?The Hidden Face 3? [ പ്രണയരാജ] 646

ശരി മാഡം.

രാജൻ അമ്മയെയും കൊണ്ട് അരവിന്ദൻ്റെ വീട്ടിലേക്കു പോയി. വീടിനു മുന്നിൽ കാർ നിർത്തിയതും അവർ ഇരുവരും ഇറങ്ങി.

വരു… അമ്മേ…

രാജൻ മുന്നിൽ നടന്നു. രാജനു പിറകെ അമ്മയും ഉമ്മറ വാതിൽ ചാരായിട്ടെ ഉള്ളു. ആദ്യം കണ്ട മുറിയിലേക്കു രാജൻ കയറിയതും അമ്മയും കയറി. കട്ടിലിൽ അരവിന്ദൻ കിടക്കുന്നുണ്ടായിരുന്നു. നല്ല മയക്കത്തിലാണ്. അവനരികിൽ ലക്ഷ്മിയമ്മ ഇരുന്നു.

മുഖത്തും ദേഹത്തും തിണർത്ത പാടുകൾ കാണാം, ദേഹത്തവിടെ അവിടെയായി ചോര കല്ലിച്ചിട്ടുമുണ്ട്. അവൻ്റെ ആ കിടത്തം ആ അമ്മയുടെ കണ്ണുകളേയും ഈറനണിയിച്ചു. അവർ പതിയെ അവൻ്റെ മുടികളിൽ തഴുകുമ്പോൾ അവൻ അബോധാവസ്ഥയിൽ മന്ത്രിച്ചു.

അമ്മേ…..

ഒരമ്മയുടെ വാത്സല്യം അവരിലും ഉടലെടുത്തിരുന്നു. ഹൃദയത്തെ സ്പർഷിച്ച വിളിയായിരുന്നു അത്.

മയക്കത്തിലാ… മരുന്നിൻ്റെ ക്ഷീണം.

രാജേട്ടൻ പറഞ്ഞതു കേട്ട് അമ്മയൊന്നു തലയാട്ടി, ശേഷം എന്തോ ഒരു ഉൾപ്രേരണയാൽ അവൻ്റെ നെറ്റിയിൽ ഒരു സ്നേഹചുംബനം അവർ അർപ്പിച്ചു.

ആ…. അയ്യോ… എന്നെ കൊല്ലല്ലേ….

ഒരു സ്ത്രീയുടെ അലർച്ച അവിടെ മുഴങ്ങിയതും ലക്ഷ്മിയമ്മ ഭയന്നു. അതു കണ്ട രാജേട്ടൻ പറഞ്ഞു.

പേടിക്കണ്ട അമ്മേ…. അത് അരവിന്ദൻ്റെ അമ്മയാണ്.

എനിക്കവരെ ഒന്നു കാണണം,

രാജേട്ടനും അമ്മയും അരവിന്ദനെ വിട്ട്, അവൻ്റെ അമ്മയുടെ മുറി ലക്ഷ്യമാക്കി നടന്നു.