ഇതെന്റെ രണ്ടാമത്തെ കഥയാണ്.പെൺപട എന്നാ ആദ്യ കഥകൾ നിങ്ങൾ തന്ന സ്നേഹത്തിന് നന്ദി പറയുന്നു. ഹർഷൻ എന്ന വലിയ മനുഷ്യനെ ഗുരുവായി മനസ്സിൽ കണ്ടാണ് ഞാൻ ഇത് എഴുതുന്നത്. Aaആ മനുഷ്യന്റെ വാലിൽ കെട്ടാൻ പോലും യോഗ്യത ഇല്ലെന്നറിയാം എന്നാലും എനിക്ക് അങ്ങനെ ആഗ്രഹിക്കാമല്ലോ. നീന, pranayaraja, സാഗർ ജി, ജോ, അർജുൻ etc… അങ്ങനെ പറഞ്ഞാൽ തീരാത്ത ഒരു പിടി എഴുത്തുകാരെ കൂടി ഈ നിമിഷം ഓർത്തു പോകുന്നു. കൂടുതൽ മടുപ്പിക്കാതെ കഥയിലേക് കടക്കുന്നു“കഥ പറ കുഞ്ഞേലിയമ്മേ” എല്ലാവർക്കും വേണ്ടി മാളു ചോദിച്ചു

കുഞ്ഞെലിയമ്മ വെറ്റില ചെല്ലം തുറന്ന് അടക്കയും പുകലയും ചുണ്ണാമ്പും ചേർത്ത് മുറുക്കുന്നതിന്റെ തിരക്കിലായിരുന്നു.

“പറയാടി കൊച്ചേ “ കുഞ്ഞേലിയമ്മ കോളാമ്പിയിലേക്ക് ഒന്ന് മുറുക്കിത്തുപ്പി.

വർഷത്തിലൊരിക്കൽ വേനലവധിക്കാണ് കുട്ട്യോളെല്ലാം തറവാട്ടിലെത്തുന്നത്. നഗരത്തിന്റെ സാന്ദ്രതയിൽ നിന്ന് ഈ ഗ്രാമത്തിലേക്കെത്തുമ്പോൾ തന്നെ കുട്ട്യോൾക്കതൊരു ഉണർവ്വാണ്‌. പിന്നീടുള്ള ഒരു മാസം കളിയും ചിരിയും ആഘോഷവും കൊണ്ട് മുല്ലക്കൽ തറവാട് നിറയും. എന്നാൽ അവരെല്ലാം കാത്തിരിക്കാറുള്ളത് കുഞ്ഞേലിയമ്മയുടെ വരവിനാണ്. അവരാ തറവാട്ടിലെ അംഗമൊന്നുമല്ല. പഴയ കാര്യസ്ഥൻ നാണുച്ചേട്ടന്റെ മോളാണ് കുഞ്ഞേലി. രണ്ടോ മൂന്നോ വർഷം കൂടുമ്പോ അവരിങ്ങനെ വരും. ഒന്നുരണ്ട് ദിവസം തറവാട്ടിൽ നിക്കും. കുട്ട്യോൾക്ക് പഴങ്കഥയെല്ലാം പറഞ്ഞുകൊടുക്കും. എന്നിട്ട് യശോദാമ്മ കൊടുക്കണ അരിയും ശർക്കരയും എണ്ണയും കുഴമ്പും വാങ്ങി അവരങ് പോവും. ഈ പ്രായത്തിലും മൂന്ന് നാഴിക നടന്നാണ് വരവ്.

“എത്ര നേരായി കുഞ്ഞേലിയമ്മേ ഒന്നു പറ” മാളുവും രേഷ്മയുമടക്കം കുട്ട്യോളെല്ലാം അവർക്ക് ചുറ്റും വട്ടം കൂടിയിരുന്നു.

“ഇന്ന് ഞാൻ പറയണത് കഥയല്ലാട്ടോ കുട്ട്യോളെ ചരിത്രാണ് ഈ മുല്ലക്കലെ ചരിത്രം” ചെറിയ കുട്ട്യോളടക്കം എല്ലാവരും അവരിലേക്ക് ചെവി കൂർപ്പിച്ചു.

“ പണ്ട് തൊട്ടേ വലിയ തറവാടുകളില് മച്ചില് ഭഗവതിയെ കുടിയിരുത്തണ ഒരാചാരുണ്ട്.കേട്ടട്ടിണ്ടോ നിങ്ങള്” കുട്ട്യോള് ഇല്ല എന്നമട്ടിൽ തലയാട്ടി.

“ഒരിക്കല് നിങ്ങടെ തറവാട്ടിലെ അന്നുണ്ടായിരുന്ന കാരാണോരും പുളിയങ്കാട്ടിലെ നമ്പൂരിമാരും കൂടി ഭഗവതിയെ ആനയിച്ചുകൊണ്ട് വരികയുണ്ടായി.എന്തിനാ ഇവിടത്തെ മച്ചില് കുടിയിരുത്താൻ. സ്ത്രീജനങ്ങളെല്ലാം കത്തിച്ച വിളക്കുകളോടെ ഭഗവതിയെ സ്വീകരിച്ചു.എല്ലാവരും ഭക്തിനിർഭരരായി മച്ചിൽ ചെന്നപ്പോ എന്താ കഥ.” എല്ലാവരും ആകാംഷയോടെ കുഞ്ഞേലിയെ നോക്കി

“ഭഗവതി കുടിയിരിക്കാൻ കൂട്ടാക്കണില്ല”

“അതെന്താ കുഞ്ഞേലിയമ്മേ “
മാളുവിന്റെ സ്വരത്തിൽ ആകാംഷയായിരുന്നു

“ഭഗവതിക്ക് മുന്നേ ഒരാള് അവിടെ കുടിയിരിന്നിരിക്കണു “

“ആര് “

“ചെമ്പരത്തി”