ഹരിചരിതം 4 [Aadhi] [Climax] 1145

പ്രോജക്റ്റ് അസിസ്റ്റന്റ് ആയി ജോയിൻ ചെയ്തു.. കുറച്ചു ഡിസൈൻ പാർട്ട് ഒക്കെ ഉള്ളത് കോളേജിലെ ഒരു ഹൈ പെർഫോമൻസ് കമ്പ്യൂട്ടർ ഉണ്ട്, അതിൽ മാത്രമേ ചെയ്യാൻ പറ്റൂ.. അതൊഴികെ ബാക്കി എല്ലാം വേണമെങ്കിൽ വീട്ടിൽ ഇരുന്നു ചെയ്തു അശോകൻ സാറിനെ ഇടക്ക് കൊണ്ടുപോയി കാണിച്ചാൽ മതി എന്ന് പറഞ്ഞു.. അത് നല്ലൊരു കാര്യം ആയിരുന്നു.. ഞാൻ വീണ്ടും ശ്രീയോടൊത്തു അവളുടെ റൂമിൽ തന്നെ ഇരിക്കാൻ തുടങ്ങി, പ്രൊജക്റ്റിലെ ചില പാർട്ട് ഒക്കെ അവളും അവളുടെ ലാപ്പിൽ ചെയ്യാൻ തുടങ്ങി..ബാക്കി ഉള്ള സമയം അവൾ ഗേറ്റ് എക്‌സാമിന്‌ പഠിക്കാൻ തുടങ്ങി.. ഞാനും അവളുടെ കൂടെ ഒരു കമ്പനിക്ക് ഇരുന്നു.. രണ്ടു പേരും കൂടി ഇരുന്നു പഠിക്കുമ്പോൾ വലിയ ബുദ്ധിമുട്ടില്ല..പതിയെ പതിയെ ഞങ്ങൾ പഴയ ചോദ്യപ്പേപ്പർ ഒക്കെ സോൾവ് ചെയ്യാൻ തുടങ്ങി.. ചില കാര്യങ്ങൾ ഒക്കെ ഇത്ര എളുപ്പം ആയിരുന്നോ എന്ന് തോന്നി.. പണ്ട് ഞാൻ എഴുതിയപ്പോൾ ഇതൊക്കെ കാണുമ്പോൾ തന്നെ പേജ് മറിച്ചു പോവുന്നതായിരുന്നു പതിവ്..

ഗൗരിയോട് സംസാരിക്കുന്നുണ്ട് ഇടക്കൊക്കെ..കുറേക്കാലം ആയി ശ്രീയുടെ കാര്യങ്ങൾ ഒക്കെ ആയി തിരക്കിൽ ആയിരുന്നത് കൊണ്ട് എനിക്ക് കൂടുതൽ ശ്രീയുടെ വിശേഷങ്ങൾ മാത്രമേ പറയാനുള്ളൂ…. അവൾ പക്ഷെ കാര്യമായിട്ട് അവളുടെ കരിയർ പ്ലാനും പഠിക്കുന്നതിന്റെ കാര്യങ്ങളും ഒക്കെ പറഞ്ഞുകൊണ്ടിരുന്നു..ഒരു ദിവസം എന്തോ ഒരു എക്‌സാമിന്‌ വേണ്ടി അവൾ തിരുവനന്തപുരത്തേക്ക് വന്നു. എക്സാം കഴിഞ്ഞു എന്നെ വിളിച്ചപ്പോൾ ഞാൻ കാറെടുത്തു അവളെ പിക്ക് ചെയ്തു..

” എനിക്ക് നല്ല വിശപ്പ് ഉണ്ട്, രാവിലെ ലേറ്റ് ആവേണ്ടെന്നു വിചാരിച്ചു ഒന്നും കഴിക്കാതെ കേറിയതാ…”

” ഇപ്പൊ കഴിക്കണോ?? അതോ വീട്ടിൽ എത്തിയിട്ട് മതിയോ?? ”

” ഇപ്പൊ കഴിക്കായിരുന്നു… ”

നല്ലൊരു ഹോട്ടലിന്റെ മുന്നിൽ വണ്ടി നിർത്തി ഇറങ്ങി.. സത്യം പറഞ്ഞാൽ വിശപ്പൊന്നുമില്ല..

” ഗൗരി..നമുക്ക് പാർസൽ വാങ്ങാം, പത്തു മിനുട്ട് കൊണ്ട് വീട്ടിലെത്തും, അവിടുന്ന് കഴിക്കാം…”, കേറാൻ തുടങ്ങിയപ്പോൾ അവളോട് പറഞ്ഞു ഞാൻ മൂന്നു പേർക്കുള്ള ഫുഡ് പാർസൽ വാങ്ങിച്ചു.. ആന്റി ഹോട്ടലിൽ നിന്നുള്ള ഫുഡ് അങ്ങനെ കഴിക്കാറില്ല.. ശ്രീ ആണെങ്കിൽ ഇതൊക്കെ കഴിച്ചിട്ട് എത്ര കാലം ആയി..

വീട്ടിലെത്തി ആന്റിക്ക് ഗൗരിയെ പരിചയപ്പെടുത്തിക്കൊടുത്തു ശ്രീയുടെ റൂമിലേക്ക് കേറി.. ഏതോ ഒരു സിനിമ കണ്ടുകൊണ്ട് കട്ടിലിൽ ചാരി ഇരിക്കുകയാണ്…

” ഒരക്ഷരം പഠിക്കണ്ട… ഏത് നേരവും സിനിമ കണ്ടിരുന്നോ..” പറഞ്ഞിട്ട് അവളുടെ ചെവിയിൽ നിന്നും ഹെഡ്‌സെറ്റ്‌ വലിച്ചെടുത്തു..

ഒരു ദേഷ്യത്തോടെ എന്നെ ഒന്നു നോക്കിയപ്പോൾ ആണ് കൂടെ കേറി വരുന്ന ഗൗരിയെ കണ്ടത്…

” ഗൗരി..ഇതാണെന്റെ ശ്രീ.. ശ്രീ, ഇത് ഗൗരി “, ഞാൻ രണ്ടുപേരെയും പരിചയപ്പെടുത്തി..

ഗൗരി ശ്രീയുടെ അടുത്തായി ഒരു ചെയറിൽ ഇരുന്നു സംസാരിക്കാൻ തുടങ്ങി.

ആ സമയം കൊണ്ട് താഴെ പോയി പ്ളേറ്റ് എല്ലാം എടുത്ത് പാർസൽ പൊട്ടിച്ചു ഞാൻ രണ്ടുപേർക്കും കൊടുത്തു…ശ്രീയുടെ മുന്നിൽ ഒരു ലാപ്ടോപ്പ് സ്റ്റാൻഡ് ഉണ്ട് ബെഡിൽ വെക്കുന്ന ടൈപ്പ്.., അതിൽ വെച്ചാണ് ഭക്ഷണം കഴിക്കാറ്.. ആരും വാരിക്കൊടുക്കുന്നതൊന്നും അവൾക്ക് ഇഷ്ടമല്ല..

” ബിരിയാണി ആണോ?? ഞാൻ വിചാരിച്ചതേ ഉള്ളൂ ഇന്ന്.. അമ്മയോട് പറഞ്ഞപ്പോൾ കുറച്ചുദിവസം കൂടി കഴിയട്ടെ, വല്ലാതെ ചവച്ചരക്കാൻ ഉള്ളതൊന്നും വേണ്ട എന്ന് പറഞ്ഞു.. “, പ്ളേറ്റിൽ നിന്ന് ഒരു ചിക്കൻകഷ്‌ണം പൊട്ടിച്ചുകൊണ്ട് ശ്രീ പറഞ്ഞു..