♨️ മനസ്വിനി 🪔3️⃣

Author : 𝓢𝓪𝓲 𝓥 𝓐𝓼𝓱𝓪𝓷 | Previous Part

 

കാണാൻ ആഗ്രഹിച്ച കുസൃതിയും എന്നിലേക്ക് വന്ന് ചേർന്ന ആ ഊർജസ്വലമായ ഹൃദയവും ഒരാൾ ആണെന്നത് എന്നെ അത്രയും സന്തോഷിപ്പിച്ചു….

‘പെണ്ണേ… ഞാൻ കാത്തിരിക്കുന്നു……’

 

രണ്ട് ദിവസത്തിനു ശേഷം ബുധനാഴ്ച വൈകിട്ട് ഞാൻ നാട്ടിലേക്കുള്ള ബസ് പിടിച്ചു….. അടുത്ത രണ്ട് ദിവസം ലീവ് ആണ്… പെസഹാ വ്യാഴവും, ദുഃഖ വെള്ളിയും….

വ്യാഴാഴ്ച രാവിലെ അമ്മച്ചിയോടും ഇച്ചേച്ചിയോടും ഒപ്പം പള്ളിയിൽ കുർബാന കൂടി… തിരിച്ചു വീട്ടിൽ എത്തിയപ്പോഴേക്കും മണി പത്ത് കഴിഞ്ഞിരുന്നു… വീട്ടിൽ എത്തിയ ഉടനെ ഞാൻ വിനീതിന്റെ വീട്ടിലേക്ക് ഇറങ്ങി….

“മെൽവി….… വേഗം വരണം ട്ടോ… ലേറ്റ് ആയാൽ അങ്ങ്‌ എത്തുമ്പോ വൈകും…….” ഇറങ്ങുമ്പോ അമ്മച്ചി പറഞ്ഞു…

“ഒരു മണിക്കൂർ… നിങ്ങള് റെഡി ആയി വീട് പൂട്ടി ഇറങ്ങുമ്പോഴേക്ക് ഞാൻ എത്തും…..”

“മ്മ്…”

ഞാൻ ചെല്ലുന്നതും കാത്തു വിനീത് ഇരിപ്പുണ്ടായിരുന്നു…. അവന്റെ അമ്മയോട് കുറച്ചു നേരം വാർത്തമാനം പറഞ്ഞു ഇരുന്നു, ശേഷം ഞങ്ങൾ ഇറങ്ങി….

അവന്റെ ബൈക്കിന്റെ പിറകിലേ യാത്രയ്ക്കിടയിൽ അവൻ ചോദിച്ചു…

 

“ഡാ… നീ എന്താ പറയാൻ ഉണ്ടെന്നു പറഞ്ഞത്….”

“നീ വണ്ടി എവിടെയെങ്കിലും ഒതുക്ക്.. എന്നിട്ട് പറയാം…”

സ്ഥിരം ചെന്നിരിക്കാറുള്ള പുഴക്കടവിലേക്ക് അവൻ വണ്ടി പായിച്ചു…

“എന്തുവാടാ ഇത്ര സീക്രെട്ട് …..??

“സീക്രെട്ട് ഒന്നും അല്ല വിനീ… പക്ഷെ… എനിക്ക് തന്നെ ഉറപ്പില്ലാത്ത കാര്യം ആയതു കൊണ്ട്….”

“ഓ… അപ്പൊ പ്രണയം ആണ് വിഷയം….”

“മ്മ്….”