?കരിനാഗം 16?[ചാണക്യൻ] 325

ഒപ്പം അവ്യക്തമായ ശബ്ദവീചികൾ പുറപ്പെടുവിച്ചു.

ആ പുകച്ചുരുൾ പൂർണമായി രുദ്രയിലേക്ക് ആവേശിച്ചതും അവളുടെ ശരീരം വായുവിലേക്കുയർന്ന് തറയിലടിച്ചു വീണതും ഒരുമിച്ചായിരുന്നു.

അൽപ നേരം കഴിഞ്ഞതും രുദ്രരൂപ കിടന്ന കിടപ്പാലെ കണ്ണുകൾ തുറന്നു.

എന്നിട്ട് സാവധാനം എഴുന്നേറ്റു.

അത്രത്തോളം അവൾ ക്ഷീണിതയായിരുന്നു.

അതു മാത്രമല്ല ഇപ്പൊ അവളുടെ ഒരു കണ്ണിന് മാത്രമേ കാഴ്ച ബാക്കിയുണ്ടായിരുന്നുള്ളു.

ഇടത് തോളും കയ്യും മരവിച്ച പോലെ.

അവ തളർന്നിരിക്കുന്നു.

സർപ്പങ്ങൾക്ക് നിഷിദ്ധമായ ചിന്താമണി രത്നത്തിൽ നിന്നും പ്രത്യക്ഷ ബന്ധം ഉണ്ടായതിന്റെ പ്രത്യാഘാതങ്ങൾ ആയിരുന്നു ഇവ.

രുദ്ര അത്‌ പ്രതീക്ഷിച്ചതുമാണ്.

കാരണം ഇവിടെ ഇപ്പൊ കൊടിയ മന്ത്രപ്രയോഗത്തിലൂടെ ചിന്താമണി രത്നത്തിന്റെ അതുല്യമായ ശക്തി സ്രോതസിനെ മറി കടന്ന് അതിനെ കീഴ്പ്പെടുത്തിയിരിക്കുന്നു.

അതിലൂടെ താത്രിയുടെ ഓർമ്മകൾ മാത്രം രുദ്രരൂപ സ്വാംശീകരിച്ചിരിക്കുന്നു.

അതാണ് തിളങ്ങുന്ന ഒരു സർപ്പ രൂപത്തിൽ രുദ്രയിലേക്ക് ആവാഹിച്ചത്.

ഒരു ദീർഘനിശ്വാസം എടുത്ത ശേഷം രുദ്രരൂപ കൊലചിരിയോടെ അലറി.

കരിനാഗജരുടെ രാജകുമാരനെ ഞാൻ കണ്ടെത്തി……… അലോക്…….. അലോക്…….. അലോക്……… ഹ……. ഹ…….ഹ

ആ സർപ്പക്കാവ് പ്രകമ്പനം കൊള്ളുന്ന കണക്കെ രുദ്രരൂപ അട്ടഹസിച്ചു

അത്രയ്ക്കുണ്ടായിരുന്നു രുദ്രയിലെ ആവേശം.

അവൾ കാറ്റുപോലെ പുറത്തേക്ക് പാഞ്ഞു പോയി.

കാരണം അന്തിമ വിജയം കൈവരിച്ചെന്ന് അവൾ കരുതി.

താത്രിയുടെ ഓർമകളിലൂടെ അലോകിലേക്ക് എത്തിച്ചേരമെന്ന് അവൾ കണക്ക് കൂട്ടി.

ഏതുവിധേനയും.

——————————————————–

ആയുധ വിദ്യയുടെ ആദ്യ ദിനം വിജയകരമായി പൂർത്തീകരിച്ച അലോക് എല്ലാവരോടും യാത്ര പറഞ്ഞുകൊണ്ട് കരിനാഗങ്ങളുടെ വാസസ്ഥലത്ത് നിന്നും യാത്രയായി.

ഒപ്പം വാമിഖയും ഉണ്ട്.

അവർ പോയി കഴിഞ്ഞതും യക്ഷമിയും ബ്രഹസ്പതിയും മാദ്രിയമ്മയും മാതംഗിയും കൊച്ചു വാർത്തമാനങ്ങളുമായി ആ ചോലയുടെ കരയിൽ ഇരിക്കുകയായിരുന്നു.

ആ സമയം അവരുടെ ആറാം ഇന്ദ്രിയം പൊടുന്നനെ തുടിച്ചു.

അടുത്തെവിടെയോ ഒരു സർപ്പത്തിന്റെ സാന്നിധ്യമറിയിച്ചുകൊണ്ട്.