♨️മനസ്വിനി 🪔 4️⃣

Author : 𝓢𝓪𝓲 𝓥 𝓐𝓼𝓱𝓪𝓷 | Previous Part

“മെൽവി….. വൈകിട്ട് നീ വരില്ലേ ……”

ശനിയാഴ്ച ഉച്ചയ്ക്ക് വിളിച്ചപ്പോൾ അമ്മച്ചി ചോദിച്ചു…..

“ഒരീസത്തേക്ക് വരണ്ടേ അമ്മച്ചി…..”

“നീ വാടാ…. ചേച്ചിയെ കാണാൻ ഞായറാഴ്ച വരും എന്ന് പറഞ്ഞു അവര് വിളിച്ചിരുന്നു….… നീ ഇല്ലാതെ എങ്ങനെയാ….”

“അതിനു ചെറുക്കൻ ഇല്ല എന്നല്ലേ പറഞ്ഞെ….”

“എന്നാലും.. ഇവിടെ ആണുങ്ങളാരെങ്കിലും വേണ്ടേ…. അവര് കാർണോന്മാര് ഒക്കെ വരുന്നതല്ലേ….”

“മ്മ്….”

വൈകിട്ടത്തെ ബസിൽ നാട്ടിലേക്ക്… ബസിൽ കയറിയ സമയം തൊട്ട് മാനന്തവാടി ടൌൺ കഴിയുന്നത് വരെ ആരെയോ എന്റെ കണ്ണുകൾ തേടി കൊണ്ടിരുന്നു….

ഞായറാഴ്ച രാവിലെ പള്ളിയിൽ നിന്ന് മടങ്ങി വരുവഴി കുറച്ചു പലഹാരങ്ങളും ഫ്രൂട്ട്സും വാങ്ങി….

അപ്പച്ചന്റെ ഒരു പഴയ പരിചയക്കാരന്റെ സുഹുര്ത്തിന്റെ മകൻ ആണ് ചെക്കൻ… ആള് വിദേശത്തു നേഴ്സ് ആണ്… ബാക്കി ഡീറ്റെയിൽസ് ഒന്നും വിളിച്ചപ്പോൾ പറഞ്ഞില്ല… നേരിട്ട് സംസാരിക്കാം എന്ന് പറഞ്ഞു.. പതിനൊന്നു മണിയോടെ അവർ എത്തി… ചെറുക്കന് ലീവ് ഇല്ല.. അത് കൊണ്ട് ചെറുക്കന്റെ അപ്പച്ചനും അമ്മയും പിന്നെ ചേച്ചിയും ആണ് വന്നത്….

അവർക്കു ചേച്ചിയെ നന്നായി ഇഷ്ടപ്പെട്ടു… ചെറുക്കന്റെ അമ്മ കുറച്ചു മാത്രം സംസാരിക്കുന്ന കൂട്ടത്തിലാണ്.. ആ കുറവ് ചെറുക്കന്റെ ചേച്ചിയും അച്ചനും നികത്തുന്നുണ്ട്…. അവർക്ക് ഞങ്ങളെയും ഞങ്ങൾക്ക് അവരെയും നന്നായി ഇഷ്ടപ്പെട്ടു…….

ഉച്ചയൂണിന് നിൽക്കാതെ അവർ മടങ്ങി….