?മയൂരി? [The Conclusion][ഖല്‍ബിന്‍റെ പോരാളി ?] 1361

““മോളെ… നീ എന്തായാലും തിരുമാനം പറ…”” സഹദേവന്‍ ദയനീയ ഭാവത്തില്‍ പറഞ്ഞു.

““നിങ്ങള്‍ക്ക് ഒക്കെ സന്തോഷത്തിനു വേണ്ടി നിങ്ങൾ പറയുന്ന ആരെ കല്യാണം കഴിക്കാനും എനിക്ക് സമ്മതമാണ്. പക്ഷേ എനിക്ക് കുറച്ച് സമയം വേണം…”” സഹദേവന്റെ നെഞ്ചില്‍ കരഞ്ഞ് കൊണ്ട്‌ മയൂരി പറഞ്ഞു. സഹദേവന് സന്തോഷമായി. ആ മനുഷ്യന്റെ കണ്ണ് നിറയുന്നുണ്ടായിരുന്നു. കാളി അത് കണ്ടു ഒന്ന് ചിരിച്ചു.

പക്ഷേ സിന്ധുവിന്റെയും ദാസന്റെയും മുഖം ആദ്യം സന്തോഷമായിയെങ്കിലും പിന്നെ പതിയെ മങ്ങി തുടങ്ങി. എങ്കിലും അവരുടെ ദുഃഖം അവർ മറച്ച് പിടിച്ചു.

““ആരെയായാലും സമ്മതിക്കുമോ…?”” ദാസന്‍ ചോദിച്ചു.

““ഹാ… നിങ്ങൾ എനിക്കും കുഞ്ചുസിനും നല്ലതെ തിരഞ്ഞെടുക്കുയുള്ളു…”” മയൂരി പറഞ്ഞു.

““കാളിയായലോ…”” സിന്ധു ചോദിച്ചു.

““അമ്മേ….”” സിന്ധുവിന്റെ വാക്കുകൾ കേട്ട് കാളി സിന്ധുവിനെ വിളിച്ചു. സിന്ധു തിരിഞ്ഞ് നോക്കി. കാളി വേണ്ട എന്നര്‍ത്ഥത്തില്‍ തലയാട്ടി കാണിച്ചു. പക്ഷേ സിന്ധു അത് കാര്യമാക്കിയില്ല.

““മോളെ നീ പറ… കാളിയായൽ നിനക്ക് സമ്മതമാണോ?”” സിന്ധു ചോദ്യം ആവര്‍ത്തിച്ചു.

““നിങ്ങളുടെ ഒക്കെ ഇഷ്ടം. ഞാൻ അതിന്‌ എതിര്‌ നില്‍ക്കില്ല.”” മയൂരി പറഞ്ഞു. കാളി അതിശയത്തോടെ അവളെ നോക്കി. ദാസനും സിന്ധുവിനും സന്തോഷം തിരിച്ച് വന്നു. അവർ സഹദേവനെ നോക്കി.

““അളിയാ… എന്റെ കാളിയ്ക്ക് തരുമോ ഇവളെ…?”” ദാസന്‍ ചോദിച്ചു.

““അതു… എനിക്ക് ഇവളുടെ അമ്മയോട് കുടെ ചോദിക്കണം. അവള് എതിര്‍പ്പ് ഒന്നും പറയില്ല… എന്നാലും അവൾ പറഞ്ഞതിന് ശേഷം ഉറപ്പ് തരാം…”” സഹദേവന്‍ സന്തോഷം തുളുമ്പുന്ന മുഖത്തോടെ പറഞ്ഞു. ദാസനും സിന്ധുവും അതിനെ പുഞ്ചിരിയോടെ വരവേറ്റു.

““എന്നാ ഞാൻ ഇനി നില്‍ക്കുന്നില്ല… അവിടെ ഒരാൾ കാര്യങ്ങൾ അറിയാൻ കാത്തിരിക്കുന്നുണ്ടാവും… ഞാൻ ചെന്ന് പറയട്ടെ…”” സഹദേവന്‍ കണ്ണുകള്‍ തുടച്ച് കൊണ്ട്‌ പറഞ്ഞു. മയൂരി അച്ഛനില്‍ നിന്ന് മാറി. അവളുടെ കണ്ണുകളും നിറഞ്ഞിരുന്നു. അമ്മാവന്‍ പോവുന്നത് മനസ്സിലാക്കിയ കാളി കുഞ്ചുസിനെയെടുത്ത് കൊണ്ട്‌ എണീറ്റു അമ്മാവന്റെ കുടെ പുറത്തേക്ക്‌ നടന്നു. പിറകെ ബാക്കി ഉള്ളവരും.

കാളി അമ്മാവനെ കാറില്‍ കയറും വരെ അനുഗമിച്ചു. ബാക്കി ഉള്ളവർ പൂമുഖത്ത് നിന്നു. കാറില്‍ കയറുന്നതിന് മുമ്പ് സഹദേവന്‍ കുഞ്ചുസിന് കവിളിൽ ഒരുമ്മ നല്‍കി. പിന്നെ കാളിയോട് എന്തോ പറഞ്ഞു. കാളി തിരിച്ചും മറുപടി നല്‍കി. ശേഷം സഹദേവന്‍ കാര്‍ എടുത്ത് റോഡ് ലക്ഷ്യമാക്കി പോയി.

ഗേറ്റ് കടക്കുന്നു പോകും വരെ കാളിയും കുഞ്ചുസും ആ  കാർ നോക്കി നിന്നു. കാളി തിരിച്ച് വീടിനുള്ളിലേക്ക് നടന്നു. ദാസനും സിന്ധുവും വീടിനുള്ളിലേക്ക് പോയിരുന്നു. മയൂരി പൂമുഖത്തെ ഒരു തൂണിൽ തല മുട്ടിച്ച് എന്തോ ആലോചനയിലാരുന്നു.

കുഞ്ചുസിന് അപ്പോഴേക്കും വിശപ്പ് തുടങ്ങിയിരുന്നു. അവന് അമ്മയുടെയും അടുത്തേക്ക് പോകാനുള്ള ത്വര വന്നിരുന്നു. കാളിയുടെ കൈയിൽ ഇരുന്ന കുഞ്ചുസ് മയൂരിയെ കണ്ടു അവനെ എടുക്കാനായി കുതറി തുടങ്ങി. അവന്‍ മേൽചുണ്ട് കീഴ്ചൂണ്ടിനുള്ളിൽ വെച്ച് സങ്കടഭാവത്തിൽ അവന്റെ അമ്മയെ നോക്കി. അവന്റെ ശബ്ദം കേട്ട് മായു ആലോചനയിൽ നിന്ന് ഉണര്‍ന്നു. അവൾ കുഞ്ചുസിനെ എടുക്കാൻ കാളിക്ക് അരികില്‍ ചെന്നു. അവൾ കാളിയ്ക്ക് മുഖം നല്‍കാതെ കുഞ്ഞിനെ വാങ്ങി. ശേഷം തിരിഞ്ഞ് നടന്നു.