പനിനീർപൂവ് [Shana] 141

“എന്ത് പറയാനാ സുമേ. ഓരോരോ ബുദ്ധിമോശം അല്ലാതെന്താ പിന്നെ അതിനെ പറഞ്ഞിട്ടും കാര്യമില്ല. പാവം കൊച്ചാ അത്. ”

” ചേച്ചി കാരണം വില്ലതും അറിഞ്ഞാരുന്നോ.. പോലീസ് കേസാക്കിയോ ചേച്ചീ. അല്ല, ആ കൊച്ച് എന്തിനാ ഈ ബുദ്ധിമോശം കാണിച്ചത്.ജയേച്ചി നന്നായിട്ടല്ലേ അതിനെ നോക്കുന്നത്.” സുമ ആകാംഷയോടെ ചോദിച്ചു.

“എന്റെ സുമേ, നിനക്ക് എന്ത് അറിയാം..പുറമെ കാണുമ്പോലെ അല്ല ഓരോ കാര്യങ്ങളും നടക്കുന്നത്. അതു തന്നേമല്ല.. അവളില്ലേ.. ആ ജയ അവരത്ര നല്ലതൊന്നുമല്ലന്നാ കേട്ടെ..” ഗീത പുച്ഛത്തോടെ പറഞ്ഞു.

“എന്റെ ചേച്ചി രാവിലെ തന്നെ വേണ്ടാതീനം പറയല്ലേ.. പാപം കിട്ടും. ”

“എടീ.. ഞാന്‍ പറഞ്ഞത് സത്യമാ, ചേട്ടന്‍ പറഞ്ഞപ്പോഴാ കാര്യങ്ങളൊക്കെ ഞാന്‍ അറിഞ്ഞേ, ആ കൊച്ചിന്റെ കാര്യം വലിയ കഷ്ടത്തിലാരുന്നു. കാര്യം അവര്‍ ഇതിനെ നോക്കുന്നുണ്ടെങ്കിലും അതിന്റെ പിന്നില്‍ കുറെ ഉദ്ദേശങ്ങളുണ്ട്, അവരും ആ മൂത്തചെക്കന്മാരും കൂടി അവസരം മുതലാക്കുവാ. ”

“ചേച്ചി എന്തൊക്കെയാ ഈ പറയുന്നേ, അതുകൊണ്ട് അവര്‍ക്ക് എന്തു നേട്ടമാ ഉള്ളത്.” സുമ സംശയത്തോടെ ഗീതയോടു ചോദിച്ചു.

“നിനക്കറിയാഞ്ഞിട്ടാ സുമേ , അവനില്ലേ ആ മൂത്ത ചെക്കന്‍ അവനേ അറുപിശുക്കനാ. അവനും ആ തള്ളയും കൂടി അതിനെ ഇട്ടു കഷ്ടപെടുത്തിയത് ചില്ലറയൊന്നുമല്ല. ഇപ്പോ വീട്ട് ചിലവ് നോക്കുന്നത് ഈ വയ്യാതിരിക്കുന്നവളാ.”

” ഒന്നു പോയെ ചേച്ചി, ആ കൊച്ചിന്റെ അച്ഛന്‍ പോയപ്പോള്‍ നല്ലൊരു തുക പെന്‍ഷന്‍ അവര്‍ക്കു കിട്ടുന്നുണ്ടല്ലോ. പിന്നെ ഈ കൊച്ചിനു കിട്ടുന്ന കുറച്ചു പൈസ കൈയ്യിട്ടു വാരണ്ട ആവശ്യമെന്താ, മറ്റവനും നല്ല ജോലിയുണ്ടു പിന്നെ ഇളയവന്‍ ഗള്‍ഫില്‍ അല്ലേ. ” സുമ തനിക്കു തോന്നിയ ന്യായങ്ങള്‍ നിരത്തി.

” അതൊക്കെ കണക്കാടി പെണ്ണേ.. മൂത്തവന്‍ അറുത്തകയ്ക്ക് ഉപ്പു തേക്കാത്ത ഒരുത്തനാ, കിട്ടണതു മുഴുവന്‍ ബാങ്കില്‍ ഇടും, പത്തു പൈസ ചിലവഴിക്കില്ല, ഭാര്യക്കും മക്കള്‍ക്കും ചിലവിനു കൊടുക്കാന്‍ വയ്യാത്ത കൊണ്ടല്ലേ ആ പെണ്ണിനെ അതിന്റെ വീട്ടില്‍ തന്നെ നിര്‍ത്തിയേക്കുന്നെ, അവരാണെങ്കില്‍ അവനെ ഓരോന്നും പറഞ്ഞു പിരികേറ്റി സപ്പോര്‍ട്ടാണെന്നേ. മറ്റവന്‍ നാട്ടിലില്ലേലും ഇവരുടെ ഒപ്പം തന്നാ രണ്ടിന്റെയും കണ്ണ് വേറെ പലതിലുമല്ലേ. ” വലിയൊരു രഹസ്യം പറഞ്ഞിറക്കിയ സന്തോഷത്തില്‍ ഗീത സുമയെ ചിരിച്ചുകാട്ടി.

” ആണോ ചേച്ചി.. എനിക്കിതൊന്നുമറിയില്ലാരുന്നു. ഞാന്‍ കരുതി ആങ്ങളമാര്‍ രണ്ടു പേരും കൂടി ആ കൊച്ചിനെ പൊന്നുപോലെ നോക്കുമെന്ന്. ഇതൊക്കെ എന്തു ജെന്തുക്കളാണാവോ.. ” സുമ നെഞ്ചില്‍ കൈയ്‌വെച്ചു പറഞ്ഞു.