?കരിനാഗം 16?[ചാണക്യൻ] 325

തന്റെ മുന്നിൽ ഭയത്തിന്റെ ഒരു കണിക പോലും കാണാനിട വരുത്താത്ത ആ മിഴികളുടെ ഉടമയെ താത്രിയുടെ ഓർമകളിൽ നിന്നും രുദ്രരൂപ തിരിച്ചറിഞ്ഞു.

യക്ഷമി……………..

അതേ യക്ഷമി തന്നെ.

കരിനാഗ രാജകുമാരിയായ യക്ഷമി മാത്രം രുദ്രരൂപയെ കണ്ടിട്ട് കുലുങ്ങിയില്ല.

പകരം ഒരു പ്രത്യാക്രമണത്തിന് തയാറായിട്ടായിരുന്നു യക്ഷമിയുടെ നിൽപ്.

അതും രുദ്രയെ അത്ഭുതപ്പെടുത്തി.

രുദ്രയും യക്ഷമിയുടെ കീർത്തികൾ ഒരുപാട് കേട്ടിട്ടുണ്ടെങ്കിലും നേരിട്ട് കാണുന്നത് ആദ്യമായിട്ടാണ്.

കൊള്ളാം യക്ഷമി….. നിന്നിലെ ധൈര്യം, ആവേശം, ആക്രമണോത്സുകത എന്നിവയെ നാം അഭിനന്ദിക്കുന്നു….. കേവലം എന്റെ നാമം കേട്ട് ഈ കരിനാഗങ്ങൾ പോലും ഭയന്നു വിറച്ചപ്പോൾ നീ മാത്രം അതിൽ നിന്നും വ്യത്യസ്ത പുലർത്തി……. എനിക്ക് ഒത്ത എതിരാളിയെ കിട്ടിയതിൽ നാം ആനന്ദിക്കുന്നു….. എന്നാൽ ഇന്ന് നാം ഇവിടേക്ക് ആഗതയായത് നിങ്ങളെ ആക്രമിക്കുവാനല്ല പകരം നിങ്ങളെ ഓർമിപ്പിക്കുവാനാണ്….. നിങ്ങൾക്ക് പുറകെ ഞാനുണ്ടെന്ന്…… നിങ്ങളുടെ ഊണിലും ഉറക്കത്തിലും എന്തിനേറെ പറയണം സ്വപ്നങ്ങളിൽ പോലും രുദ്രരൂപയുടെ സാന്നിധ്യമറിയണം…… അങ്ങനെ നിങ്ങൾ ഭയന്നു വിറക്കണം ഓരോ നിമിഷവും….. അത്‌ ആസ്വദിച്ചുകൊണ്ട് ഞാൻ എന്റെ കർമ്മം പൂർത്തിയാക്കും…… കേവലം കരിനാഗങ്ങളെ വധിക്കുകയെന്നതല്ല നമ്മുടെ ലക്ഷ്യം….. നാം വന്നിരിക്കുന്നത് നിങ്ങളുടെ രാജകുമാരനു വേണ്ടിയാണ്…… അലോക് എന്ന് നാമമുള്ള ആ നാഗത്തിന് വേണ്ടി……. ഞാൻ കണ്ടെത്തിയിരിക്കുന്നു നിങ്ങളുടെ രാജകുമാരനെ…… അതിന് എനിക്ക് വേണ്ടി വന്നത് നിങ്ങളുടെ സന്ദേശവാഹകയുടെ മരണം മാത്രം……. ഞാൻ പോകുകയാണ് നിങ്ങളുടെ രാജകുമാരനെ വധിക്കുവാനായി….. അതും കൊടും ക്രൂരതയോടെ…….. ഹ………. ഹ………. ഹ……… ഹ

രുദ്രരൂപ അതും പറഞ്ഞുകൊണ്ട് പൊടുന്നനെ അപ്രത്യക്ഷയായി.

എല്ലാ കരിനാഗങ്ങളും ഒരുപോലെ ഞെട്ടിയിരിക്കുകയാണ്.

കൂട്ടത്തിൽ യക്ഷമിയും.

അവരെക്കാൾ ഒരുപടി മുകളിലാണ് രുദ്രയുടെ നീക്കങ്ങളെന്ന് യക്ഷമി ഇപ്പോഴാണ് തിരിച്ചറിഞ്ഞത്.

മാതംഗി നിറ കണ്ണുകളോടെ നിലത്തേക്ക് ഊർന്നു വീണു.

നൂറ്റാണ്ടുകളായി അവർ കാത്തിരിക്കുന്ന മോക്ഷവും കരിനാഗ രാജ്യത്തേക്കുള്ള മടക്കവും ഇനി ഒരിക്കലും അപ്രാപ്യമാവില്ലെന്ന് കരിനാഗജർ കരുതി.

രുദ്രയുടെ കണ്ണ് വീണു കഴിഞ്ഞാൽ കുമാരന്റെ കാര്യം ദുരിതത്തിൽ ആവുമെന്ന് ബ്രഹസ്പതിക്ക് അറിയാമായിരുന്നു.

ഒരു സേനാധിപതി ഒരിക്കലും തളരാൻ പാടില്ലല്ലോ.

അതുകൊണ്ട് തന്നെ അദ്ദേഹം രുദ്രയിൽ നിന്നും കുമാരനെ രക്ഷിക്കുന്നതിനായി ഓരോ പദ്ധതികൾ തയാറാക്കികൊണ്ടിരുന്നു.

താത്രിയുടെ മരണം അവരെ അതിലധികമായി തളർത്തി.

ഉടൻ തന്നെ അവരുടെ സങ്കേതം മറ്റൊരിടത്തേക്ക് മാറ്റുവാൻ തീരുമാനിച്ചു.

അതോടൊപ്പം താത്രിയുടെ വീട്ടിൽ പോയി അവിടുത്തെ നിജസ്ഥിതികളറിഞ്ഞു തിരികെ പോന്നു.

എല്ലാവരും കടുത്ത ദുഃഖത്തിലാണ്.

എങ്കിലും ബ്രഹസ്പതി തങ്ങളുടെ നന്മക്കായി പറഞ്ഞു തുടങ്ങി.

ഒരിക്കൽ പോലും പ്രതീക്ഷിച്ചിരുന്നില്ല രുദ്രരൂപയുടെ ഇത്തരമൊരു നീക്കം….. അതിനാൽ തന്നെ നമ്മുടെ വാസസ്ഥലം മറ്റൊരിടത്തേക്ക് പുനസ്ഥാപിക്കാൻ പോകുകയാണ്….. ഒപ്പം നമ്മുടെ രാജകുമാരനു കർശനമായ സുരക്ഷയും പ്രദാനം ചെയ്യുന്നതാണ്…… കഴിഞ്ഞ നാലു തവണയും രുദ്രരൂപ കരിനാഗ രാജകുമാരന്മാരെ നമ്മളിൽ നിന്നും കവർന്നെടുത്തു….. എന്നാൽ ഇത്തവണ അങ്ങനൊരിക്കലും സംഭവിക്കരുത്….. അലോക് തന്നെയാണ് നമ്മുടെ ശ്രേഷ്ഠ നാഗത്തിന്റെ അംശാവതാരം…… അതിനാൽ നാം തന്നെ ഒരു മതിൽ പോലെ കുമാരനു മുന്നിൽ അണിനിരക്കേണ്ടതുണ്ട്.

ബ്രഹസപതി പറയുന്നത് കേട്ട് എല്ലാവരും ഒരുപോലെ തലയാട്ടി.

നമ്മളെ രക്ഷിക്കേണ്ട രാജകുമാരനു നമ്മൾ സുരക്ഷ കൊടുക്കുന്നതിലെ വിരോധാഭാസം എനിക്ക് മനസിലാവുന്നില്ല സേനാധിപതെ