ഹരിചരിതം 4 [Aadhi] [Climax] 1145

പുറത്തിറങ്ങി പൂച്ചക്കണ്ണിയോടൊക്കെ എങ്ങനത്തെ ചോദ്യങ്ങൾ ആണ് ചോദിക്കുന്നത്, എന്തൊക്കെ പഠിക്കണം എന്നൊക്കെ സംസാരിച്ചുകൊണ്ടു നിന്നപ്പോൾ ആണ് റൂം പൂട്ടി അശോകൻ സാർ വരുന്നത്…

” ഹരി… എന്തെങ്കിലും പ്രോഗ്രാം ഉണ്ടോ ? ”

” ഇല്ല സാർ.. ഫ്രീ ആണ്… എന്ത് പറ്റി ?? ”

” എന്നാൽ ഒന്നെന്റെ കൂടെ വരൂ..ഒരു സ്ഥലം വരെ പോവാനുണ്ട്.. ”

ഇനി എങ്ങോട്ടാണെന്ന് ചിന്തിച്ചുകൊണ്ട് ഞാൻ സാറിന്റെ പിറകെ നടന്നു. ഒരു പഴയ സ്വിഫ്റ്റ് ഡിസയർ ആണ് സാറിന്റേത്.. സാർ ഡിക്കി തുറന്നു ബാഗ് അകത്തേക്ക് വെച്ചു… കുറെ പുസ്തകങ്ങളും റെക്കോഡുകളും ഒക്കെ ഡിക്കിയിൽ ചിതറിക്കിടക്കുന്നു..

സാർ ഡ്രൈവിങ് സീറ്റിലേക്ക് കേറി ഇരുന്നു..

” സാർ..എന്റെ കയ്യിൽ ബൈക്കുണ്ട്..ഞാൻ വന്നോളാം.. ” ഞാൻ ഡോർ തുറന്നു പിടിച്ചുകൊണ്ട് പറഞ്ഞു.

” തനിക്ക് അറിയാത്ത സ്ഥലം ആണ്..ഞാൻ തിരിച്ചു ഇവിടെ ഡ്രോപ്പ് ചെയ്യാം. താൻ കേറിക്കോ.. ”

സീറ്റിലേക്ക് കേറിഇരുന്നു..ക്യാമ്പസിനു പുറത്തേക്ക് ഇറങ്ങിയപ്പോൾ സാർ മ്യൂസിക് പ്ലെയർ ഓൺ ചെയ്തു.. പണ്ടത്തെ മലയാളം നൊസ്റ്റാൾജിയ പ്രതീക്ഷിച്ചുകൊണ്ടിരുന്ന എന്നെ ഞെട്ടിച്ചു കാറിനുള്ളിൽ ലിങ്കിന് പാർക്കും, അയൺ മെയ്ഡനും മുഴങ്ങാൻ തുടങ്ങി.. ഈ കോലത്തിൽ നടക്കുന്ന മനുഷ്യൻ കേൾക്കുന്നത് ഇംഗ്ലീഷ് റോക്കോ ?? ഞാൻ അമ്പരന്നു സാറിനെ നോക്കി…സാർ ഇതൊന്നും മൈൻഡ് ചെയ്യാതെ ലിറിക്സിനൊപ്പം ചെറിയ സൗണ്ടിൽ പാടിക്കൊണ്ട് സ്റ്റിയറിങ്ങിൽ താളം പിടിച്ചു മുന്നോട്ട് നോക്കി വാഹനം ഓടിച്ചു.

കോളേജിൽ നിന്നും കുറച്ചുമാറി ഒരു ഒറ്റനില വീടിന്റെ മുന്നിലാണ് കാർ ചെന്നു നിന്നത്..

” ഇറങ്ങെടോ.. ” ഡോർ അടച്ചുകൊണ്ട് ഒരു ചിരിയോടെ സാർ പറഞ്ഞു.. ആദ്യമായാണെന്നു തോന്നുന്നു അശോകൻ സാർ ചിരിക്കുന്നത് ഞാൻ കാണുന്നത്.. സിറ്റിയിൽ നിന്നും അകന്നു ഒരു ഗ്രാമാന്തരീക്ഷം പോലുള്ള സ്ഥലത്താണ് വീട്.. മുറ്റത്തു വിവിധ തരത്തിലുള്ള പൂച്ചെടികൾ പൂത്തു നിൽക്കുന്നു.. മതിലിൽ നിന്നും വടിയും നെറ്റും ഒക്കെ ഇട്ടു പൊക്കി അതിലൂടെ പയറും മത്തനും എല്ലാം പടർത്തിയിരിക്കുന്നു.. മൊസെയ്ക്ക് ഇട്ട സിറ്റ് ഔട്ടിലേക്ക് കേറി സാർ കാളിങ് ബെല്ലടിച്ചു.. ഞാൻ മുറ്റത്തു തന്നെ നിന്നതേ ഉള്ളൂ… നരച്ചു തുടങ്ങാറായ ഒരു കോട്ടൺ സാരി ഉടുത്തു ഒരു സ്ത്രീ വന്നു ഡോർ തുറന്നു.. അവരുടെ മുടിയുടെ വശങ്ങളെല്ലാം നരച്ചു തുടങ്ങിയിട്ടുണ്ട്.. മുഖത്തു വളരെ ശാന്തമായ ഒരു ഭാവം..

” കേറി വാടോ…” വീട്ടിലേക്ക് കേറിക്കൊണ്ട് സാർ പറഞ്ഞു..

” എന്താ ഇത്..? അവനെ പേടിപ്പിക്കല്ലേ.. “, വാതിൽ തുറന്ന സ്ത്രീ സാറിനോടായി പറഞ്ഞു.. എന്നിട്ടെന്നെ നോക്കി സ്നേഹത്തോടെ,

” കേറി വാ മോനെ.. ഞാൻ നോക്കി ഇരിക്കുകയായിരുന്നു… ” ഒരൽപം അത്ഭുതത്തോടെ ഞാൻ അകത്തേക്ക് കേറി.. ഹാളിൽ അധികം വൃത്തി ഒന്നുമില്ല.. കുറെ കളിപ്പാട്ടങ്ങൾ ഒക്കെ വലിച്ചു വാരി ഇട്ടിട്ടുണ്ട്, ഒരു ട്രൈസൈക്കിൾ മറിഞ്ഞുകിടക്കുന്നു…