അപരാജിതൻ 4 [Harshan] 6740

അപ്പുവിന് എന്തൊക്കെയോ കഴിവുകൾ ഉണ്ട് , ഒരുപക്ഷെ ലക്ഷ്മിയുടെ സാന്നിധ്യം അവനിൽ ഉള്ളത് കൊണ്ട് ആകാം, അത് പലപ്പോഴും മാലിനിയുടെ ശ്രദ്ധയിൽ പെട്ടിട്ടുണ്ട്,

ഇത്രയും വ്യക്തിത്വവും പക്വതയും ഒള്ള കുട്ടി ആണ് എന്ന് പിന്നീടല്ലേ മനസിലായത്,

അപ്പു പിന്നെ ഒന്നും സംസാരിക്കാതെ അവന്റെ റൂമിലേയ്ക്ക് പോയി. പോകും വഴി അവന്‍ വെറുതെ ടെറസിലേക്ക് നോക്കിയപ്പോ ശ്രീയ അവിടെ നില്ക്കുന്നുണ്ട്, സങ്കടപ്പെട്ടു

അത് കണ്ടു അവന്‍ പറയുന്നുണ്ട്, നീ എന്തിനാടി പാറുവേ ഇങ്ങനെ പേടിക്കുന്നത്, നിന്റെ അപ്പു ഇല്ലെടി ഇവിടെ ഉയിരോടെ , ഇതില്‍ കൂടുതല്‍ എങ്ങനെയാ ഞാ൯ പറയേണ്ടത്.

“എനിക്കു നിന്നെ ഒരുപാട് ഒരുപാട് ഇഷ്ടം ആണ് പെണ്ണേ, എന്റെ ഉള്ളിലെ തീ ആണ് നീ, അണയാത്ത തീ, എങ്ങനെയാണ് നിന്നോടു പറയേണ്ടത് എനിക്കറിയില്ല, നിന്റെ ദേഷ്യവും വെറുപ്പും ആ സ്നേഹത്തെ ഇരട്ടിപ്പിച്ചു കൊണ്ടിരിക്കുക ആണ്, “

“നീ എന്നോടു ഒരിയ്ക്കലും സ്നേഹം കാണിക്കണ്ട, കാരണം ഞാന്‍ ഇഷ്ടപ്പെടുന്നത് നിന്നിലെ എന്നോടുള്ള ഒരു കാരണം പോലും അറിയാത്ത ദേഷ്യത്തെ ആണ്, അതെനിക്ക് വേണം, എന്നോടു സ്നേഹം കാണിക്കാന്‍ ഒരുപാട് ഒരുപാട് പേരുണ്ട്, പക്ഷേ ദേഷ്യം കാണിക്കാ൯ നീ ഒരാള്‍ മാത്രമേ ഉള്ളൂ , നിനക് ഒരു വയ്യായ്ക പറ്റിയാല്‍ പിന്നെ എന്നോടു ആര് ദേഷ്യം കാണിക്കും,”അതിന് ഞാന്‍ സമ്മതിക്കില്ല, നീഎന്നോടു കാണിക്കുന്ന ഏതൊരു വികാരവും എന്നിലെ സ്നേഹം ആണ് കേട്ടോടി, കാന്താരി ,,,,

അവന്‍ ഇങ്ങനെ ടെറസിലേക്ക് നോക്കി തന്നെ നടക്കുവാണല്ലോ, അപ്പോ ദാണ്ടെ നമ്മുടെ ശ്രീയ നോക്കിയപ്പോ അപ്പു അവളെ നോക്കി നടന്നു പോകുന്നു. എന്തോ ഉള്ളിലെ വിഷമ൦ കൊണ്ടാകാം അവള്‍ റിയാക്റ്റ് ചെയ്യാന്‍ നില്ക്കാതെ മുഖം തിരിച്ചു.

അപ്പു ചിരിച്ചുകൊണ്ട് റൂമിലേക്ക് പോയി.

<<<<<<<<<<<O>>>>>>>>>

രണ്ടു മൂന്നു ദിവസങ്ങൾക്കു ശേഷം….

മായക്കു ഒരു വിവാഹ ആലോചന വന്നിട്ടുണ്ട്, പയ്യൻ ദുബായിൽ ആർക്കിടെക്ട് ആണ് , മിടുക്കൻ ആണ്, കുടുംബ പരമായും ഒക്കെ നല്ല ഒരു നിലയിൽ ഉള്ള ഫാമിലി ആണ്, വീട്ടുകാർക്ക് മായയെ ഇഷ്ടം ആയി, ചെറുക്കൻ സൺ‌ഡേ മായയെ കാണുവാൻ ആയി വരും എന്നാണ് അറിയാൻ കഴിഞ്ഞത്,

മായ ജോലി കഴിഞ്ഞു വീട്ടിൽ ചെന്നപ്പോൾ ആണ് ഇക്കാര്യങ്ങൾ ഒക്കെ അറിഞ്ഞത്, അവൾ ഇപ്പോൾ കല്യാണം വേണ്ട എന്ന് പറഞ്ഞു വാശി പിടിച്ചു, മായയുടെ അച്ഛൻ രണ്ടു അറ്റാക് കഴിഞ്ഞ ആൾ ആണ് , അങ്ങേർക്കും മകളുടെ കാര്യത്തിൽ വേവലാതി ഉണ്ടാകുമല്ലോ. മാത്രവും അല്ല അച്ഛന്റെ ഏറ്റവും അടുത്ത സുഹൃത്ത് കൊണ്ടുവന്ന ആലോചന ആണ്, ആ സുഹൃത്തിന്റെ സഹോദരിയുടെ മകൻ ആണ് പയ്യൻ,

എല്ലാം കൊണ്ടും മായക്കു ചേരുന്ന ഒരു നല്ല പയ്യൻ ആണ്. അതെ സമയം മായക്കു ആദി ഒരു ഇഷ്ടം ആണല്ലോ, ഒരുപക്ഷെ ഒരു ആകർഷണ൦ മാത്രമേ ആയിരിക്കാം. പക്ഷെ കല്യാണ ആലോചന എന്നൊക്കെ കേട്ടപ്പോ അവൾക്കു ആകെ വിഷമം ആയി. അവൾ അമ്മയോട് അവളുടെ ഉള്ളിലുള്ള കാര്യം തുറന്നു പറഞ്ഞു.

അവർക്ക് ആർക്കും ആദിയുടെ കാര്യം സ്വീകാര്യമേ അല്ല , ഒന്ന് അവന്റെ ട്രാജഡികൾ , അച്ഛന്റെ തിരോധാനം , വീട്ടിൽ വേറെ ആരും ഇല്ല ,കൂടാതെ സ്വന്തം എന്നും പറയാൻ ഒന്നും ഇല്ല , ഇപ്പൊ ഈ പാലിയത്തെ ജീവിതം. എങ്ങനെ ആണ് സ്വന്തം മകളെ ഇങ്ങനെ ഒരാൾക്ക് കൈപിടിച്ച് കൊടുക്കുന്നത് , നാട്ടുകാരും ബന്ധുക്കളും അറിഞ്ഞാൽ എന്തായിരിക്കും അവസ്ഥ.

ഇതിൽ ആരെയും കുറ്റം പറയാൻ സാധിക്കില്ല , കാരണം ഏതൊരു അച്ഛനും അമ്മയ്ക്കും മക്കൾ നല്ല നിലയിൽ പോണം എന്നെ ആഗ്രഹം ഉള്ളു. മായക്കു മനസിലായി, വീട്ടുകാർ എന്തായാലും സമ്മതിക്കില്ല എന്ന്. പക്ഷെ അവളുടെ വിഷമം ഒക്കെ കണ്ടപ്പോൾ അമ്മയ്ക്കും സങ്കടം ആയി, ‘അമ്മ ചോദിച്ചു നിനക്കു മാത്രമേ ഉള്ള ഇഷ്ടം അല്ലെ , ആ പയ്യന് നിന്നോട് ഉണ്ടോ എന്നുള്ളത്.

അതും ശരി അല്ലെ , ഇതിപ്പോ  വൺവേ ആയി പോകുകയാണല്ലോ, ആദിയുടെ മനസ് ആദ്യം അറിയണ്ടേ..

അങ്ങനെ പിറ്റേ ദിവസം പഴയപോലെ ഓഫീസിൽ ചെന്ന് ജോലി ഒക്കെ കഴിഞ്ഞു, അന്ന് ശനി ആയതു കൊണ്ട്, മൂന്ന് മണിയോടെ ഇറങ്ങി, ആദിയും അവളും ഒരുമിച്ചിറങ്ങി , അപ്പോൾ അവൾ ആദിയോട് കുറച്ചു സംസാരിക്കാൻ ഉണ്ട് എന്ന് പറഞ്ഞു.

അങ്ങനെ രണ്ടു പേരും ലവേഴ്സ് കോർണർ എന്ന ഒരു കഫെറ്റീരിയയിൽ പോയി, പാർക്ക് ഒക്കെ ഉണ്ട് അതിനുളിൽ, നല്ല കോഫീ ഓർഡർ ചെയ്തു.

“ആദി,,,, എനിക്ക് ഒരു കാര്യം പറയാൻ ഉണ്ടായിരുന്നു.”

“അതിനു മുഖവുര എന്തിനാ നിനക്കങ്ങു പറഞ്ഞാൽ പോരെ.”

“ആദി എനിക്ക് വീട്ടിൽ വിവാഹ ആലോചനകൾ ഒക്കെ നടക്കുകയാണ്”

“ആഹാ വളരെ നല്ല കാര്യം ആണല്ലോ ”

“അച്ഛന്റെ സുഹൃത്തിന്റെ പെങ്ങളുടെ മകൻ ആണ്, ദുബായിൽ സെറ്റിൽഡ് ആണ്, ആർകിടെക്ട് ആണ് ”

“ആഹാ അടിപൊളി, എന്നേലും ഒരുകാലത്തു വീടുപണിയുമ്പോ ഫ്രീ ആയി പ്ലാൻ വരച്ചു തരാൻ ആൾ ആയല്ലോ ”

“ആദി നീ തമാശ കളയു, ഞാൻ സീരിയസ് ആയി ആണ് സംസാരിക്കുന്നത്”

” നീ പറ പെണ്ണെ”

“ആദി,,,, നീ എനിക്ക് നല്ല സുഹൃത് ആണ്, എന്റെ ബെസ്റ്റി ആണ്, എനിക്ക് നിന്നോടൊത്തു ചിലവഴിക്കുമ്പോ ഒരു പോസിറ്റീവ്നെസ് ഫീൽ ചെയ്യുന്നുണ്ട് എപ്പോളും, നിന്റെ സംസാരം ,പെരുമാറ്റം, നിന്റെ തമാശകൾ , കെയറിങ് ഒക്കെ ”

“അതിനിപ്പോ എന്താ ”

“എനിക്ക് എങ്ങനെ ആണ് നിന്നോട് പറയേണ്ടത് എന്നറിയില്ല, പക്ഷെ പറഞ്ഞില്ലെങ്കിൽ പിന്നെ പറയാൻ സാധിച്ചില്ല എന്ന് ഉള്ളിൽ ഒരു തോന്നൽ ഉണ്ടാകില്ലേ, അതുകൊണ്ടു ആണ്‌ ”

“ഞാൻ അറിയാത്ത ഇതുവരെ കാണാത്ത ഒരാളെക്കാളും നല്ലതല്ലേ, എനിക്ക് അറിയാവുന്ന എന്നെ മനസിലാക്കുന്ന ഒരാൾ,,,, ആ ആൾ നീ ആയാൽ കുഴപ്പം ഉണ്ടോ ആദി”

ആദിക്കു അത് കേട്ടപ്പോ ശരിക്കും ചിരി ആണ് വന്നത്, അവ൯ ചിരിക്കാൻ തുടങ്ങി.

“ആദി നീ തമാശ കളിക്കല്ലേ, ഒരു മറുപടി പറയു” മായ ഒരൽപം ദേഷ്യപ്പെട്ടു.

“ഞാൻ എന്താണ് മായ പറയേണ്ടത്, നീ നല്ലൊരു കുട്ടി അല്ലെ, നിന്നെ കുറിച്ച് എന്ത് കുറ്റം ആണ് എനിക്ക് പറയാൻ ഉള്ളത്, അങ്ങനെ ചോദിച്ചാൽ ഞാൻ ഇല്ലാത്ത കാരണങ്ങൾ മനസ്സിൽ ഉണ്ടാക്കേണ്ടി വരും” മായ ആദിയെ സാകൂതം നോക്കി.

“എന്നെ കുറിച്ച് എല്ലാം അറിഞ്ഞിട്ടു പോലും എന്നെ വിവാഹം കഴിക്കാൻ ആഗ്രഹിക്കുന്നു എന്ന് പറയുന്ന പെൺകുട്ടിയെ എന്ത് പറഞ്ഞാണ് ഞാൻ തള്ളിക്കളയേണ്ടതു……. പക്ഷെ മായ നിനക്കു തോന്നിയ ഇതേ ഒരു പോസിറ്റീവ് വൈബ് ഉണ്ടല്ലോ എനിക്ക് മറ്റൊരാളോടും തോന്നിയിട്ടുണ്ട്”

അത് കേട്ടപ്പോൾ മായക്കു ഒരല്പ൦ വിഷമം ആയി.

“നിന്നെ പോലെ അല്ല മായ, എന്നോട് ഒരുപാട് ദേഷ്യം കാട്ടുന്ന ഒരു കുട്ടിയാണ്, എന്റേത് ആകുമോ എന്ന് പോലും എനിക്കറിയില്ല, അതിനൊരു സാധ്യതയും ഇല്ല,, പക്ഷെ ഉള്ളിൽ ഇങ്ങനെ പടർന്നു ആഴ്ന്നു വേര് ഇറക്കി വെച്ചേക്കുവാ ”

“ആരാ ആ കുട്ടി, പേര് എന്താ “മായ അറിയാൻ ഉള്ള ആകാംക്ഷയിൽ ചോദിച്ചു.

“പേരിൽ എന്തിരിക്കുന്നു മായ, പക്ഷെ ഞാൻ അവൾക്കു ആരും അല്ല, പക്ഷെ അവൾ എന്റെ എല്ലാം ആണ്,

എന്റെ ആത്മാവ് എന്നൊക്കെ പറയുന്ന പോലെ ,അത്രയും അത്രയും സ്നേഹമാണ്”

“എന്നെ മനസിലാക്കുന്ന മായയെ പോലെ ഒരു കുട്ടിയെ മാറ്റിനിർത്തി എന്നെ ഒരിക്കൽ പോലും സ്നേഹിച്ചിട്ടില്ലാത്ത ഒരു കുട്ടിയെ മനസ് നിറച്ചു വെക്കുമ്പോൾ ആ ഇഷ്ടത്തിന്റ തീവ്രത മനസിലാക്കാൻ സാധിക്കുന്നില്ലേ മായെ …. ”

ഹ്മ്മ് …………..മായ ഒന്ന് മൂളി.

മായക്കു വേറെ ഒന്നും പറയുവാൻ ഉണ്ടായിരുന്നില്ല,

“ആദി എന്നാലും ആരാണ് ഞാൻ അറിയാത്ത ആ കുട്ടി.”

“അവൾ എന്റെ കുറിഞ്ഞിപൂച്ച ആണ്, എന്നെ മാന്തുകയും കടിക്കുകയും ഒക്കെ ചെയ്യന്ന ഒരു കുറിഞ്ഞിപൂച്ച”