ശ്രീ നാഗരുദ്ര ? ???? – ഒന്നാം ഭാഗം – [Santhosh Nair] 1055

ആ പാട്ടു നിർത്തിയശേഷം അവൾ അടുത്ത പാട്ടിലേയ്ക്ക് കടന്നു. “അലർശര പരിതാപം” എന്ന വിരഹം തുടിയ്ക്കുന്ന കൃതി. അതിമനോഹരമായി അതും പാടുന്ന അവളുടെ ശബ്ദ സൗകുമാര്യത്തിൽ അവൻ ലോകം തന്നെ മറന്നു.

അതിലെ പല്ലവിയും ചരണവും അവൾ പാടി നിർത്തിയയുടനെ അവൻ അറിയാതെ പാടിപ്പോയി:

“വളരുന്നു ഹൃദയമോഹം, എന്നോമലേ, തളരുന്നു മമ ദേഹം, കളമൊഴി…” അങ്ങനെ പാടിക്കൊണ്ട് അവൻ അറിയാതെ തന്നെ അവളുടെ അടുത്തേയ്ക്കു ചെന്നു. കൈകൾ നീട്ടി.

ലജ്ജ ചുവപ്പിച്ച കവിളുകളോടെ വീണ താഴത്തു വെച്ച് വന്ദിച്ചു കൊണ്ട് അവൾ എണീറ്റു നിന്നു, അവൻ നീട്ടിയ കൈകളിൽ പിടിച്ചു. പിന്നീടു പ്രണയാർദ്രമായി ആ ഗാനം രണ്ടുപേരും ചേർന്നു പാടി.

ഗാനം തീർന്നു കഴിഞ്ഞാണ് ശ്രീകുമാറിന് സ്ഥലകാല ബോധം വന്നത്, കണ്ണു തുറന്നു നോക്കുമ്പോൾ അവൾ അവന്റെ മാറിൽ ഒട്ടി നിൽക്കുകയായിരുന്നു. അവളുടെ ശരീര സുഗന്ധവും, മുടിയിൽ നിന്നും ഉയരുന്ന ഉത്തേജിപ്പിയ്ക്കുന്ന പിച്ചിപ്പൂമണവും അവന്റെ സിരകളിൽ രക്തയോട്ടം കൂട്ടി.

ഒരു ഞെട്ടലോടെ അവളെ പതുക്കെ അവൻ അടർത്തിമാറ്റി – അവന്റെ കണ്ണിലേയ്ക്ക് ഉറ്റുനോക്കി നിൽക്കുന്ന ആ മനോഹരങ്ങളായ നീല മിഴികളിലേയ്ക്കും അവളുടെ പവിഴാധരങ്ങളിലേയ്ക്കും അറിയാതെ നോക്കിപ്പോയി.

“ക്ഷമിയ്ക്കണം” അവൻ പറഞ്ഞു.

ഒരു കള്ളച്ചിരി അവളുടെ ചുണ്ടിൽ വിരിഞ്ഞു. “സാരമില്ല” അവൾ പറഞ്ഞു. അപ്പോഴും അവരുടെ കൈകൾ ചേർന്നു തന്നെയിരുന്നു, പിടി വിടാതെ.

“എന്താണ് കുട്ടിയുടെ പേര്? ക്ഷമിയ്ക്കണം, ഞാൻ ചോദിയ്ക്കാൻ വിട്ടുപോയി”

“സാരമില്ല, എന്റെ പേര് രുദ്ര. നാഗ രുദ്ര എന്നാണു മുഴുവൻ പേര്. എന്നെ രുദ്ര എന്നു വിളിച്ചോളൂ. ഞാൻ താങ്കളുടെ പേരും ചോദിച്ചില്ല, എന്താണ് പേര്?”

“ശ്രീകുമാർ – മുഴുവൻ പേര് ശ്രീകുമാർ വിവേകാനന്ദൻ. ശ്രീ എന്നോ കുമാർ എന്നോ ശ്രീക്കുട്ടൻ എന്നോ വിളിച്ചോളൂ.” എന്തോ ഒരു മോഹാലസ്യത്തിൽ അകപ്പെട്ടതു പോലെ അവൻ പറഞ്ഞു.

ആ അഴകാർന്ന മുല്ലമൊട്ടുകൾ കാട്ടി അവൾ അതി മനോഹരമായി പുഞ്ചിരിച്ചു. “ശ്രീക്കുട്ടൻ, നല്ല പേര്. ഞാൻ ശ്രീയേട്ടൻ എന്നു വിളിച്ചോട്ടെ?”

“തീർച്ചയായും” അവൻ പറഞ്ഞു.

ഒരു കൊഞ്ചലോടെ അവൾ വിളിച്ചു “ശ്രീയേട്ടാ”.

എന്തോ ഒരു അനിർവചനീയമായ സുഖം ശരീരത്തിലുടനീളം ഒഴുകുന്നതുപോലെ അവനു തോന്നി. അവൾ ശരീരത്തോട് ചേർന്ന് നിന്നു മുഖം ഉയർത്തി. എന്തിനുവേണ്ടിയോ വിറ കൊള്ളുന്ന അവളുടെ അധരങ്ങൾ അവന്റെ മുഖത്തേയ്ക്കടുത്തു.

“എത്ര നാളുകളായി ഞാൻ അവിടുത്തേയ്ക്കായി കാത്തിരിയ്ക്കുന്നു – എന്റെ പ്രാണനാഥാ” വളരെ കാതരമായി അവൾ അവന്റെ ചെവിയിൽ മൊഴിഞ്ഞു.