?കരിനാഗം 17? [ചാണക്യൻ] 410

കോളജിലെ ക്ലാസ്സ്‌ ഒക്കെ കഴിഞ്ഞതും മഹി ധൃതിയിൽ ഓടി വന്നു ജീപ്പിന്റെ ഡോർ തുറന്നു.

പക്ഷെ നിരാശയായിരുന്നു ഫലം.

സീറ്റിൽ റോസാപൂവുമുണ്ടായിരുന്നില്ല ഉള്ളിൽ ചന്ദനഗന്ധവും ഉണ്ടായിരുന്നില്ല.

മഹി ആ സീറ്റിനു അടിവശം ഒക്കെ പരിശോധിച്ചു.

റോസാപൂ മാത്രം കണ്ടു കിട്ടിയില്ല.

മഹി നിരാശയോടെ സ്റ്റീറിങ്ങിൽ ഇടിച്ചിട്ട് പതിയെ ഡ്രൈവിംഗ് സീറ്റിലേക്ക് ഇരുന്നു.

ഇന്ന് ആ പെൺകുട്ടി കോളജിൽ വന്നിട്ടുണ്ടാകില്ലെന്ന നിഗമനത്തിലായിരുന്നു മഹി അന്നേരം.

എന്നിട്ട് ജീപ്പ് ഓൺ ചെയ്തു റോസ്മേരിയുടെ വീട് ലക്ഷ്യമാക്കി ഓടിച്ചു തുടങ്ങി.

ഇന്ന് മഹി‌യെ സംബന്ധിച്ചു നിരാശയുടെ ദിനം ആയിരുന്നു.

നിരാശയുടേത് മാത്രം.

——————————————————–

മാതംഗിയമ്മേ…….. രാജകുമാരനെ കാണുന്നില്ല

ഫാർമസിയിലേക്ക് ഓടിയെത്തിയ വാമിഖ നന്നേ അണയ്ക്കുന്നുണ്ടായിരുന്നു.

കാണുന്നില്ലെന്നോ? എവിടെപ്പോയി രാജകുമാരൻ?

മാതംഗി ഭയപ്പാടോടെ നെഞ്ചിൽ കൈ വച്ചു അലറി.

അറിയില്ല മാതംഗിയമ്മേ…… മുറിയിൽ എവിടെയും കുമാരനെ കാണുന്നില്ല…… ഞാൻ ഈ ഹോസ്പിറ്റൽ പരിസരം മൊത്തം വീക്ഷിച്ചു…… എവിടെയും കുമാരന്റെ സാന്നിധ്യം കാണുന്നില്ലാ

വാമിഖ വിറച്ചുകൊണ്ടാണ് പറയുന്നത്.

ഞാനിനി ജ്യേഷ്ഠനോടും യക്ഷമിയോടും എന്ത് മറുപടി പറയും? നമ്മുടെ കയ്യിൽ അല്ലെ കുമാരനെ ഭദ്രമായി ഏൽപ്പിച്ചു അവർ പോയത്……. തിരികെ വരുമ്പോൾ ഞാൻ എന്ത് മറുപടി കൊടുക്കും?

മാതംഗി ഉഴറുന്ന മനസോടെ തലയിൽ കൈ വച്ചു പുലമ്പി.

വിവരം അറിഞ്ഞു അപ്പോഴേക്കും ബ്രഹസ്പതിയും യക്ഷമിയും അവിടെ സന്നിഹിതരായിരുന്നു.

പരസ്പരം കുറ്റപ്പെടുത്തിയിട്ട് ഒരു കാര്യവുമില്ലെന്ന് അറിയുന്നത് കൊണ്ട് തന്നെ അവർ നേരെ സെക്യൂരിറ്റി റൂമിലേക്ക് പോയി.

അവിടെ CCTV വിഷ്വൽസ്‌ ചെക്ക് ചെയ്യാനായിരുന്നു അവരുടെ നീക്കം.

അവിടുത്തെ ഓഫീസറുടെ സഹായത്തോടെ വിഷ്വൽസ് ചെക്ക് ചെയ്ത യക്ഷമിയും ബ്രഹസപ്തിയും ഒരുപോലെ ഞെട്ടി.

ഹോസ്പിറ്റൽ എൻട്രൻസിലൂടെ നിർഭയം നടന്നു വരുന്ന രുദ്രരൂപ.

ഒരു ഇളം നീല നിറമുള്ള ചുരിദാറും കറുത്ത ലെഗ്ഗിൻസും ആണ് വേഷം.

എൻട്രൻസിലൂടെ കയറി വന്ന രുദ്രരൂപ ഓരോ ഫ്ലോറും കയറി വന്നു അലോകിന്റെ റൂമിന്റെ ഡോർ തുറന്നു ഉള്ളിലേക്ക് കയറുന്ന വരെ വിഷ്വൽസിൽ വ്യക്തമായി കാണാമായിരുന്നു.

എന്നാൽ രുദ്രരൂപ തിരികെ മടങ്ങുന്നത് മാത്രം വിഷ്വൽസിൽ ഇല്ല.

രാജകുമാരൻ അലോക് രുദ്രയുടെ കൈപ്പിടിയിൽ ആവുമെന്ന് അവർ ഊഹിച്ചു.

ബ്രഹസപതിയും യക്ഷമിയും വാമിഖയും പകൽ തൊട്ട് തുടങ്ങിയ തിരച്ചിൽ രാത്രി വരെ നീണ്ടു.

ഒരു ഗുണവുമുണ്ടായിരുന്നില്ല എന്ന് വേണം പറയാൻ.