ഇവാ, An Angelic Beauty Part 4[മാലാഖയുടെ കാമുകൻ] 1769

“പിടിച്ചു മാറ്റടാ ഈ നാശത്തിനെ…”

അത് കേട്ടതും പുറകിൽ നിന്നും രണ്ടുപേർ വന്നു അവളെ പിടിച്ചു മാറ്റി..
അവൾ കരഞ്ഞുകൊണ്ട് ഒരുത്തന്റെ നാഭിക്ക് ചവുട്ടി.. അതോടെ അവൻ തിരിഞ്ഞു അവളുടെ മുഖത്തിന് ആഞ്ഞു ഒരു അടി അടിച്ചു.. അവൾ ഒരു അലർച്ചയോടെ നിലത്തു വീണു..

“ശവം…”

അയാൾ അലറിക്കൊണ്ട് റോക്കിന് നെരെ നടന്നു.. അപ്പോഴാണ് ഒരു കറുത്ത കാർ അതിലെ ചീറിപ്പാഞ്ഞു പോയത്.. എന്നാൽ പോയ കാർ അലറി ബ്രേക്ക് ചെയ്തു നിർത്തി അതേപോലെ റിവേഴ്സിൽ വന്നു..

അതിൽ നിന്നും ഒരാൾ വേഗം ഇറങ്ങി.. സുമുഖനായ ഒരു ചെറുപ്പക്കാരൻ..

കമ്പി വച്ച് അടിക്കാൻ ഓങ്ങി നിന്നവൻ അയാളെ കണ്ടു ഒന്ന് പകച്ചു..

അപ്പോഴേക്കും ഇവാ വീണ്ടും ഇഴഞ്ഞുവന്നു റോക്കിന്റെ മുകളിൽ കയറി കിടന്നു.. അവൾ വിങ്ങി കരയുന്നുണ്ടായിരുന്നു.. ഒരാൾ വന്നു വീണ്ടും അവളെ വലിച്ചു പൊക്കി.

അപ്പോഴേക്കും കാറിൽ നിന്നും ഇറങ്ങിയ അയാൾ ഓടി വന്നു കമ്പി പിടിച്ചു നിന്നവന്റെ നെഞ്ച് നോക്കി ചവുട്ടിയിരുന്നു..

അവൻ അലർച്ചയോടെ തെറിച്ചു വീണു ഉരുണ്ടു.. കമ്പി തെറിച്ചുപോയി.

അയാൾ വെട്ടിത്തിരിഞ്ഞു ഇവയെ പിടിച്ചിരുന്ന ഒരുവന്റെ മുഖം നോക്കി ഒന്ന് പൊട്ടിച്ചു..

അപ്പോഴേക്കും മറ്റവൻ ഇവയെ അയാളുടെ നേരെ തള്ളിയിട്ടു ഓടി ജീപ്പിൽ കയറി.. ബാക്കി ഉള്ളവരും ഓടി ചെന്നു വണ്ടിയിൽ കയറിയതും ജീപ്പ് അകന്നുപോയി.. അയാൾക്ക് ഒന്നും ചെയ്യാനായില്ല..

“റോക്ക്…”

ഇവ നിലത്തേക്ക് ഇരുന്നു..

അയാൾ അവളുടെ കൈക്ക് പിടിച്ചുകൊണ്ടു നിലത്തുകിടന്ന റോക്കിനെ നോക്കി..