അളകനന്ദ 4 [Kalyani Navaneeth] 175

പിന്നെ ഒരു ഉരുള തരുമ്പോൾ , ആ കണ്ണിലേക്കു നോക്കി ആ കയ്യിൽ പിടിച്ചു കൊണ്ട് ഞാൻ പൊട്ടി പൊട്ടി കരഞ്ഞു കൊണ്ട് പറഞ്ഞു …. എനിക്ക് ഇഷ്ടമാണ് , ഈ ജന്മം ഒരാൾക്കും വിട്ടു കൊടുക്കാൻ എനിക്ക് ആവില്ല …. ഒരു പെണ്ണും തമാശയ്ക്കു പോലും ഒന്ന് തൊടുന്നത് ഞാൻ സഹിക്കില്ല …. വാക്കുകൾ പലയിടത്തും മുറിഞ്ഞു പോയിരുന്നു ….

അച്ഛനും അമ്മയും അടുത്തുണ്ടെന്നു പോലും ചിന്തിക്കാതെ …. ഞാൻ വീണ്ടും സാർ എന്റെയാ … എന്റെ മാത്രം എന്ന് പറയുമ്പോൾ …. ഗിരിജേ പ്രഷർ ന്റെ മരുന്ന് എടുത്തു വയ്ക്കു എന്ന് പറഞ്ഞു അച്ഛൻ അവിടെ നിന്നു പോയി .. പിറകെ അമ്മയും …..

എന്റെ തലവേദന ഒക്കെ എവിടെ പോയെന്നു എനിക്ക് തന്നെ അത്ഭുതം തോന്നി …..

അന്ന് കിടക്കാൻ നേരം ‘അമ്മ റൂമിലേക്ക് വന്നു പറഞ്ഞു …. “ഇവിടെ ഒരു പായ ഉണ്ടായില്ലേ… അത് എനിക്ക് വേണം ആ ബെഡിൽ കിടന്നിട്ടു നടു വേദനിക്കുന്നു …. ഇതിൽ ഒന്ന് കിടന്നു നോക്കട്ടെ …. “

‘അമ്മ അത് പറയുമ്പോൾ ആ പായ ഞങ്ങളുടെ റൂമിൽ നിന്നും എന്നെന്നേക്കുമായി മാറ്റിയതാണെന്നു എനിക്ക് മനസ്സിലായി …..

അന്ന് തുടങ്ങി ആ ബെഡിന്റെ ഓരം ചേർന്ന് ഞാനും കിടക്കാൻ തുടങ്ങി ..

കോളേജും , റെക്കോർഡും, സാറിനോടുള്ള പ്രണയവും ഒക്കെ ആയി ദിവസങ്ങൾ കടന്നു പോയി… ആകെ ഒരു സമാധാനം , സാർ എന്നെ സ്നേഹിച്ചു തുടങ്ങി എന്നൊരു തോന്നൽ മാത്രം ആയിരുന്നു ….

അങ്ങനെയിരിക്കെ, ഞങ്ങളുടെ കല്യാണം നടന്ന അമ്പലത്തിലെ ഉത്സവം വന്നു …. വിദ്യയേച്ചിയും വീണേച്ചിയും , കുട്ടികളും ഒക്കെ വന്നു … വീട്ടിലും ഒരു ഉത്സവ പ്രതീതി ആയി ….

ഒരു ദിവസം രാത്രി , അത്താഴം കഴിഞ്ഞു എല്ലാവരും കൂടി സംസാരിച്ചു കൊണ്ടിരിക്കുകയായിരുന്നു …. വീണേച്ചി, ഭർത്താവിന്റെ കയ്യിൽ പിടിച്ചു കൊണ്ടും, വിദ്യേച്ചി ഭർത്താവിന്റെ ചുമലിൽ ചാരിയും, ഇരുന്നു …. അച്ഛനും സാറും ഒരുമിച്ചും , ഞാൻ അമ്മയുടെ കൂടെ താഴെയും ഇരുന്നു …..

ഞാനിനി എന്നാണ് ഇങ്ങനെ സാറിന്റെ കൂടെ ചേർന്ന് ഇരിക്കയെന്നു മനസ്സിൽ കരുതി , വെറുതെ സാറിനെ ഒന്ന് നോക്കുമ്പോൾ , എന്റെ മനസ്സ് വായിച്ചെടുക്കും പോലെ,. സർ എന്നെ തന്നെ
നോക്കിയിരിക്കുകയായിരുന്നു …

ഒരു ചമ്മലോടെ ഞാൻ ആ നോട്ടം പിൻവലിച്ചു …. രണ്ടു മൂന്നു മിനിട്ടു കഴിഞ്ഞപ്പോൾ , സാർ എഴുന്നേറ്റു, ഞാൻ അമ്മയുടെ മടിയിൽ തല വച്ചു കിടന്നിട്ടു എത്ര നാളായി , എന്ന് പറഞ്ഞു കൊണ്ട് അമ്മയുടെ മടിയിൽ വന്നു കിടന്നു …..