🔱കരിനാഗം 7🔱

Author : ചാണക്യൻ

[ Previous Part ]

 
“സഞ്ജീവ് കപൂർ”

മറുവശത്തുള്ള ആൾ പറഞ്ഞ പേര് കേട്ട് ഒരു നിമിഷം മഹിയൊന്ന് നടുങ്ങി.

“എന്റെ കീഴിലുള്ള വേശ്യാലയത്തിൽ കേറി നീ കളിച്ചപ്പോൾ നീ ഓർത്തില്ലല്ലേ ഞാൻ നിന്നെ തേടി വരുമെന്ന്……ഇനി നമുക്ക് ഒളിച്ചും പാത്തും കളിക്കാം ഞാൻ കുറുക്കൻ നീ മുയൽ നിന്റെ സ്വന്തം അമ്മയെ ഞാൻ കടത്തിക്കൊണ്ട് വന്നിട്ടുണ്ട്….
ഹാ…..ഹാ….. ഹാ”

അതും പറഞ്ഞുകൊണ്ട് സഞ്ജീവ് കപൂർ ഉറക്കെ ഉറക്കെ പൊട്ടി ചിരിച്ചു.

“സഞ്ജീവ്ജീ എന്റെ അമ്മയെ ഒന്നും ചെയ്യരുത് പ്ലീസ്…….എന്നെ എന്തു വേണമെങ്കിലും ചെയ്തോ ”

മഹി ഇടർച്ചയോടെ പറഞ്ഞൊപ്പിച്ചു.

അവന്റെ കണ്ണുകൾ നിറഞ്ഞു വന്നു.

രാധമ്മയെ അവർ ഉപദ്രവിക്കുമോ എന്നോർത്ത് അവന്റെ മനസ് വിങ്ങി.

“നീ വാടാ…. നീ വന്നു നിന്റെ അമ്മയെ രക്ഷിച്ചിട്ട് പോ….നീ വരേണ്ട സ്ഥലം ഞാൻ നിനക്ക് മെസ്സേജ് ചെയ്യാം….നീ വരാൻ വൈകുന്ന ഓരോ നിമിഷവും നിന്റമ്മ മരണത്തിലേക്ക് അടുത്തുകൊണ്ടിരിക്കുന്നു”

അതും പറഞ്ഞുകൊണ്ട് അയാൾ ഫോൺ കാൾ കട്ട്‌ ചെയ്തു.

അതു കേട്ടതും അവൻ ഞെട്ടിത്തരിച്ചിരുന്നു.

മഹി ഒന്നും മിണ്ടാനാവാതെ തലക്ക് കൈ വച്ചിരുന്നു.

ഇതുപോലൊരു സമസ്യ ഇതുവരെ ജീവിതത്തിൽ താൻ നേരിട്ടിട്ടില്ല.

എവിടെയാണ് പിഴച്ചതെന്ന് ഓർത്തിട്ട് ഒരെത്തും പിടിയും കിട്ടുന്നില്ല.

ഓർക്കുംതോറും കണ്ണുകൾ നിറഞ്ഞൊഴുകുന്നു.

നെഞ്ചിനുള്ളിലാരോ കഠാര കുത്തിയിറക്കിയ വേദനയും നീറ്റലും അനുഭവപ്പെടുന്നു.

ഫോണിലെ നോട്ടിഫിക്കേഷൻ സൗണ്ട് വന്നതും അവൻ മെസ്സേജ് എടുത്തു നോക്കി.

ജോധ്പൂറിലെ പൂട്ടി കിടക്കുന്ന കപൂർ ബിസ്ക്കറ്റ് ഫാക്ടറി.

വേഗം ഫോൺ പോക്കറ്റിലേക്കിട്ട് അവൻ ജീപ്പ് തിരിച്ചെടുത്തു.

വിജനമായ ആ റോഡിലൂടെ ഇരുളിനെ കീറിമുറിച്ചുകൊണ്ട് അവൻ യാത്രയായി.

മനസിൽ ഒരു ലക്ഷ്യം മാത്രം.

തന്റെ രാധമ്മ.

തന്റെ ജീവൻ പണയപ്പെടുത്തിയിട്ടാണേലും രാധമ്മയെ രക്ഷിക്കണം.

ആക്‌സിലേറ്ററിൽ അവന്റെ കാൽ അമർന്നു.