ജിന്നും മാലാഖയും 4 ❤ [ നൗഫു ] 4236

 

“നിങ്ങൾ ജിന്നല്ലെ.. എന്റെ എല്ലാ കാര്യങ്ങളും നിങ്ങൾക്കറിയുമോ…”

 

വീണ്ടും ഒരു പുഞ്ചിരി…

 

“അറിയാം.. നിന്നെക്കുറിച്ച്‌ അള്ളാഹു എനിക്കറിവ് നൽകിയിട്ടുണ്ട്. നിന്റെ വിഷമം പോലും എനിക്കറിയാം..

 

“എന്നാലെനിക്കൊരു കാര്യം പറഞ്ഞു തരുമോ..?”

 

“ഹ്മ്മ്.. എന്റെ അറിവിലുള്ളത് പറഞ്ഞു തരാം..”

 

“എന്റെ റിവാ.. അവളെ… അവളെയെനിക്ക് കിട്ടുമോ..?”

 

എന്റെ ചോദ്യം കേട്ടു അദ്ദേഹം മിണ്ടാതിരുന്നു…

 

“കിട്ടില്ലല്ലോ.. എനിക്കിനി ഒരിക്കലും അവളെ കിട്ടില്ലല്ലോ…”

 

“ആ അറിവെനിക്കില്ല ജാസി..”

 

അദ്ദേഹം മറുപടിയായി പറഞ്ഞു..

 

“പിന്നെ എന്തിനാ നിങ്ങൾക്കെന്നെക്കുറിച്ചു എല്ലാം അറിയാമെന്നു പറഞ്ഞത്..?”

 

“ജാസി.. ചില കാര്യങ്ങൾ നമ്മളിൽ നിന്നും അള്ളാഹു മറച്ചു വെക്കും.. അതിൽ പെട്ടതാണ് ഇതും…”

 

“എനിക്കറിയാം അല്ലാഹുവിന് എന്നെ ഇഷ്ടമല്ലെന്ന്…”

 

“ജാസി.. അങ്ങനെയൊന്നും പറയാതെ…”

 

“പിന്നെ ഞാനെന്ത് പറയണം..?”

 

“ജീവിതത്തിൽ ഒരിക്കലെ ഉള്ളുതുറന്നു സ്നേഹിക്കാൻ നമുക്ക് കഴിയൂ, ആ സ്നേഹം കയ്യിൽ നിന്നും വഴുതി പോയാൽ, അതിൽ നിന്നും ഒരു തിരിച്ചു വരവ് എത്ര ബുദ്ധിമുട്ട് നിറഞ്ഞതാണ്…

 

അത് കഴിഞ്ഞു വരുന്ന ആരോടുള്ള സ്നേഹത്തിലും ഇവളും എന്നെ വിട്ടു പോകുമോന്നുള്ള ഭയം നമ്മുടെ ഉള്ളിൽ നിറയും,… ആ സ്നേഹം കാണിക്കൽ പോലും ഒരു തരം വിശ്വസമില്ലാതെ ആകില്ലേ…”

 

“ഹേയ് ജാസി അങ്ങനെ ഒന്നില്ല.. നമ്മുടെ ഉള്ളിലേക്കു സ്നേഹത്തെ ഇട്ട് തരുന്നവന് തന്നെ അതെല്ലാം മറന്നു കളയിപ്പിക്കാനുള്ള കഴിവും ഉണ്ട്, നീ കേട്ടിട്ടില്ലേ നമ്മുടെ മനസ്സിൽ ഉണ്ടാക്കുന്ന വേദനകൾ കുറച്ചു സമയത്തിന് ശേഷം മറന്നു പോകുന്നതാണ് പടച്ചോൻ മനുഷ്യന് നൽകിയ ഏറ്റവും വല്യ അനുഗ്രഹം.”