ശ്രീ നാഗരുദ്ര ? ???? പതിമൂന്നാം ഭാഗം – [Santhosh Nair] 285

അപ്പോഴേയ്ക്കും അണ്ണനും വന്നു. കഞ്ഞി കുടിച്ചശേഷം അവൻ അടുക്കിവെയ്ക്കാനുള്ള ജോലികളിലും മറ്റും അക്കാവെയും അണ്ണനെയും സഹായിച്ചു. അടുക്കള വൃത്തിയാക്കൽ ഒരു കഷ്ടം പിടിച്ച പണിതന്നെയാണ്. കട്ടിയുള്ള ജോലികൾ എല്ലാം തീർത്തുകൊടുത്തു. ബാക്കിയുള്ള ജോലികളൊക്കെ ഇനി അക്കാ നോക്കികൊള്ളും. തമ്പിയും മോളും സഹായത്തിനെത്തിക്കഴിഞ്ഞു.

ആ മാസത്തേയ്ക്ക് വേണ്ടിയ സാധനങ്ങളുടെ ലിസ്റ്റ് ഉണ്ടാക്കിയശേഷം അണ്ണൻ അടുത്തുള്ള സൂപ്പർമാർക്കറ്റിലേയ്ക്ക് പോയി. പച്ചക്കറികളുടെ വ്യവഹാരമെല്ലാം അക്കാ തന്നെ ചെയ്തോളും. പക്ഷെ മാസത്തിലുള്ള പലചരക്കു വാങ്ങൽ അണ്ണനാണു നോക്കുന്നത്.

അപ്പോഴേയ്ക്കും പത്തുമണി കഴിഞ്ഞു. സ്നേഹയുടെ വീട് കോറമംഗല കഴിഞ്ഞാണ്. പതിനൊന്നു മണിയ്ക്കു ഹോമവും അതുകഴിഞ്ഞു ചെറിയ ഒരു കേക് കട്ടിങ്ങും പിന്നീട് സദ്യയുമാണ് പ്രോഗ്രാം. ഓഫീസിൽനിന്നും സ്റ്റാഫുകൾ ഉണ്ടാവും.

റീഫ്രഷ് ആയശേഷം ക്രീം നിറമുള്ള വേഷ്ടി, ഷർട്, അംഗവസ്ത്രം ധരിച്ചു ശ്രീകുമാർ പുറപ്പെട്ടു. പോകുന്ന വഴിയിൽ ജൂവലറിയിൽ നിന്നും അമ്മയ്ക്ക് വളകളുടെ ഒരു സെറ്റും അച്ഛന് ഒരു സ്വർണം കെട്ടിയ രുദ്രാക്ഷ മാലയും വാങ്ങി.

പത്തേമുക്കാലിനു തന്നെ അവൻ സ്നേഹയുടെ വീട്ടിൽ എത്തി. അവർ സ്നേഹാദരങ്ങളോടെ അവനെ സ്വീകരിച്ചു. സ്നേഹയുടെ അച്ഛനും അമ്മയും പ്രത്യേക ഇരിപ്പിടങ്ങളിൽ മാലയണിഞ്ഞു ഇരുന്നിരുന്നു. അവനെ കണ്ട അവർ സ്നേഹപൂർവ്വം പുഞ്ചിരിച്ചു. അവർക്കു മുന്നിൽ സാഷ്ടാംഗം നമിച്ചു അനുഗ്രഹം വാങ്ങിയശേഷം അവൻ കൊണ്ടുവന്ന സമ്മാനങ്ങൾ അവരെ ഏൽപ്പിച്ചു.

ആ രുദ്രാക്ഷ മാല കണ്ട സ്നേഹയുടെ അച്ഛന്റെ കണ്ണ് സന്തോഷം കൊണ്ടു നിറഞ്ഞു. (കറതീർന്ന ശിവ ഭക്തനായ അദ്ദേഹത്തിനു വെള്ളി കെട്ടിയ 108 രുദ്രാക്ഷമാല വാങ്ങണം എന്നു ആഗ്രഹമുണ്ടെന്ന് സ്നേഹ പറഞ്ഞു എപ്പോഴോ അവൻ കേട്ടിട്ടുണ്ട്.) അദ്ദേഹം നന്ദിപൂർവം അവനെ നോക്കി ചിരിച്ചു – അതിനു അവൻ കണ്ണിറുക്കി ചിരിച്ചു മറുപടി കൊടുത്തു.

ഹോമം തുടങ്ങാനായി വാധ്യാരും സില്ബന്ധികളും അപ്പോഴേയ്ക്കും എത്തിച്ചേർന്നു.

കൃത്യ സമയത്തു തന്നെ ഹോമം തുടങ്ങി. അപ്പോഴേയ്ക്കും ക്ഷണിയ്ക്കപ്പെട്ടവർ എല്ലാം വന്നു ചേർന്നു. ഹോമദ്രവ്യങ്ങളുടെ സുഗന്ധത്തോടൊപ്പം ഹോമകുണ്ഡത്തിൽ നിന്നുള്ള പുകയും എങ്ങും പരന്നു. ഹോമശേഷം എല്ലാവരും നമസ്കരിച്ചു അനുഗ്രഹം വാങ്ങിയശേഷം സദ്യ തുടങ്ങി.