മനസ്സിലായത് . ഞങ്ങളുടെ അടുത്ത് നിന്ന കുട്ടികൾ എല്ലാം ഞങ്ങളെ തന്നെയാണ് നോക്കുന്നത്
എന്റെ കയ്യിലുള്ള ലച്ചുവിന്റെ പിടി അയഞ്ഞപ്പോളാണ് അവളുടെ മുഖത്തേക്ക് ഞാൻ നോക്കുന്നത്. ഇപ്പൊ കരയും എന്നുള്ള മട്ടിൽ കണ്ണ് നിറച്ചാണ് പെണ്ണ് നിൽക്കുന്നത്.
എന്തൊക്കെ ദേഷ്യപ്പെട്ടാലും അവളുടെ കണ്ണ് നിറഞ്ഞാൽ എനിക്ക് സഹിക്കില്ല
“ലച്ചൂ… ”
ഞാൻ പതിയെ വിളിച്ചതും പെണ്ണിന്റെ കണ്ണിൽ നിന്നും കണ്ണുനീർ ഒഴുകി കഴിഞ്ഞിരുന്നു. അവളുടെ കയ്യിൽ പിടിക്കാൻ ഒരുങ്ങിയ എന്റെ കയ്യും തട്ടിമാറ്റി അവൾ അവിടെ നിന്നും കണ്ണ് തുടച്ചുകൊണ്ട് ഓടിപ്പോയി