?കരിനാഗം 16?[ചാണക്യൻ] 325

താത്രിയെന്ന കരിനാഗിനിയുടെ മരണം ഉറപ്പിച്ച ശേഷം രുദ്രരൂപ മടങ്ങി.

താത്രിയുടെ വീട് ഒരു കൊലക്കളത്തിന് സമാനമായി മാറി.

താത്രിയുടെ വീട്ടിൽ നിന്നും മടങ്ങിയ രുദ്രരൂപ ചെന്നെത്തിയത് രേവതിയുടെ വീടിന് പിന്നിലുള്ള സർപ്പകാവിൽ ആയിരുന്നു.

ചിത്രകൂടത്തിന് മുന്നിലെത്തിയ രുദ്ര മുന്നോട്ട് നോക്കി.

അവിടെ ചിത്രകൂടത്തിന് പിന്നിലായി വലിയൊരു ആൽമരം സ്ഥിതി ചെയ്യുന്നുണ്ട്.

ഒരുപാട് പഴക്കമുള്ളത്.

അതിന്റെ താഴെയായി ഒരു സർപ്പ രൂപം ആ മരത്തിൽ കൊത്തി വച്ചിട്ടുണ്ട്.

ആ രൂപത്തിന്റെ വാൽ ഭാഗം മുകളിലെ ശിഖരത്തിലേക്ക് നീളുന്നുണ്ട്.

ഇഴഞ്ഞു പോകുന്ന ഒരു സർപ്പത്തിന്റെ രൂപമായിരുന്നു അത്‌.

അതിൽ അതിന്റെ ശിരസ്സിലായി രണ്ടു കണ്ണുകളും അതിന്റെ മധ്യത്തിലായി വൃത്തകൃതിയിൽ ഒരു ചെറിയ തുളയും കാണാം.

ആ രൂപത്തിൽ നിന്നും നാവ് നീണ്ടിരിക്കുന്നതും അതി മനോഹരമായി കൊത്തി വച്ചിട്ടുണ്ട്.

അത്‌ കണ്ടു നിൽക്കെ കുടില ചിരിയോടെ രുദ്രരൂപ തന്റെ ഉള്ളം കൈ നിവർത്തി.

അതിൽ വിശ്രമിക്കുന്ന താത്രിയുടെ ചിന്തമാണി രത്നത്തിന്റെ ചെറിയൊരു അവശിഷ്ടം.

രുദ്രരൂപ ആ അവശിഷ്ടം ആ സർപ്പ രൂപത്തിന്റെ നെറ്റിയിലുള്ള തുളയിൽ പതിയെ കയറ്റി വച്ചു.

ശേഷം ചിത്രകൂടത്തിന് മുന്നിൽ ചമ്രം പടിഞ്ഞിരുന്നു.

എന്നിട്ട് മിഴികൾ പൂട്ടി വച്ചു മന്ത്രജപം തുടങ്ങി.

കൊടിയ മന്ത്രപ്രയോഗം നടത്തിയപ്പോൾ മരത്തിലെ സർപ്പ രൂപത്തിൽ തറച്ചിരുന്ന ചിന്താമണി രത്നത്തിന്റെ അവശിഷ്ടം ഒന്നു മിന്നി തിളങ്ങി.

ശേഷം ആ തിളക്കം ആ സർപ്പരൂപത്തിലേക്ക് കൂടി വ്യാപിച്ചു.

എന്നിട്ട് തിളക്കത്തോടെ ആ രൂപം പയ്യെ ഒന്നനങ്ങി.

പതിയെ ആ സർപ്പ രൂപം മരത്തിലൂടെ ഇഴഞ്ഞു ശിഖരങ്ങളിലൂടെ മുകളിലേക്ക് നീങ്ങി.

രുദ്രരൂപ മനക്കണ്ണാലെ ഇതൊക്കെ കാണുന്നുണ്ടായിരുന്നു.

ആ ആൽമരത്തിന്റെ ശിഖരങ്ങളിലൂടെ സഞ്ചരിച്ചു തിളങ്ങുന്ന ആ സർപ്പ രൂപം പതിയെ മറച്ചുവട്ടിലേക്ക് ഇഴഞ്ഞെത്തി.

ഈ സമയം മന്ത്രജപം നിർത്തിയ രുദ്രരൂപ പയ്യെ തന്റെ നേർത്ത മിഴികൾ തുറന്നു.

ആ നിമിഷം തന്നെ ആ സർപ്പ രൂപം മരത്തിൽ നിന്നും എടുത്തു ചാടി രുദ്ര രൂപയെ പിടി കൂടി.

ശേഷം ആ രൂപം രുദ്രയുടെ വായിലൂടെയും മുക്കിലൂടെയും ഒരു പുകച്ചുരുൾ പോലെ പ്രവേശിക്കുവാനായി തുടങ്ങി.

ചമ്രം പടിഞ്ഞിരുന്ന രുദ്രരൂപ പിടച്ചിലോടെ പിന്നിലേക്ക് മറിഞ്ഞു വീണു.

കിടന്ന കിടപ്പാലെ രുദ്ര തിരിയാനും മറിയാനും തുടങ്ങി.

മിഴികൾ കലങ്ങി മറിഞ്ഞു.