കലിപ്പന്റെ കാന്താരി [Aadhi] 1404

” നിനക്ക് വിശക്കുന്നുണ്ടോ?? ഒന്നും കഴിച്ചില്ലല്ലോ ഇന്ന്?? ” ഞാൻ ചോദിച്ചു.. എന്നോട് വഴക്കിടുന്ന ദിവസങ്ങളിൽ അവൾ അങ്ങനെ ആണ്..പട്ടിണി ആയിരിക്കും, ഫ്രണ്ട്‌സ് എങ്ങാനും നിർബന്ധിച്ചു കഴിപ്പിച്ചാൽ ആയി..ഇന്ന് പക്ഷെ ഹോസ്റ്റലിൽ വേറെ ആരും ഇല്ല, എല്ലാവരും നാട്ടിൽ പോയിട്ടുണ്ട്.. പ്രൊജക്റ്റ് റിപ്പോർട്ടിന്റെ പണിയായിട്ട് അവൾ ഇവിടെ തന്നെ നിന്നതാണ്.. ഉള്ള പണികൾ എല്ലാം പാതിരാത്രി വരെ ഇരുന്നു തീർത്തു ടെസ്റ്റിംഗിലേക്ക് അപ്‌ലോഡ് ചെയ്തിട്ട് ഓടി വന്നതാണ് ഞാൻ, അനുവിനെ കാണാൻ.. കൊച്ചി- തൃശൂർ അധികം ദൂരം ഇല്ലെങ്കിലും എന്റെ ജോലിത്തിരക്കും അനുവിന്റെ കോളേജിലെ തിരക്കുകളും കൊണ്ട് പലപ്പോഴും വീകെന്റിൽ കാണുന്നത് തന്നെ കഷ്ടമാണ്.. ഇതിപ്പോൾ രണ്ടാഴ്ച്ച ആയി കണ്ടിട്ട്.. ഇന്നൊരു ദിവസം അവളുടെ കൂടെ കറങ്ങി നടന്നു, ഒന്നിച്ചു കാണണമെന്ന് അവൾ പറഞ്ഞ സിനിമയും കണ്ടു സന്തോഷമായിട്ട് പോവാം എന്ന് വിചാരിച്ചപ്പോൾ ആണ് ശനിയും ഞായറും അവൾക്ക് കോളേജിലെ വർക്ക് ചെയ്ത് തീർക്കാൻ ഉണ്ടെന്നു പറഞ്ഞത്..എന്റെ പ്ലാനുകൾ നടക്കാത്ത ദേഷ്യത്തിൽ അവളെ കുറെ ചീത്തയും വിളിച്ചു അടി ഉണ്ടാക്കിയാണ് കിടന്നുറങ്ങിയത്.. പണ്ടുമുതലേ ദേഷ്യം നിയന്ത്രിക്കാൻ എനിക്ക് പറ്റാറില്ല.. അനുവിനോടായാലും, അമ്മയോട് ആയാലും..

അടുത്തേക്ക് വന്ന വെയിറ്ററോട് രണ്ടു മസാല ദോശക്ക് ഓർഡർ കൊടുത്തു..

” വീട്ടിൽ പോവാതെ ഇരുന്നിട്ട് പ്രോജക്ട് തീർത്തോ??
”
” ഇല്ല.. ഇന്ന് തീർക്കാം എന്ന് വിചാരിച്ചതാ.. പക്ഷെ…”

അതെന്നെ ഉദ്ദേശിച്ചാണെന്നു അറിയാം.. ഇനി അധികം പറഞ്ഞാൽ ചിലപ്പോൾ വീണ്ടും അത് ഒരു അടിയിൽ .എത്തും. വേണ്ട, എന്തിനാ വെറുതെ പാവത്തിനെ വിഷമിപ്പിക്കുന്നത്?? അവളുടെ വർക് കഴിയാതെ സിനിമക്ക് പോവണമെന്നു വാശി പിടിച്ച ഞാൻ തന്നെ ആണ് ഇപ്രാവശ്യം തെറ്റുകാരൻ.. അതല്ലെങ്കിലും മിക്കവാറും ഞാൻ തന്നെ ആണ് ഈ പ്രശ്നങ്ങൾ ഒക്കെ ഉണ്ടാക്കിയിട്ടുള്ളത്.. അവൾ ഒരിക്കലും എന്നെ വിട്ടു പോവില്ല എന്നുള്ള അഹങ്കാരം കൊണ്ടാവും..അല്ലെങ്കിൽ എന്റെ മനസിലെ മെയിൽ ഷോവനിസ്റ്റ് ചെയ്യിപ്പിക്കുന്നതാവാം.. പക്ഷെ ഇന്ന് തൊട്ടടുത്ത ടേബിളിൽ ഇരുന്നു ആ പെൺകുട്ടി പറഞ്ഞത് എന്റെ കാതിലേക്കല്ല, മനസിലേക്ക് ആണ് കടന്നു പോയത്.. ഞാനും അവനെ പോലെ പെരുമാറിയിട്ടില്ലേ പലപ്പോഴും… സ്നേഹം കൊണ്ടാണെന്നു പറഞ്ഞു എത്ര തവണ പല കാര്യങ്ങളിൽ നിന്നും അനുവിനെ വിലക്കി.. വേണ്ട..കഴിഞ്ഞത് കഴിഞ്ഞു.. അതിനെ കുറിച്ച് ഇനി ആലോചിച്ചിട്ട് കാര്യമില്ല.. ഭാവിയിൽ ഇന്നാ പെൺകുട്ടി വന്നിരുന്നു അവനോട് പറഞ്ഞ പോലെ അനു എന്റെ മുന്നിൽ ഇരുന്നു പറയാൻ ഉള്ള സാഹചര്യം ഉണ്ടാവാൻ പാടില്ല..ഞാൻ ഉണ്ടാക്കാൻ പാടില്ല.. അവന്റെ പോലെ അത് മുഴുവൻ കേട്ടിരിക്കാൻ എനിക്ക് പറ്റി എന്ന് .വരില്ല. ഞാൻ തകർന്നു പോവും..നഷ്ടപ്പെട്ടിട്ട് അനുവിനെ ഞാൻ എത്ര സ്നേഹിച്ചിരുന്നു എന്ന് പറഞ്ഞിട്ടും ഒരു കാര്യവും ഇല്ല..

” എന്താ ഈ ആലോചിക്കുന്നത്?? “, അവളുടെ ശബ്ദം ആണ്..

” ഏയ്.. നിനക്ക് വല്ലതും ടൈപ്പ് ചെയ്യാനോ മറ്റോ ഉണ്ടോ?? ഞാൻ വേണമെങ്കിൽ ഹെല്പ് ചെയ്യാം…”

” ദൈവമേ.. ഇന്ന് വെള്ളക്കാക്ക മലർന്നു പറക്കും.. ഞാൻ എന്തൊക്കെയാ ഈ കേൾക്കുന്നത്.. “, അവൾ പൊട്ടിച്ചിരിച്ചു.. അത് കേട്ടാവും രണ്ടു ടേബിളിനു അപ്പുറം ഉള്ള ഒരു ആന്റി തുറിച്ചു നോക്കുന്നുണ്ട്… ഒരല്പനേരം മുമ്പ് വരെ ആയിരുന്നെങ്കിൽ ഇതിനു ഞാൻ അവളെ ചീത്ത വിളിച്ചേനെ.. ശബ്ദം അടക്കി ചിരിക്ക് എന്നും പറഞ്ഞു.. പക്ഷെ നേരത്തെ ഇറങ്ങിപ്പോയ പെൺകുട്ടി, അവൾ എന്നെ എന്തൊക്കെയോ പഠിപ്പിച്ചിട്ടാണ് പോയത്..

” തമാശ അല്ല.. കാര്യം ആയിട്ടാ.. എന്തെങ്കിലും ചെയ്ത തരണോ?? ”

” വേണ്ട വേണ്ട.. പറ്റുമെങ്കിൽ അതൊന്നു വായിച്ചു നോക്കി തെറ്റ് വല്ലതും ഉണ്ടോന്നു പറഞ്ഞു തന്നാൽ മതി.. വേറെ ഒന്നും വേണ്ട..”