?കരിനാഗം 19? [ചാണക്യൻ] 378

ആ കഠാരയുടെ പിടി സർപ്പിള ആകൃതിയിൽ ആയിരുന്നു.

തിളങ്ങുന്ന മൂർച്ചയേറിയ ഒന്ന്.

അതിനെ തൊട്ടു വണങ്ങിയ ശേഷം മാന്ത്രിക അവർക്ക് സമീപമെത്തി.

കൈകകളിൽ കഠാരയുമായി വന്ന മാന്ത്രികതയെ കണ്ടപ്പോൾ തന്നെ കാര്യങ്ങളുടെ കിടപ്പ് വശം ബർഗരീകന് ഊഹിക്കാവുന്നതേയുണ്ടായിരുന്നുള്ളു.

ഭാര്യ കൊണ്ടു വന്ന  കഠാരയെ വന്ദിച്ച ശേഷം കങ്കാണി ആ കഠാര പതിയെ ഉയർത്തി പിടിച്ചു.

എന്നിട്ട് തള്ള വിരലിൽ കഠാരയുടെ മുന കൊണ്ട് പോറിയ ശേഷം അതിൽ നിന്നുമിറ്റ രക്തതുള്ളികൊണ്ട് ബർഗരീകന്റെ നെറ്റിയിൽ തിലകം ചാർത്തി.

മാന്ത്രികയും അതുപോലെ തന്നെ തള്ളവിരലിൽ പോറലേർപ്പിച്ച് രക്ത തുള്ളികൊണ്ട് വീണ്ടും ബർഗരീകന്റെ നെറ്റിയിൽ തിലകം ചാർത്തി.

എന്നിട്ട് ഇരുവരും തങ്ങളുടെ കരം നീട്ടി പിടിച്ചുകൊണ്ട് വീശിഷ്ടമായ ആ കഠാരയെ സാക്ഷിയാക്കി സത്യം ചെയ്തു.

ഞങ്ങൾ കരിനാഗ വംശജർ വീശിഷ്ടമായി കരുതി പോരുന്ന ആയുധത്തെ സാക്ഷിയാക്കി, ഈ പാതാളലോകത്തെ സാക്ഷിയാക്കി ഞങ്ങൾ ആദരവോടെ വഹിക്കുന്ന ചിന്താമണി രത്നം സാക്ഷിയാക്കി സത്യം ചെയ്യുന്നു……. ഞങ്ങളുടെ ചക്രവർത്തി ബർഗരീകന്റെ സന്തതികളെ ഞങ്ങൾ പ്രാണൻ വെടിയും വരെ സംരക്ഷിച്ചിരിക്കും…….. ഇത് സത്യം……. സത്യം ലംഘിച്ചാൽ തത്ക്ഷണം ഞങ്ങൾ മൃത്യു വരിക്കും.

ഇരുവരും ഉറച്ച ശബ്ദത്തിൽ സത്യം ചെയ്യുന്നത് കേട്ട് ബർഗരീകൻ അഭിമാന പുളകിതനായി.

ഇങ്ങനൊരു പ്രജകളെ സ്വന്തമാക്കിയതിന്.

അവരെ ബർഗരീകന് പരിപൂർണ വിശ്വാസമായിരുന്നു.

ചക്രവർത്തി……. അങ്ങയുടെ സന്താനങ്ങൾക്ക് ജനനം നൽകാൻ ഭാഗ്യം ലഭിച്ച ആ തരുണീമണി ആരാണ്? ചൊല്ലിയാലും?

മാന്ത്രിക ആകാംക്ഷയോടെ ചോദിച്ചു.

കാരണം വീരാധിവീരനും  കണ്കണ്ട  ദൈവവുമാണ് ബർഗരീകൻ കരിനാഗജരെ സംബന്ധിച്ചോളം.

ഒരുപാട് യുവതികൾ അദ്ദേഹത്തെ പ്രതിശ്രുത വരനായി കാംക്ഷിക്കുന്നുണ്ട്.

അദ്ദേഹത്തിന്റെ സത്കീർത്തികൾ കേട്ടാണ് ദേവശില്പിയായ വിശ്വകർമാവ് പോലും സൂര്യധൂളികൾ കടഞ്ഞെടുത്ത് മഹത്തായ വജ്രകേയം പോലും നിർമിച്ചു നൽകിയത്.

കരിനാഗർജർക്ക് കിട്ടിയ ഏറ്റവും വലിയ അംഗീകാരം.

അത്‌ മറ്റു നാഗവംശജരെ പ്രതിസന്ധിയിലാക്കി എന്ന് വേണം പറയാൻ.

ദിനം പ്രതി അവരുടെ അസൂയ കൂടി കൂടി വന്നു

പ്രത്യേകിച്ചും വെള്ളിനാഗ വംശജെർക്ക്.

മാന്ത്രികയുടെ ചോദ്യം ബർഗരീകന്റെ കാതിൽ അലയടിച്ചു കൊണ്ടിരുന്നു.

തന്റെ സന്താനങ്ങളെ ഉദരത്തിൽ പേറുന്ന ആ തരൂണിമണി.

അതാരാണ്?

ആ ചോദ്യം ബർഗരീകന്റെ ചുണ്ടിൽ നനുത്തൊരു പുഞ്ചിരി സമ്മാനിച്ചു.

ആ ചോദ്യത്തിനു ഉത്തരം പറയാൻ നിർവാഹമില്ല മാന്ത്രിക…….. അതൊരു രഹസ്യമായി നില നിൽക്കട്ടെ..

തന്റെ മനസിലെ ഞെട്ടിപ്പിക്കുന്ന സത്യം പുറത്തു വരാതിരിക്കാൻ അദ്ദേഹം പാട് പെട്ടു.

പൊടുന്നനെ ബർഗരീകൻ ആ വസതിയുടെ മുന്നിൽ വച്ച ഭാണ്ഡക്കെട്ട് പുറത്തെടുത്തു.

അതിൽ സ്ഫടിക നിർമിതമായ ഒരു പൂമൊട്ട് ഉണ്ടായിരുന്നു.

സാമാന്യം വലിപ്പമുള്ളത്.