പ്രാണേശ്വരി 13 [പ്രൊഫസർ ബ്രോ] 431

ഇതിനിടയിൽ പലപ്രാവശ്യം ഞാൻ ലച്ചുവിനെ വിളിച്ചുനോക്കി എങ്കിലും അവൾ ഫോൺ എടുത്തില്ല, ഇടക്ക് ഒരു പ്രാവശ്യം എടുത്തപ്പോഴും അടുത്തമ്മയുണ്ട് പിന്നെ വിളിക്കാം എന്നും പറഞ്ഞ് അവൾ ഫോൺ കട്ട്‌ ചെയ്തു
ലച്ചുവിന്റെ സ്വരത്തിലെ വിഷമം എന്നെ സങ്കടപ്പെടുത്തുന്നുണ്ടായിരുന്നു, ആന്റിയും മാളുവും ഒക്കെ എന്റെ മുഖം കണ്ടു കാര്യം തിരക്കിയപ്പോഴും ഞാൻ ഒഴിഞ്ഞു മാറി
അന്ന് അവർ പോയതിന് ശേഷം ഞാനും ഉണ്ണിയേട്ടനും ഒറ്റക്കായ സമയത്തു പുള്ളി എന്നോട് കാര്യം തിരക്കി
“ഡാ.. നിന്നോട് ഒരു കാര്യം ചോദിച്ചാൽ നീ സത്യം പറയുമോ… ”
“എന്താ ഉണ്ണിയേട്ടാ… ”
“എന്താ നിനക്ക് പറ്റിയെ… രാവിലെ ലക്ഷ്മിയോക്കെ വന്നു പോയതിനു ശേഷം നിന്റെ മുഖം തെളിഞ്ഞിട്ടില്ല ”
“ഏയ്യ്… അങ്ങനെ ഒന്നും ഇല്ല ഉണ്ണിയേട്ടാ… ”
“അങ്ങനെ ഒക്കെ ഉണ്ട്… നീ ഇന്നലെ ഇവിടെ വന്നത് മുതൽ ഇന്ന് രാവിലെ വരെ എന്നെ ഉണ്ണിയേട്ടാ എന്ന് വിളിച്ചിട്ടില്ല… സംവിധായകാ എന്നോ  വേറെ എന്തെങ്കിലുമൊക്കെ ആയിരുന്നു വിളിച്ചിരുന്നത്, പക്ഷെ അവർ പോയതിന് ശേഷം നീ എന്നെ വിളിച്ചത് മുഴുവൻ ഉണ്ണിയേട്ടാ എന്നാ…”
ഉണ്ണിയേട്ടന്റെ വാക്കുകളിൽ നിന്നും അവർ ഒക്കെ എന്നെ എത്ര ശ്രദ്ധിക്കുന്നു എന്നെനിക്കു മനസ്സിലാകുകയായിരുന്നു. പുള്ളി പറഞ്ഞതിന് പറയാൻ മറുപടിയും എന്റെ പക്കൽ ഉണ്ടായിരുന്നില്ല
“നിനക്ക് എന്നോട് പറയാൻ പറ്റുന്ന കാര്യമാണെങ്കിൽ മാത്രം പറഞ്ഞാൽ മതി… ”
നമ്മുടെ പ്രിയപ്പെട്ടവരുടെ ഒക്കെ അവസാന ആയുധം ആകും ആ ഒരു വാചകം, ആ ഒരു വാചകത്തിൽ എല്ലാം പറയുക എന്നല്ലാതെ വേറൊരു മാർഗം ഇല്ല.
“അത്… ഉണ്ണിയേട്ടാ… ”
“നീ പറയടാ… നമുക്ക് പോംവഴി ഉണ്ടാക്കാം ”
ഞാൻ മടിച്ചാണെങ്കിലും ലച്ചു പിണങ്ങി പോയതും, വിളിച്ചിട്ട് ഫോൺ എടുക്കാത്തതും എല്ലാം പറഞ്ഞു. എല്ലാം പറഞ്ഞ് കഴിയുമ്പോൾ എന്നെ കളിയാക്കി ഉള്ള ഒരു ചിരിയാണ് ഞാൻ പ്രതീക്ഷിച്ചത്,  പക്ഷെ ഉണ്ണിയേട്ടന്റെ മറുപടി എന്നെ ഞെട്ടിച്ചുകളഞ്ഞു
“ഡാ… ചില പിണക്കങ്ങൾ നല്ലതാണ്… ഇപ്പൊ നിനക്ക് തോന്നുന്ന ഒരു വിഷമമില്ലേ  അത് നിനക്ക് അവളോടുള്ള സ്നേഹത്തിന്റെ ആണ്… ലക്ഷ്മിക്ക് ഇപ്പൊ നിന്നോടുള്ള പിണക്കത്തിന് കാരണം അറിയുമ്പോൾ അവൾ നിന്നെ എത്ര സ്‌നേഹിക്കുന്നുണ്ടെന്ന് നിനക്കും മനസ്സിലാകും ”
ഉണ്ണിയേട്ടൻ പറഞ്ഞതിൽ ഒരുപാട് കാര്യങ്ങൾ എനിക്ക് മനസ്സിലായില്ലെങ്കിലും എന്റെ മനസ്സിനൊരു ചെറിയ ആശ്വാസം പകരാൻ ആ വാക്കുകൾക്ക് കഴിഞ്ഞു
അന്നത്തെ പിണക്കത്തിനുള്ള കാരണം ലച്ചു പറഞ്ഞപ്പോഴാണ് ഉണ്ണിയേട്ടൻ പറഞ്ഞത് മുഴുവനായും എനിക്ക് മനസ്സിലായത്
അന്ന് രാത്രി കുറച്ചു വൈകിയിട്ടും ഞാൻ ലച്ചുവിനെ വിളിച്ചില്ല. അവളോടൊരു ചെറിയ വാശി കാണിച്ചതാണ്… ഞാൻ വിളിച്ചപ്പോൾ എടുക്കാത്തവൾ എന്നെ വിളിക്കട്ടെ എന്ന് കരുതി. എന്നാലും അധികം സമയം ഒന്നും അവളോട് വാശി കാണിക്കാനും സംസാരിക്കാതെ ഇരിക്കാനുമൊന്നും എനിക്ക് സാധിക്കുമായിരുന്നില്ല