?കരിനാഗം 10? [ചാണക്യൻ] 514

അലോകിനെ കണ്ടതും ബ്രഹസ്പതി തന്റെ അരപ്പട്ടയിലെ ആയുധമായ ഉടവാൾ വലിച്ചെടുത്തു മുട്ടു കുത്തി നിന്ന് രാജകുമാരനെ വണങ്ങി.

അലോക് തലയാട്ടിയതും ബ്രഹസ്പതി പതിയെ എണീറ്റ് നിന്നു.

അലോക്…… ഇതാണ് മാതംഗി അമ്മയും മാദ്രിയമ്മയും……. ബ്രഹസ്പതിയുടെ സഹോദരിയാണ് മാതംഗിയമ്മ…… മാതംഗിയമ്മയുടെ അമ്മയാണ് മാദ്രിയമ്മ

തനിക്ക് സമീപം ഉള്ളവരെ പരിചയപ്പെടുത്തിക്കൊണ്ട് വാമിഖ പറഞ്ഞു.

അവരെ നോക്കി ഒരു നേർത്ത പുഞ്ചിരി നൽകി അലോക്.

അവരും ഒരുപോലെ രാജകുമാരനെ വണങ്ങി.

അത്‌ കഴ്ഞ്ഞപ്പോഴാണ് വാമിഖ ചുറ്റും ഒന്നു തല ചരിച്ചു നോക്കിയത്.

പ്രതീക്ഷിച്ച ആളെ കാണാഞ്ഞതും അവളുടെ മുഖം കറുത്തു.

യക്ഷമി എവിടെ മാതംഗിയമ്മേ?

ഭൂമിയിലേക്ക് അതിക്രമിച്ചു കയറിയ ഒരു സർപ്പ വംശജനെ വധിക്കുവാനായി പോയിരിക്കുകയാണ്.

മാതംഗി അഭിമാനത്തോടെ പറഞ്ഞു.

നല്ലതുതന്നെ……എങ്കിലും ഈ ധന്യമായ നിമിഷത്തിൽ യക്ഷമിയുടെ സാന്നിധ്യം ഞാനും ആഗ്രഹിച്ചിരുന്നു…. പ്രത്യേകിച്ചും രാജകുമാരൻ ആഗതനായ ഈ വേളയിൽ.

വാമിഖ പറയുന്നത് ശരിയാണെന്ന് മാതംഗിക്കും തോന്നി.

ഉടനെ തന്നെ അവർ കണ്ണുകൾ ഇറുകെ പൂട്ടിവച്ചു തന്റെ മനസ് കൊണ്ട് യക്ഷമിയോട് സംസാരിക്കുവാനായി ആരംഭിച്ചു.

വരൂ രാജകുമാരാ…… ഗുഹയിലേക്ക് ആഗതനായാലും.

ബ്രഹസ്പതി പൂർണ ബഹുമാനം നിറഞ്ഞ വാക്കുകളിലൂടെ അലോകിനെ ക്ഷണിച്ചു.

വാമിഖയുടെ ഉള്ളം കൈ പുണർന്നുകൊണ്ട് അലോക് ഗുഹയ്ക്ക് ഉള്ളിലേക്ക് കടന്നു.

പിന്നാലെ കാരിനാഗ വംശജരും.

ഒടുവിൽ അവരുടെ രാജകുമാരനെ കണ്ടെത്തിയെന്ന ചാരിതാർഥ്യത്തോടെ.

.
.
.
.
.
.
.
കാറിലിരുന്ന് പുറത്തേക്ക് കണ്ണും നട്ടിരിക്കുകയായിരുന്നു യക്ഷമി.

തൊട്ടടുത്ത് തന്നെ മഹിയുമുണ്ട്.

രാജസ്ഥാൻ അതിർത്തി കഴിഞ്ഞ് അവർ ഡൽഹിയോട് അടുത്തെത്തി.

സഞ്ജീവ്ജിയുടെ ഏരിയ ഒക്കെ ഏകദേശം കഴിഞ്ഞിരിക്കുന്നു.

ഇനി ഭയപ്പെടാൻ ഒന്നുമില്ല.

യക്ഷമി ആശ്വാസത്തോടെ നെടുവീർപ്പെട്ടു.

പെട്ടെന്നാണ് യക്ഷമിയുടെ മനസിൽ മാതംഗി നംഗ ഭാഷയിലൂടെ സംസാരിക്കുവാൻ തുടങ്ങിയത്.

മകളെ യക്ഷമി………