സഖി 79

ഇപ്പോഴും അവളാ ജനൽ പാളികൾക്കിടയിലൂടെ ലോകത്തെ നോക്കി കാണുകയാണ്. അതിലൂടെ മാത്രം കാണുന്ന കാഴ്ചകളാണ് അവൾക്ക് ലോകം.

“ലക്ഷ്മി.”

അവൾ തിരിഞ്ഞു നോക്കിയില്ല.

” വരേണ്ടിയിരുന്നില്ല സൽമാൻ. എനിക്കീ മുഖം കാണണ്ട. നിന്റെ ലക്ഷ്മി മരിച്ചു പോയി. അവളെ തിരഞ്ഞാണ് നീ വന്നതെങ്കിൽ മടങ്ങി പൊയ്ക്കോളൂ.. ”

മുഖത്ത് നോക്കാതെ തന്നെ അവൾ മറുപടി നൽകി.

“നിന്നെ കൊണ്ട് പോകാനാണ് ഞാൻ വന്നത്. ഇവിടെ നിന്നെ ഉപേക്ഷിക്കാൻ എനിക്കാവുമെന്ന് തോന്നുന്നുണ്ടോ?”

അത്രമാത്രം അവളോട് ചോദിച്ചു.

പിന്നെയും ഓരോന്ന് പറഞ്ഞുകൊണ്ട് എതിർത്തു നിന്നവളെ അവൻ മാറിലേക്ക് വലിച്ചിട്ടു. അവളെ പുണർന്നുകൊണ്ട് അവൻ പൊട്ടിക്കരഞ്ഞു.

അതാണ്‌ അവൾക്കിപ്പോൾ വേണ്ടത് എല്ലാം കരഞ്ഞു തീർക്കുവാൻ ഒരു നെഞ്ചകം.

“ഞാൻ മലിനമായി സൽമാൻ. നിന്റെ സഖി ഇന്ന് പലരുടെയും വിഴുപ്പുകൾ പേറുന്നവളാണ്. എന്റെ ശരീരം നിരവധി പേരുടെ വിയർപ്പുകൾ നിറഞ്ഞതാണ്. എന്നെ തൊട്ട് നീ നിന്നെത്തന്നെ ആശുദ്ധമാക്കരുത്.”

കരയുന്നതിനിടയിൽ അവൾ പറയുന്നുണ്ടായിരുന്നു അതൊക്കെ.

വിവാഹം കഴിഞ്ഞു നാളുകൾക്ക് ശേഷം ഭർത്താവുമായി അവൾ ബാംഗ്ലൂരിലേക്ക് എത്തി. അവിടെ ഒരു സ്ഥാപനത്തിൽ അവൾക്ക് ജോലി വാങ്ങിക്കൊടുത്തു ആ മനുഷ്യൻ.

ആ സ്ഥാപനത്തിൽ വെച്ച് അതിന്റെ ഉടമയാൽ  ക്രൂരമായി ബലാത്സംഗം ചെയ്യപ്പെട്ടു അവൾ. ഒന്നല്ല ഒന്നിലധികം പേരാൽ. മയക്കി കിടത്തി അവളെ അയാൾ പലർക്കും കാഴ്ച്ചവെച്ചു. ആ വാർത്തയറിഞ്ഞ ഭർത്താവ് അവളെ കയ്യൊഴിഞ്ഞു. അവളുടെ കുറേ നഗ്നചിത്രങ്ങൾ പുറത്തു വന്നു. പുറത്തിറങ്ങാൻ പോലുമാവാതെ അവളെ അത് തളർത്തി കളഞ്ഞു. ആത്മഹത്യക്ക് ശ്രമിച്ച അവളെ വിധി അവിടെയും തോൽപ്പിച്ചു.

വീട്ടുകാർക്കും വേണ്ടാതെ വന്നപ്പോൾ ഇനി എന്തെന്നറിയാതെ നിന്നവൾക്ക് മുന്നിൽ ആശ്വാസമെന്നോണം ഒരു സ്ത്രീ അവതരിച്ചു. എന്തായാലും നശിച്ചു. ഇനി ആ വഴി തന്നെ തിരഞ്ഞെടുക്കുക. സ്വയം നശിക്കുക എന്നൊരു മാർഗ്ഗത്തിലൂടെ ജീവിതം നയിക്കുകയാണവൾ.

പ്രതിസന്ധികളെ തോൽക്കാതെ നിന്ന് നേരിടാൻ പ്രേരിപ്പിച്ചവൾ. ഇന്നവൾ…….

അവളുടെ കഥകൾ ഞാൻ കേട്ടിരുന്നു.

“ഇങ്ങനെ സ്വയം നശിക്കേണ്ടവളല്ല നീ. പെണ്ണിന്റെ പരിശുദ്ധി ശരീരത്തിൽ അല്ല ലച്ചു. നിന്റെ മനസ്സിപ്പോഴും പരിശുദ്ധമാണ്. അതുമതി നിനക്ക് ജീവിക്കാൻ ”

എല്ലാ തടസങ്ങളെയും നേരിടാൻ മനസ്സിനെ സജ്ജമാക്കിക്കൊണ്ട് അവളുടെ കൈപിടിച്ച് അവൻ അവിടെ നിന്നുമിറങ്ങി.

ഫ്ലാറ്റുകൾ ആധിപത്യം സ്ഥാപിച്ചൊരു മേഖലയിൽ തിരക്കുകൾക്ക് നടുവിലൂടെ അവൻ അവളുടെ കൈപിടിച്ച് നടന്നു.

അവനെ അറിയുന്ന കണ്ണുകൾ അവളെ നോട്ടത്താൽ കീറി മുറിച്ചു.