അപ്പുവും കാർത്തുമ്പിയും തമ്മിലുള്ള ബന്ധം , അതു വ്യക്തമാക്കാൻ ആർക്കും കഴിയില്ല. കാളി പറഞ്ഞ പോലെ ആ കുഞ്ഞു മനസിൽ ഇടം നേടിയ മാലാഖയാണവൾ, അവൻ്റെ എല്ലാം എല്ലാം…….. 

താഴത്തു വെക്കാതെ അവൾ കൊണ്ടു നടന്നു അവനെ , അവൻ്റെ വരവ് കാളിക്ക് ഐശ്വര്യം മാത്രമായിരുന്നു. മദ്യപാനം നിലയ്ക്കു നടക്കുന്നുണ്ടെങ്കിലും കഴിഞ്ഞ രണ്ടര വർഷം കൊണ്ട് കാളി ഒരു പുത്തൻ പണക്കാരനായി.

 

എങ്കിലും തൻ്റെ കുടിൽ നിന്നിടത്തു നിന്നും പിന്നോട്ടുള്ള കുറച്ചു കുടിലുകൾ കൂടി അവൻ വാങ്ങി അവിടെ ഒരു വലിയ വീടുവെച്ചു. വലുതെന്നു പറഞ്ഞാൽ നല്ല ഒരു ബംഗ്ലാവ് എന്നു തന്നെ അതിനെ വിശേഷിപ്പിക്കാം. ആ വീടിൻ്റെ  മനോഹരിതയ്ക്ക് ഏറ്റ ഒരേ ഒരു കളങ്കം അത് ചുറ്റും കൂടി നിന്ന കൂരകൾ ആണ്.

 

ചേരിക്കുള്ളിലെ ദേവലോകം പോലെ അതവിടെ ദൃശ്യമായി. പണവും പ്രദാപവും വന്നു ചേർന്നപ്പോഴും കാളി മാറിയില്ല എന്നതല്ല അതുകൊണ്ട് അർത്ഥമാക്കുന്നത്. അപ്പു അവൻ തന്നെയാണ് കാളിയെ കൊണ്ട് ഇങ്ങനെ ചെയിച്ചത് എന്ന് പറയാം.

 

അപ്പുവിന് ഒന്നര വയസുള്ള സമയം കാർത്തുമ്പി മൊടോണം  പ്രമാണിച്ച് അവളുടെ അമ്മ വീട്ടിൽ പോയി. പോകുന്ന വിവരം മുൻകൂട്ടി പറഞ്ഞതുകൊണ്ട് കാളി കുഞ്ഞിന് കാവലായി വീട്ടിലിരുന്നു. അവിടെയാണ് അന്നാദ്യമായി ആ പ്രശ്നം കാളി തിരിച്ചറിഞ്ഞത്.

 

തേ…. ദി……

 

എന്നു വിളിച്ച് അവൻ കരയാൻ തുടങ്ങിയപ്പോ വിശപ്പിൻ്റെ വിളി അവനിൽ ഉണർന്നത് കാളിയുടെ മനസും തിരിച്ചറിഞ്ഞു. നിറഞ്ഞ വാത്സല്യത്തോടെ അവൻ കുഞ്ഞിന് ആഹാരമൂട്ടി എന്നാൽ അപ്പു തൻ്റെ വാ തുറക്കാൻ വിസമ്മതിച്ചു.

 

ഒരു തരി അന്നം പോലും ഉള്ളിൽ ചെല്ലാതെ അവൻ കരയാൻ തുടങ്ങി. വിശപ്പുണ്ടായിട്ടും അവൻ കഴിക്കാത്തതിൻ്റെ കാരണം കാളിക്കും വ്യക്തമായില്ല .

 

തേ…. ദി…..

 

അവൻ്റെ കുഞ്ഞു നാവിൽ നിന്നു ഉതിർന്നു വീണ അക്ഷരക്കൂട്ടുകളിൽ ഉണ്ടായിരുന്നു കാളിക്കുള്ള ഉത്തരം. കാളി എന്ന വീരൻ പരിശ്രമങ്ങൾക്കൊടുവിൽ ആ കുഞ്ഞിനു മുന്നിൽ മുട്ടുകുത്തി. അല്ല അവൻ കുത്തിച്ചു.