ഹരിചരിതം 4 [Aadhi] [Climax] 1145

ഞാൻ കരഞ്ഞു.. ഇടക്ക് ശ്രീക്ക് ഭക്ഷണം കൊണ്ടുവന്ന ആന്റി ശ്രീയുടെ മടിയിൽ കിടന്നു കരയുന്ന എന്നെ കണ്ടു ആശ്ചര്യത്തോടെ നോക്കി.. ഒന്നുമില്ല, അമ്മ പൊയ്ക്കോ എന്ന് പറഞ്ഞു അവൾ ആന്റിയെ പറഞ്ഞയച്ചു.

രാത്രി എപ്പോഴോ കരഞ്ഞു കരഞ്ഞു മതിയായപ്പോൾ ഞാൻ അവളോട് എല്ലാം പറഞ്ഞു..ക്ഷമയോടെ എല്ലാം കേട്ടിരുന്നിട്ട് അവൾ പറഞ്ഞു..

” പോവുന്നവർ പോട്ടെ ശങ്കൂ… ഏട്ടന് ഞാനില്ലേ.. ഓരോരുത്തർ വരും പോവും..ഒന്നുമില്ലെങ്കിലും ആ ചേച്ചിക്ക് ഏട്ടനെ ഇഷ്ടം അല്ലെന്നല്ലല്ലോ പറഞ്ഞത്.. ഏട്ടനെ ബെസ്റ്റ് ഫ്രണ്ട് ആയിട്ട് വേണം എന്നല്ലേ.. അതങ്ങനെ തന്നെ ആവട്ടെ.. ഏട്ടൻ കരയരുത്, എനിക്കത് സഹിക്കില്ല… ” അവൾ എന്റെ തലയിൽ തലോടിക്കൊണ്ട് എന്നെ ആശ്വസിപ്പിച്ചു..

അടുത്ത കുറച്ചു ദിവസം ഒന്നും ചെയ്യാതെ സങ്കടപ്പെട്ട് വീട്ടിൽ ഇരിക്കാൻ നിന്നിരുന്ന എന്നെ നിർബന്ധിച്ചു അവൾ കോളേജിലേക്ക് പറഞ്ഞയച്ചു.. അവിടുത്തെ തിരക്കുകളിൽ മുഴുകി ഞാൻ പതുക്കെ ഗൗരി പറഞ്ഞത് മറക്കാൻ ശ്രമിച്ചു.. അന്നത്തെ സംസാരത്തിനു ശേഷം ഗൗരി പിന്നെ എന്നെ വിളിക്കുകയോ മെസേജ് അയക്കുകയോ ഒന്നും ചെയ്തിട്ടില്ല… ഞാനും ഇനി ഒന്നും ചോദിക്കേണ്ട പറയേണ്ട എന്ന് വെച്ചു..വീടും കോളേജുമായി എന്റെ ജീവിതം മുന്നോട്ട് പോയി.. കയ്യിലുള്ള കാര്യങ്ങളിൽ സന്തോഷം കണ്ടെത്തി, നഷ്ടപ്പെട്ടതിനെ മനപ്പൂർവം ഓർക്കാതെ ഇരുന്നു…

കുറച്ചു ദിവസങ്ങൾക്കുള്ളിൽ ശ്രീയുടെ പ്ലാസ്റ്റർ എല്ലാം വെട്ടി.. എനിക്ക് ആക്സിഡന്റ് പറ്റിയ പോലെ അല്ല, അവൾ കുറെ കാലം പ്ലാസ്റ്റർ ഇട്ടിരുന്നത് കൊണ്ട് ഫിസിയോതെറാപ്പി ആവശ്യമായിരുന്നു.. ദിവസവും അവളെ ഹോസ്പിറ്റലിൽ കൊണ്ട് പോവലും തിരിച്ചു വന്നു പ്രോജക്റ്റ് വർക്കും കൂടെ ഉള്ള പഠിത്തവും ഒക്കെ ആയി ജീവിതം മുന്നോട്ട് പോയി.. അതിനിടയിൽ അശോകൻ സാർ നിർബന്ധിച്ചു PSC ക്ക് അപ്ലൈ ചെയ്യിപ്പിച്ചു എന്നെയും ശ്രീയെയും…

>>>>>>>> ആറു വർഷങ്ങൾ കഴിഞ്ഞു <<<<<<<<<<<<<

” നിങ്ങൾ ഇറങ്ങുന്നില്ലേ?? ” കയ്യിൽ രണ്ടു വയസുള്ള മോളെയും എടുത്ത് അഭി റൂമിനു ഉള്ളിലേക്ക് വന്നു.. അവൾക്ക് നടക്കാൻ ഒരിത്തിരി ബുദ്ധിമുട്ടുണ്ട്.. പ്രഗ്നൻറ് ആണ്.

” എന്റെ അല്ലല്ലോ, ഈ മനുഷ്യന്റെ ഒരുക്കം കഴിയണ്ടേ?? അല്ലെങ്കിലേ ലേറ്റ് ആയിട്ടാണ് എണീറ്റത്.. എന്നിട്ടോ ഒടുക്കത്തെ മടിയും.. ”

ഷർട്ട് ഇൻ ചെയ്ത് ബെൽറ്റ് കെട്ടിക്കൊണ്ടിരുന്ന എന്നെ നോക്കി ശ്രീ പറഞ്ഞു..

” അല്ല, നിനക്കിന്നു പോവണ്ടേ ?? ”

” ഇല്ല..ഇന്ന് ചെക്കപ് ഉണ്ട്.. കുറച്ചു കഴിഞ്ഞു വരുൺ വരും.. ”

” ആ ഡോക്ടർമാർ ആയാൽ ഇങ്ങനെ വേണം, സ്വന്തം സ്‌പെഷലൈസേഷൻ ഒക്കെ ആണെങ്കിലും വേറെ ആരെ എങ്കിലും കാണിക്കണം.. ”

” അതല്ലെടീ… ആദ്യത്തേതിന് തന്നെ അവളെ കാണിച്ചില്ലെന്നും പറഞ്ഞു ഷംന കുറെ ചീത്ത പറഞ്ഞതാ.. ഇടക്കൊക്കെ അവളുടെ അടുത്ത് പോയാൽ അവൾക്കും ഒരു സന്തോഷം ആവും.. ” അഭി ചിരിച്ചുകൊണ്ട് പറഞ്ഞു.

” കുഞ്ഞൻ എവിടെടീ ” കണ്ണാടിയിൽ നിന്നും തിരിഞ്ഞു ഞാൻ അഭിയോട് ചോദിച്ചു.കുഞ്ഞൻ അഭിയുടെ മോനാണ്.. രണ്ടര വയസ്സായി.

” അവൻ വീട്ടിൽ ഉണ്ട്.. നിങ്ങൾ ഇറങ്ങിക്കോ.. ഒരു മണിക്കൂർ കൂടിയേ ഉള്ളൂ ഫ്‌ളൈറ്റിന്.. ”

അഭിയുടെ കയ്യിൽ നിന്നും കുഞ്ഞിനെ വാങ്ങി ശ്രീ എന്റെ കൂടെ ഇറങ്ങി.. പോർച്ചിൽ കിടക്കുന്ന കാറിൽ കേറി..