❤️ദേവൻ ❤️part 9

Devan Part 9 | Author : Ijasahammed

[ Previous Part ]

പറഞ്ഞുമുഴുവനാക്കാതെ നടന്നകന്നു പോകുന്ന ദേവേട്ടനെ മേലുമുഴുവൻ മുറിയായ വേദനയിൽ ഞാൻ നോക്കി നിന്നു….

നിറഞ്ഞ കണ്ണ് വലിച്ചുതുടച്ചു കൊണ്ട് ആ ഹോസ്പിറ്റലിൽ നിന്നും ഒരുഭ്രാന്തി കണക്കെ തേങ്ങികൊണ്ട് ഞാൻ ഗേറ്റ് ലക്ഷ്യമാക്കി നടന്നു…

ഒരു വിധത്തിൽ അങ്ങനെ പറഞ്ഞത് നന്നായി എന്ന്തോന്നി…

ഉള്ളിൽ നിറയെ ഇപ്പൊ എന്നോടുള്ള ദേഷ്യമാ..
അത് അങ്ങനെ തന്നെ ഇരുന്നോട്ടെ..

അതാണ് എന്ത്കൊണ്ടും നല്ലത്..

സത്യം അറിഞ്ഞാൽ ഒരുപക്ഷെ താങ്ങാൻകഴിഞ്ഞെന്നു വരില്ല…

മനസ്സിന് ആശ്വാസം തോന്നി…

ഇന്നല്ലെങ്കിൽ നാളെ അച്ചുവിനു ആരോഗ്യം വീണ്ടു കിട്ടും..
മനസ്സിന് ഏറ്റ മുറിവും പയ്യെ മാറും…
ദേവേട്ടനും…. !!

പ്രതീക്ഷയോടെ വീട്ടിലേക്ക് നടന്നു…
ഉടുത്തിരുന്ന ചുരിദാർ മുഴുവൻ രക്തക്കറ കണ്ടിട്ട് ആയിരിക്കണം എല്ലാരും തുറിച്ചു നോക്കുന്നുണ്ടായിരുന്നു….

ചുറ്റിനും നടക്കുന്ന ഒന്നും ശ്രദ്ധിക്കാതെ ഞാൻ വീട് ലക്ഷ്യമാക്കി നടന്നു…

“എല്ലാം ശെരിയാകും.. ”

അന്ന് ആ റോഡരികിൽ വച്ച് മനസ്സ് മന്ത്രിച്ചുകൊണ്ടിരുന്നു…..

ഇങ്ങനെയൊക്കെ ആകുമെന്ന് ഒരിക്കലും കരുതിയില്ലാ…
ഒന്നും ശെരിയാകുകയല്ല ഉണ്ടായേ.. എല്ലാം നഷ്ടമാവുകമാത്രമാണ് ഉണ്ടായത്…

ചെന്നിയിലൂടെ തെന്നി ഇറങ്ങിയ കണ്ണീർ തുള്ളികൾ അമ്മയുടെ മടിയിൽ ചെന്ന് പതിച്ചു….

അപ്പോഴത്തെ ദേഷ്യം കുറച്ചു കഴിഞ്ഞു മാറും…
എല്ലാം പഴയപടിയാകും എന്ന് കരുതിയ എനിക്ക് തെറ്റ് പറ്റിഎന്നു മനസ്സിലായത് ഹോസ്പിറ്റലിൽ നിന്നും വന്ന അച്ചുവിനെ കാണാൻ വീട്ടിലേക്ക് ചെന്ന ആ ദിവസമായിരുന്നു…