?ആരവിന്റെ ആർദ്ര ? [AJX] 213

ആർദ്ര പറഞ്ഞതൊക്കെ കേട്ട് വല്ലാത്തൊരു അവസ്ഥയിൽ ആയിരുന്നു ഞാൻ.. സ്വന്തം അമ്മ മകളോടിങ്ങനെ..

ഇല്ല.. ഇനിയൊന്നു അറിയാനില്ല ആർദ്ര..

ഇത്രയും കേട്ടപ്പോൾ തന്നെ ഞാനാകെ തളർന്നിരുന്നു..

അവൾ ഒരിളം ചിരിയോടെ എന്നെ നോക്കി.. ആ ചിരിയിൽ ഒളിപ്പിച്ച ദുഃഖം എനിക്ക് വ്യക്തമായി കാണാൻ കഴിഞ്ഞിരുന്നു..

അവൾ വീണ്ടും വായനയിലേക്ക് കടന്നു.. ഞാൻ അവൾ പറഞ്ഞതൊക്കെ ഓർത്ത് കണ്ണടച്ച് സീറ്റിൽ ചാരി ഇരുന്നു.. പതിയെ അതൊരു മയക്കത്തിലേക്ക് വഴിമാറി…

പിന്നെ ഞാനുണരുന്നത് ആർദ്ര ആരോടോ ഉച്ചത്തിൽ സംസാരിക്കുന്നത് കേട്ടാണ്.. കേട്ടാണ്… കണ്ണും തിരുമ്മി കൊണ്ട് ഞാൻ അവളെ നോക്കി.. നോക്കുമ്പോൾ അവളുടെ അടുത്ത് ഒരു മധ്യ വയസ്കൻ ഇരിന്നിട്ടുണ്ട്.. അയാൾ അവളെ ശല്യം ചെയ്യുന്നത് കൊണ്ടാവണം ഒച്ചയുണ്ടാക്കിയത്.. ഞാൻ ഉണർന്നത് കണ്ട് അയാൾ കുറച്ചകന്നിരുന്നു..

ആർദ്രയുടെ മുഖത്ത് ഇപ്പോൾ മാസ്ക് വച്ചിട്ടുണ്ട്.. അവൾ എന്നെ തന്നെ നോക്കിയിരിക്കുകയാണ്.. ഞാൻ എന്താ എന്ന അർത്ഥത്തിൽ പുരികം പൊക്കി കാണിച്ചു…