?കരിനാഗം 10? [ചാണക്യൻ] 514

.
.
യക്ഷമി………………

മഹി നീട്ടി വിളിക്കുന്നത് കേട്ടാണ് യക്ഷമി സ്വബോധത്തിലേക്ക് തിരികെ വന്നത്.

ങ്‌ഹേ..

യക്ഷമി ഞെട്ടലോടെ കണ്ണുകൾ മിഴിച്ചു നോക്കി.

കണ്മുന്നിൽ തനിക്ക് നേരെ തുറിച്ച നോട്ടം സമ്മാനിക്കുന്ന മഹാദേവ്.

മഹിയുടെ ദേഹത്തു മുറിവോ ചോരപ്പാടുകളോ ഇല്ല.

യക്ഷമി സ്വന്തം കരം നോക്കി.

അതിൽ ഭദ്രമായി ഇരിക്കുന്ന കഠാര.

യക്ഷമിയുടെ നോട്ടം പാളുന്നത് കണ്ടു മഹി അങ്ങോട്ടേക്ക് ശ്രദ്ധ കേന്ദ്രീകരിച്ചു.

യക്ഷമിയുടെ കയ്യിൽ വിശ്രമിക്കുന്ന അതി മനോഹരമായ ഒരു കഠാര.

അതിന്റെ നിർമാണ ശൈലി കണ്ടു മഹി പോലും കോരിത്തരിച്ചു പോയി.

സർപ്പിള ആകൃതിയിലുള്ള പിടിയും തിളക്കമുള്ള കഠാരയുടെ മൂർച്ചയുള്ള ഭാഗവും.

ഇത് കൊള്ളാലോ യക്ഷമി….. എവിടുന്ന് കിട്ടി?

മഹി അതിശയത്തോടെ ചോദിച്ചു.

അപ്പോഴാണ് യക്ഷമിക്ക് അൽപം മുന്നേ കണ്ടത് സ്വപ്നമാണെന്ന് തിരിച്ചറിഞ്ഞത്.

അവൾ ആശ്വാസത്തോടെ നെടുവീർപ്പെട്ടു.

ശേഷം പറഞ്ഞു തുടങ്ങി.

മഹി….. ഇത് ഞങ്ങളുടെ കുലം പരമ്പരാഗതമായി കൈമാറി വരുന്ന അതിവിശിഷ്ടമായ ഒരു ആയുധമാണ്.

യക്ഷമി അവന് നേരെ കയ്യുയർത്തി പിടിച്ചു.

മഹി അവൾക്ക് നേരെ കൈ നീട്ടി.

യക്ഷമി ചിരിയോടെ ആ ആയുധം മഹിക്ക് കൈമാറി.

ആ കഠാര കയ്യിൽ വന്നു ചേർന്നതും വല്ലാത്തൊരു ഊർജം കൈ വന്ന പോലെ മഹിക്ക് തോന്നി.

യക്ഷമി ഞാനൊരു കാര്യം പറയട്ടെ?

ആ കഠാര തരുമോ എന്നല്ലേ?

യക്ഷമി കള്ള ചിരിയോടെ ചോദിച്ചു.

അതെങ്ങനെ?

മഹി ആശ്ചര്യത്തോടെ അവളെ ഉറ്റു നോക്കി.

അതെനിക് മനസിലായി മഹി…. ഇതാ വച്ചോളു…… മഹിക്ക് എന്റെ എളിയ ഒരു സമ്മാനം.

യക്ഷമി ആ കഠാര മഹിക്ക് നൽകി.

അവൻ അത്‌ സന്തോഷപൂർവ്വം സ്വീകരിച്ചു.

മഹി സാധനങ്ങൾ എല്ലാം ഞാൻ എടുത്തിട്ടുണ്ട്…. എന്തേലും മിസ് ആയിട്ടുണ്ടെൽ പറയണം കേട്ടോ… ഞാൻ ഒന്നൂടെ പോകാം.

ഞാൻ പറയാം യക്ഷമി.

ശരി…. എങ്കിൽ റസ്റ്റ്‌ എടുത്തോ…. ഞാൻ ട്രെയിൻ ടിക്കറ്റ് ബുക്ക്‌ ചെയ്യട്ടെ.

അല്ല…. റോസ്മേരി മുന്നേ ബുക്ക്‌ ചെയ്തിട്ട് അയച്ചു തന്നല്ലോ?

മഹി അവളോട് പറഞ്ഞു.

അതുവേണ്ട മഹി…. സഞ്ജീവ്ജിയുടെ ചാരന്മാർ ഇപ്പോഴും ഇവിടുണ്ട്…. അതുകൊണ്ട് മുക്തപൂർ റെയിൽവേ സ്റ്റേഷനിൽ നിന്നുമുള്ള യാത്ര അപകടമാണ്.

പിന്നെന്ത് ചെയ്യും?

മഹി നിരാശയോടെ ചോദിച്ചു.

ഇവിടുന്ന് ടാക്സി പിടിച്ചു ഡൽഹിക്ക് പോണം… അവിടുന്ന് കേരളം.