നിഷ്കളങ്കതയുടെ കൂക്കിവിളികൾ

Nishkalankathayude Kookkuvilikal | Author : PK

 

 

ഫെയ്സ്ബുക്കിലെ ഒരു ട്രോൾ പോസ്റ്റ്

കണ്ടപ്പോഴാണ് എനിക്ക് അവനെ ഓർമ വന്നത്…… തൊണ്ണൂറുകളിലെ സഹപാഠി പൊടിക്കുട്ടൻ ……?

 

പ്രൈമറി ക്ളാസിലെ ബഹളക്കാരിൽ മുൻപന്തിയിലുണ്ടെങ്കിലും പൊടിക്കുട്ടന്

പഠിക്കാൻ നല്ല താത്പര്യമുണ്ടായിരുന്നു.

കുട്ടിയും കോലും ഗോലി കളിയും

കള്ളനും പോലീസുമെല്ലാം ഞങ്ങളുടെ

ഇടവേളകൾ ആനന്ദകരമാക്കിയിരുന്നു.

തെയ്യാമ ചേച്ചിയുടെ കഞ്ഞിപ്പുരയിൽ

രണ്ടാമത്തെ തവണ പയറും കഞ്ഞിയും

കുടിക്കാൻ, വരിയില്ലാതെ കൂടി നിന്ന് അടി കൂടുന്നവരിൽ ഞങ്ങളുടെ കൂടെ അവനും മുന്നിലുണ്ടായിരുന്നു… കൊച്ച് കൊച്ച് കുസൃതികളുടെയൊപ്പം പഠനവുമായി

ഞങ്ങളങ്ങനെ അഞ്ചാം ക്ളാസിലെത്തി.

 

ക്രിക്കറ്റുകളി തെങ്ങിൻ മടലിന്റെ രൂപത്തിൽ അധിനിവേശം തുടങ്ങിയ

കാലത്ത് സച്ചിനെ സ്വപ്നം കണ്ട് ഞാൻ

മുഴുവൻ സമയ കളി പ്രാന്തനാകാനുളള

പിച്ചവെപ്പ് തുടങ്ങിയെങ്കിലും അവന്റെ

ഉള്ളിൽ പഠിക്കാനുള്ള ഒരു വാസന ഒരു പടി

മുന്നിൽ തന്നെ നിന്നു.

 

നാടൻ സ്കൂളിലെ പഠിത്തവും ഒപ്പമുള്ള നാട്ടുവഴികളിലെ കളികളും അവനെയും

നല്ല സ്വപ്നങ്ങൾ കാണാൻ പഠിപ്പിച്ചിരുന്നു..

 

നാട്ടുമാവിൽ കല്ലെറിഞ്ഞ് ചെക്ക്ഡാമിന്റെ

നീണ്ട കനാലിന് മുകളിലൂടെ പച്ചമാങ്ങ കടിച്ച് പറിച്ച് നടക്കുമ്പോൾ … മുകളിൽ നീലാകാശത്ത് വെള്ളപുകയൂതി പറക്കുന്ന വിമാനപ്പക്ഷിയുടെ നേർരേഖയെ ഞങ്ങൾ അമ്പരപ്പോടെ നോക്കി നിന്നിരുന്നു.

 

“വല്യ താകുമ്പോൾ എന്താവണം കുട്ടികളേ”

ദിനേശൻ മാഷിന്റെയും സരസമ്മ ടീച്ചറിന്റെയും വാത്സല്യം തുളുമ്പുന്ന ചോദ്യങ്ങളിൽ ഞങ്ങൾ ആവേശത്തോടെ മറുപടി പറഞ്ഞു..“ പൈലറ്റാവണം….!”