ബലിമൃഗങ്ങൾ [ജ്വാല] 1497

ഇത്തയുടെ കൈകള്‍ എന്റെ മുടിയില്‍ തലോടി.ഞാമ്പോട്ടെ എന്നു പറഞ്ഞു മുന്നോട്ടൂ നീങ്ങിയപ്പോള്‍ എന്റെ കൈകളില്‍ ഇത്ത പിടിച്ചു.

നില്‍ക്കൂ ട്ടോ ഞാനും വരുന്നു.
വീട്ടിലേക്കുള്ള നടത്തത്തിലും ഇത്ത പുഞ്ചിരിക്കുന്നുണ്ടായിരുന്നു.

ഇത്ത…

ങും…എന്തേ?

എന്റെ വിളിയില്‍ ഇത്ത നിന്നു,

നിങ്ങള്‍ തമ്മില്‍ ലൗവ്വാ…
ഇത്തായുടെ മുഖം ചുവന്നു തുടുക്കുന്നു,
കണ്ണുകളില്‍ നാണം…

അന്നോടാരാ പറഞ്ഞേ….
ഇങ്ങനെയൊക്കെ പറയാന്‍,

എന്റെ ചെവിയില്‍ പിടിച്ചെങ്കിലും നോവിച്ചില്ല എന്നിട്ടു നാലുപാടും നോക്കി ഒരു രഹസ്യം പോലെ എന്റെ ചെവിയില്‍ മന്ത്രിച്ചു

ഇജ്ജ് ഇതാരോടും പറയല്ലേ…
സ്നേഹത്തോടെ എന്റെ കവിളില്‍ തലോടി.

ഒരു ശനിയാഴ്ച തൊടിയില്‍ കളിച്ചു കൊണ്ടിരിക്കുകയായിരുന്നപ്പോഴാണ് ഇത്ത ഓടി കിതച്ചു വരുന്നത്.

ജ്ജ് ന്നോടൊപ്പം വാ…
ഒരിടം വരെ പോകാനുണ്ട്.
എങ്ങോട്ടാ ഇത്ത?

ഞാന്‍ അമ്മയോടു പറഞ്ഞിട്ടുവരാം.നീ ആരോടൂം പറയണ്ട വേഗം വാ…

ഇത്തായുടെ പരിഭ്രമം കാരണം ഒന്നും ചോദിക്കാന്‍ തുനിഞ്ഞില്ല ചെന്നെത്തിയത് ഞങ്ങളുടെ ഗ്രാമത്തിന്റെ തെക്കേ അറ്റത്തുള്ള തങ്ങളുപ്പാപ്പാന്റെ വീട്ടില്‍ ആയിരുന്നു.

ഇത്താ എന്താ ഇവിടെ?
ശ്ശ്..ശ്ശ് …ചുണ്ടിനു മീതെ വിരൽ വച്ചു മിണ്ടരുത് എന്ന് ആഗ്യം കാട്ടി.

ഞാനിപ്പം വരാം.ഇത്ത ഉള്ളിലേക്ക് കയറിപ്പോയി.
വല്ലാത്ത വിമ്മിഷ്ടം ഞാന്‍ മെല്ലെ വീടിനു വലയം വച്ചു.തുറന്നു കിടന്ന ജനാലയിലൂടെ അകത്തേക്ക് എത്തി നോക്കി,
കറുത്ത പ്രതലത്തില്‍ മഞ്ഞ വരയിട്ട കള്ളികള്‍ അതിലെന്തോ അറബിയില്‍ എഴുതി വച്ചിരിക്കുന്നു.ഒരു മുട്ടയിൽ പേന കൊണ്ട് വരച്ചു അറബിയിൽ എന്തെല്ലാമോ എഴുതി വച്ചിരിക്കുന്നു.

തങ്ങളുപ്പാപ്പ ഇത്തായുടെ തലയില്‍ കൈവച്ച് എന്തോ മന്ത്രിക്കുന്നു,ഒപ്പം ഒരു കറുത്ത ചരടിൽ കെട്ടുകൾ ഇട്ട് ഇടയ്ക്കിടെ
തലയില്‍ ശക്തിയായി ഊതുന്നുമുണ്ട്.

അരമണിക്കൂറോളം ഈ പ്രക്രിയ തുടര്‍ന്നു,ഒരു പേപ്പറില്‍ പൊതിഞ്ഞ എന്തോ ഇത്തയുടെ കൈകളില്‍ കൊടുക്കുന്നതു കണ്ടു കൊണ്ടാണ് ഞാന്‍ അവിടെ നിന്നു എഴുന്നേറ്റത്.

ഞാനോടി വീണ്ടും പഴയ സ്ഥലത്ത് എത്തി.ഇപ്പോള്‍ ഇത്തായ്ക്ക് പരിഭ്രമമില്ല,മുഖത്ത് നല്ല തെളിച്ചം .