?മയൂരി? [The Conclusion][ഖല്‍ബിന്‍റെ പോരാളി ?] 1361

ഇപ്പോൾ കാളി നാട്ടില്‍ എത്തിയിട്ട് ഒരു മാസം കഴിഞ്ഞിരിക്കുന്നു. ആ വീട്ടിലെ എല്ലാവരും ഈ കാലയളവില്‍ വന്ന് കയറിയ ദുഃഖത്തിൽ നിന്ന് എകദേശം തിരിച്ച് വന്നിരിക്കുന്നു. കാളി കുഞ്ചുസുമായി നന്നായി അടുത്തിരുന്നു. ഇപ്പോൾ അവന്‍ ഉണര്‍ന്നിരിക്കുന്നതിൽ ഏറെ സമയവും കാളിയുടെ ഒപ്പമാണ്.

അങ്ങനെ ഇരിക്കെ ആണ്‌ ഗോവയില്‍ ചില ഡോക്യുമെന്റ് ആവശ്യത്തിന് ആയി കാളിക്ക് പോവേണ്ടി വന്നു. വീട്ടില്‍ പറഞ്ഞപ്പോ ഇത്തിരി വിഷമം ഉണ്ടായെങ്കിലും ആരും കാര്യമായ എതിര്‍പ്പ് ഒന്നും പറഞ്ഞില്ല. പക്ഷേ അമ്മ വിളിക്കുമ്പോള്‍ വരണമെന്ന് സിന്ധു ചട്ടം കെട്ടിയിരുന്നു. അങ്ങനെ ഒരു ദിവസം രാത്രി അവന്‍ ഗോവയിലേക്ക് തിരിച്ച് പോയി.

ഗോവയില്‍ സീസൺ ആയതിനാൽ നല്ല തിരക്ക് ആയിരുന്നു. കാര്യങ്ങൾ പെട്ടെന്ന് നടന്നതും ഇല്ല. നാട്ടില്‍ നിന്ന് പോയതിനു ശേഷം എന്നും സിന്ധു അവനെ വിളിക്കുമായിരുന്നു. ഒരിക്കല്‍ നഷ്ടപ്പെട്ട പോലെ ഇനി അവനെ നഷ്ടപ്പെടാൻ അവർ ആഗ്രഹിച്ചിരുന്നില്ല.

പിന്നെ ഗോവയില്‍ നിന്ന് കാളി നാട്ടിലെത്തുമ്പോൾ രണ്ടാഴ്ച കഴിഞ്ഞിരുന്നു. നാട്ടില്‍ എത്തുമ്പോൾ സമയം ഏകദേശം വൈകുന്നേരം ആയിരുന്നു. റെയിൽവേ സ്റ്റേഷനില്‍ നിന്നും ഒരു ഓട്ടോ പിടിച്ച് വീട്ടിലെത്തി.

വീട്ടില്‍ കാളി പ്രതീക്ഷിച്ചതിലും ഒരാൾ കൂടുതൽ ഉണ്ടായിരുന്നു. അവന്റെ അമ്മാവന്‍ സഹദേവന്‍. വീട്ടിലേക്ക് കയറുമ്പോള്‍ തന്നെ ഹാളില്‍ ഇരുന്നുള്ള സംസാരം കേൾക്കാമായിരുന്നു. മുഖത്ത് ഒരു പുഞ്ചിരി വിടര്‍ത്തി കാളി ഹാളിലേക്ക് കടന്ന് ചെന്നു.

ഒരു നിമിഷം പെട്ടെന്ന് ഹാൾ നിശബ്ദമായി. എല്ലാവരും ഹാളിലേക്ക് കയറി വന്ന കാളിയെ നോക്കി. ഹാളില്‍ ദാസനും സഹദേവനും സിന്ധുവും  സോഫയിൽ ഇരിക്കുകയാണ്. മയൂരി സോഫയ്ക്ക് അരികില്‍ ചുമരും ചാരിയാണ് നില്‍ക്കുന്നത്. സഹദേവന്റെ കൈയിലാണ് കുഞ്ചുസ്. ഇത്തിരി വികൃതി ഉണ്ടെങ്കിലും ആള്‍ക്ക് വല്യ വാശി ഒന്നും ഇല്ല. പാലു കുടിക്കാനും താരാട്ട് പാടി ഉറക്കാനും മാത്രം അവന് അമ്മയെ മതി. പരിചയമില്ലാത്തവർ എടുത്താൽ മിണ്ടാതെ ഇരിക്കുകയും പരിചയമുള്ളവർ എടുത്താൽ ഓരോ വികൃതി കാട്ടി സ്നേഹിക്കുകയും ചെയ്യും. എന്തായാലും കക്ഷി ഇപ്പൊ സഹദേവന്റെ മടിയില്‍ സൈലന്റ് മോഡിലാണ്. അവന്‍ കാളിയെ നോക്കി. എവിടെയോ കണ്ടു മറന്ന മുഖം എന്ന ഭാവത്തില്‍ കാളിയെ തന്നെ നോക്കി അവന്‍ നിന്നു.

““ഹാ… നീ വന്നോ…!!! മോളെ അവന് ഒരു ചായ എടുത്തേ…”” സിന്ധു മായുവിനെ നോക്കി പറഞ്ഞു.

““ഹാ… അമ്മേ…. ഇപ്പൊ എടുക്കാം…”” ഇത്രയും പറഞ്ഞ്‌ മായു അടുക്കളയിലേക്ക് പോയി.

““അമ്മാവന്‍ എപ്പോ എത്തി…?”” കാളി സഹദേവനോട് ചോദിച്ചു.

““ഉച്ച കഴിഞ്ഞപ്പോ എത്തി മോനെ…”” സഹദേവന്‍ കുഞ്ചുസിന്റെ തലയില്‍ തടവി കൊണ്ട്‌ മറുപടി നല്‍കി.